VAEGA 123

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’igama le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai onao tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atule soso’oga o le tatou Fagogo, O OE O LOU TAMA?

*******************************************

Sa gata mai le tatou Fagogo i le vaiaso ua mavae, ina ua i’u manuia le feiloaiga a le tamaloa o Alesana ma lana loia, po o si ona afafine o Ruta, ma le Ofisa a Leoleo e tusa ai ma le mataupu i le suiga o le igoa a Alesana mai ia Tanielu.

Na leiloa le mea na o’o iai le fiafia tele o Alesana ma si ona toalua, o Eseta ma si a la tama teine, o Ruta, lea o lo’o avea ma loia a Alesana, ina ua fa’ailoa mai e le ta’ita’i leoleo, le fa’aleaogaina o le mataupu e faasaga ia Alesana. 

Ma na faatonuina ai loa e le tamaloa o Alesana ia lona afafine o Ruta, e valaau nai ona tei, ina ia vave mai i le fale pe a manava galuega e fai se latou fiafia i lea po.

Ia se’i o tatou tu’u ai i’i le to’atolu lea, ona o lea ua i’u fiafia le latou mataupu, ae o tatou tulimata’i atu ia le alii fomai o Taki ma le tamaitai o Naomi, lea na o ese fa’atasi mai i le fale i lea taeao.

Na alu lava le ta’avale a Taki ae o le taimi lea ua na o le saofai o le teine o Naomi ma sioa i fafo o le faamalama a le ta’avale.

“Aua e te popole, o le a okay mea uma,” o le tala lea a Taki na toe te’i mai ai Naomi mai ona mafaufauga, ma ona taumafai ai e solo ese ona loimata.

“O le a la lau mea lea la’a fai, aua o lena ua e faamavae mai lau galuega?” o le fesili atu lea a Naomi i le alii fomai.

Ua ata ia Taki ma ia faapea atu, “Ou te le iloa.  Se’i o’u malolo ma sailiili po o le a seisi galuega e mafai ona ou faia.”

Na alu le aso atoa, o le lelei se galue a Naomi ona o le alu o lona mafaufau i lona tama.  Ma sa taumafai lava e faapisi lona mafaufau, ina ia aua ai ne’i ona tago i lana telefoni e valaau lona uso.

Sa fa’afetai filemu ifo ia Naomi i lona loto, ona e le’i fetaui ma lana supavaisa, le tamaitai o Salome, i lea aso.

Aua sa fa’anoi mai foi Salome e le sau e faigaluega i lea aso.

O le latalata i le malologa o le aoauli, ae tatagi le telefoni a Naomi.  Na toeititi pe le fatu a Naomi ina ua vaai atu, o lona uso o Ruta lea e valaau mai.

Ua tali filemu atu ia Naomi, “Hello.”  Ae faapea mai Ruta, “O le a le mea e te musumusu ai?  O fai sau fono?”

Ua ata Naomi ma faapea atu, “E leai.  E iai se mea ua tupu?  O le a le tala ia Dad?”

Ua ‘ata’ata le teine o Ruta ma faapea mai, “Fai mai Dad e vave mai le fale e kuka lana meaai.  Ma valaau ia le foma’i e te lua o mai.”

[E FAIA PEA]