Pago Pago - AMERIKA SAMOA

O le taeao o le aso Faraile, Aperila 17, 2025 sa faapea ona fa’atumulia ai le Malaeoletalu i Utulei, i Tupu ma E’e o le atunu’u, na aofia ai Taitai Fa’alemalo i ona vaega e tolu, faapea malo fa’aloalogia mai atunu’u i fafo, ma le ma’ave ‘ese’ese, aua le molimauina o le fa’amanatuina o le 125 tausaga “na tasi ai le tofa i le mamalu o Tupu ma Tamali’i ma le Faleupolu o Tutuila ma Manu’a…e osia se feagaiga, e tu’uina aloa’ia atu ai Motu o Tutuila, Aunu’u ma Manu’a i lalo o le pule’aga fa’amalo a le Malo o le Iunaite Setete o Amerika,” e pei ona ta’ua i totonu o le Poloa’iga Fa’alauaitele, na sainia e le afioga i le Kovana, ia Pulaali’i Nikolao Pula, lea sa lima ta’ita’iina ai lea fa’amoemoe.

Ma na ta’ua foi i le poloa’iga fa’alauaitele, e faapea, “sa tasi le tofa fa’atupu i le mamalu o Tupu ma Tamali’i ma Faleupolu o Tutuila ma Manu’a, o sui mamalu o le atunu’u, e tusa ai ma le aganu’u Fa’a-Samoa, ina ia tautua fa’amalo i Malo o le Iunaite Setete i Amerika.”

E le gata i lea, “sa ioe le Malo o le Iunaite Setete, ina ia fa’atuina se malo lelei ma le mautu, puipuia ‘aia tu’ufa’asolo ma mea totino a tagata Samoa, ma fa’aeaina le filemu ma le soifuaga lelei o tagata.”

Ma ua fa’alauiloa mai foi i le poloa’iga fa’alaua’itele le tausia “faamaoni e le mamalu o Tutuila ma Manu’a, faapea ma le Iunaite Setete, i autu ma fatu’aiga o ia feagaiga sa osia.”

O le manulauti o lenei fa’amoemoe, na fa’aautuina “Ta Mau le Fa’amoemoe”, ma e pei ona sa fa’amanino mai i totonu o le poloa’iga fa’alauaitele le mafuaaga ua filifilia ai lenei autu, “ina ia fa’ataua le tofa ma le silasila mamao a o tatou tua’a i le fa’avae mautu sa latou tapenaina.”

Sa molimauina e nisi sa faapea ona auai atu i le mua’i sauniga, o se polokalame sa fa’aauauina i le malae o fitafita tuai i Iliili, le mamalu ma le maualuga o lea taeao.  Ma na molimauina ai foi e nisi, le auai mai o le Atua, e ala i se nuanua na agiagia i le lagi, a’o fa’agasolo le polokalama o lea taeao.

Na amatalia le taeao i le taunu’u o malo fa’aaloalogia ma fa’afeiloa’ia e le afioga i le Lutena Kovana ia Pulumataala Ae Ae Jr.  Ma ina ua taunu’u le afioga i le kovana ma le faletua, sa faapea loa ona fa’ataunu’uina le Asiasiga o le Tula’i Fa’aaloalo.

O le susuga ia Vaiutusala Sataua Dr. Mataese F. Samuelu na avea ma to’oto’o o le aso ma o ia foi na fofogaina le fa’afeiloaiga o le taeao.

O le sauniga lotu sa peseina e le aufaipese mai i le Uarota a Mapusaga 3, o le Ekalesia a Iesu Keriso o le Au Paia o Aso e Gata Ai.

O le susuga i le Fitugafulu ia Elder Faapito Auapa’au sa fofogaina le talosaga ae o se upu folafola fa’aleagaga aua le alo atu o Amerika Samoa i lana sisiga fu’a.

I sana apoapoaiga fa’aleagaga mo taitai o le malo ma le mamalu o le atunuu i lea taeao, sa fa’aautuina ai e le susuga i le Fitugafulu ona mafaufauga i le Alofa.  Sa ia saunoa e tusa ai ma le manulauti o le aso ma ia fesiligia po o le a tonu le Fa’amoemoe  e ao ona u’umai iai.

“Ou te manatu e le o se Faamoemoe ia tu matilatila Amerika Samoa mai atumotu uma o le vasa Pasefika, i lona tamaoaiga po o sona matagofie.  Ae ou te manatu o lo’o lilifa finagalo o le Faigamalo mo se Faamoemoe susulu, o le faatumaina o se lumana’i manuia mo Amerika Samoa ma ona tagatanu’u lautele aemaise o tupulaga faia’e mo a taeao,” o le saunoaga lea a Elder Auapa’au.

“O se lumanai manuia e fanau mai i le galulue faatasi o tagatanu’u ma o latou taitai.  E tupu mai i le to to e ma faifai mea fiafia, e iloa ina ua fealofani ma fetausia’i.  E maua ina ua fefa’amagaloa’i ma le le saili e taui ma sui atu.”

Sa saunoa le susuga i le Fitugafulu, o le upu Fa’amoemoe, “o nisi taimi e faigata ona malamalama iai, i le tatou gagana o aso uma.”  Sa ia ta’ua e faapea, “O le upu Faamoemoe  e masani ona iai se fa’ailoga o le le mautonu.”

Ae ua ia fa’asoa mai e faapea, i le gagana o le Talalelei, o le upu o le Faamoemoe “e mautinoa, e le maluelue.  O se talitonuga a’ia’i, o le a lelei mea uma a taeao.”

Sa ia fa’ailoa mai ai le o’o mai o le Faamoemoe, i le Faatuatua.  “O le Faamoemoe e taula ai agaga o tagata ia Iesu Keriso, lea e tupu mai ai le Mautinoa…ma tumau mausali ai.”  “E faatupu ai le mana’o e faia galuega lelei ma auauna atu i isi.”

Na fa’asoa mai foi le Failauga, “O le mataupu fa’avae o le Faamoemoe, e o’o atu i le Faavavau, ma e mafai foi ona lagolagoina i tatou i lu’itau i aso uma o le olaga, faatasi ai ma le Faamoemoe, e mafai ona o tatou maua le olioli i le olaga.  E mafai ona o tatou onosa’i ma talitalia lelei puapuaga o tatou aso.”

I le mae’a ai o le talosaga amata, sa faapea ona sisiina tagavai o le Malo Tele ma le tagavai a Amerika Samoa.  O le Tausala o Amerika Samoa, ia Pauliana Angel Felise-Vitale sa na ia lagiina le vi’i o le tagavai a le Amerika, ae o le Aufaipese a le Arts Council a Amerika Samoa sa lagiina le vi’i o le tagavai, a Amerika Samoa.

Ona soso’o ai lea o le Ava o Feiloaiga sa faapea ona alo atu iai le Ofisa o le Mataupu tau Samoa.

Ma fa’amae’aina ai loa le vaega muamua o le Sisiga Fu’a, ae agai atu le mamalu o taitai o le malo ma malo fa’aaloalogia, i le Malae o Lupelele, i le malaeta’alo a Fitafita Tuai, mo le fa’aauauina o le vaega lua o le polokalama, lea na aofia ai fa’afiafiaga mai i Ekalesia e tolu ma le fa’ili pu a le Maligi.