VAEGA 121

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’igama le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai onao tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atule soso’oga o le tatou Fagogo, O OE O LOU TAMA?

*********************************************

Na gata mai le tatou Fagogo i le vaiaso ua tuanai, ina ua taunu’u ia le tamaloa o Alesana ma le fafine o Eseta ma lo la alo tamaitai loia o Ruta, i le ofisa a leoleo.

O le taeao lea ua fuafua ai Alesana, o le a o ai e fa’ailoa i le Ofisa a Leoleo lana mea sa fai lea sa suia ai lona igoa mai ia Alesana, i a Tanielu.

Faatasi ai ma lona mana’o ina ia toe fa’asa’o lona igoa.

Ina ua taunu’u le vaega lea i le Ofisa a Leoleo, sa faatonuina e Ruta ona matua e fa’atali atu i le potu malolo a le Ofisa a Leoleo ae se’i muamua i totonu e la te talatalanoa ma le ta’ita’i leoleo.

Na fai sina umi o i totonu ia Ruta, ua amata ona faapopoleina ia loto ma mafaufau a Alesana aemaise lava le fafine o Eseta, lea e le’i matu lava loimaata, talu ona o latou tu’ua le fale ma agai mai i le ofisa a leoleo.

E tonu loa i le manatu o le fafine o Eseta, o la’ua la’a toe fo’i i le fale, ae savali mai loa Ruta ma musumusu atu i ona matua, e la te mulimuli atu ia te ia.

Na faapea ona agai atu le toatolu lea i totonu o se potu ua na o se laulau ma nofoa.

Ua faapea atu nei le leoleo a fa’afeaoina mai ia Ruta ma ona matua i totonu o le potu, ina ia fai sina malologa, ua toeititi taunuu atu le taitai leoleo.

Ua atili ona le ta ta vale le fatu o le fafine o Eseta, ona e fai o le umi o le nofonofoga lea na fai i fafo, ae o lea foi ua toe faatonu mai e toe faatali foi.

Sa taumafai le teine o Ruta e fa’ato’ato’a lona tina.

Ae ua faapea atu le fafine o Eseta, “Vaai e le o iloa lava e leoleo se mea o tupu.  Tatou o tatou i le fale.”

Ae na faapea atu iai le teine o Ruta, “Onosai Mama, e leai lava se mea e sili atu nai lo le ave’esea o lenei avega mamafa mai i tau’au a Dad.”

Ua toe saofa’i ifo i lalo ia le fafine o Eseta, i upu a Ruta.

E le’i umi lava ae savali atu loa se tamaloa faatino’ao ma le maualuga i totonu o le potu.

E le’i iai lava seisi faamatalaga, ua na ona sasa’o atu lava o le ta’ita’i leoleo ma saofa’i loa.  Ua ia tilotilo sa’o lava ia Alesana ma ia faapea atu iai, “O lau susuga lea sa ola faapi’opi’o?”  Ua ea a’e i luga ia Alesana ua leiloa po o le a sana tali a fai atu i le leoleo.

“Ia o lea ua ou faitauina uma tulaga o lau mataupu ma lau faaiuga na fai.  Ma o lenei tulaga sa e faia, o se tulaga e matua’i mamafa lava.  Ana faapea la e o’o mai ma se tagi e faasaga i lau solitulafono sa fai, ia ta te alofa atu lava ia te oe.”

O le faamatalaga lea a le ta’ita’i leoleo.

“Ae peitai ane, ua lagona e le Atua au talosaga po o talosaga foi a le tina.  Ona o lea e siaki atu tausaga o le umi na e faia ai lea tulaga, ua pasi ma le taimi fa’atulagaina.”

Ua le mautonu ia Alesana po o le a le uiga o le faamatalaga a le taitai leoleo.

“Dad, o lea ua mae’a ona o ma talanoa ma le ta’ita’i leoleo, ma o le a fa’aui i tua lau mataupu.  O le a le toe iai ni moliaga e faia faasaga ia te oe.  Ma o le a tapunia foi lenei mataupu.”

[E FAIA PEA]