Pago Pago - AMERIKA SAMOA

O le aso Gafua o le vaiaso nei, Setema 9, 2024, sa maua ai le avanoa a le Komiti o le Soifua Maloloina a le Senate, e feiloai ai ma le susuga i le alii fomai ia Dr. Akapusi Ledua lea na avea ma Faatonusili o le falema’i autu a le malo i Fagaalu faapea ma Dr. Jean Anderson, lea na avea ma COO (Chief Operations Officer) a le falemai.

I le latou iloiloga sa faia i le aso Lulu o le vaiaso ua tuanai, sa fete’ena’i ai finagalo o afioga Senatoa e tusa ai ma le faia o lenei iloiloga.

Ona e pei ona sa fa’aalia e le afioga Senatoa Tuiasina Dr. Salamo Laumoli, o ia lea o le Taitaifono o lenei komiti a le Senate, faapea ma le Peresetene o le Senate, le afioga Tuaolo Manaia Fruean, ua fautuaina i la’ua e le loia a le Maota Fono ina ia le faataunuuina lea iloiloga ona o se popolega i le a’afiaga o nisi i tulaga o le tulafono.

Lea na fa’aleoina ai e ni isi o afioga i Senatoa le tatau pea ona faia o lenei iloiloga ina ne’i a’e se manatu i le mamalu o le atunu’u o lo’o maimoa ma fa’afofoga i fa’asalalauga o nei iloiloga, ua taumafai le Senate e ‘alo mai i le faatinoina o latou tiute.   Ma talosagaina ai e afioga Senatoa ia le toe tapaina o se finagalo a le loia a le Maota Fono.

Ma ina ua mae’a ona toe fono taitai o le Senate ma le loia a le Malo, na toe fa’atulagaina ai loa lenei iloiloga mo le taeao o le aso Gafua na se’i mavae atu nei.

Ina o fa’agasolo pea le iloiloga i le aso Gafua, na fa’aauau pea ona fa’aleoina e le afioga Tuaolo le iai pea o sona popolega i le fa’ataunu’uina o lenei iloiloga, ina ne’i a’afia ai nisi o molimau i le tulafono.

I le ulua’i folasaga a le Anderson, sa ia fa’ailoa mai ai le avea o ia ma se tasi o totino o le Komiti Faafoe a le LBJ, mai ia Mati 2021 se’ia o’o mai ia Mati 2023 ona filifilia lea o ia e avea ma Faufautua (Consultant).

Sa ta’ua e Anderson lo latou galulue faatasi ma le susuga ia Dr. Ledua ma nisi o taitai o le falemai, ina ia mafai ona aga’i i luma le falemai.  Ma i le tausaga ua mavae, ua tele ni suiga sa o latou fa’atulagaina ae o lo’o tele pea nisi o galuega o lo’o manaomia ona faia ina ia mafai ai ona si’itia le tulaga o le LBJ i se falema’i ua alagatatau mo le tautuaina o tagata o le atunu’u.

Na saunoa Anderson, o le mafua’aga lea ua ia auai atu i le iloiloga a le Senate i le aso Gafua, ina ia mafai ona faaleoina ona atugaluga i nisi o faaiuga o lo’o faia e le Komiti Faafoe o Faatonusili a le falemai, lea e a’afia ai le fa’aleleia o le LBJ ae faapea foi, ia tagata o le atunu’u.

Na fa’aleoina e Anderson sona atugaluga i le fa’ate’aina o i la’ua ma Dr. Ledua i se taimi ua amata ona o la maua ai ma le alii fomai ia nisi o mataupu ua faapea ona fa’aaoga sese ai tupe a le falemai.

O le mataupu patino lava sa aofia i le folasaga a Anderson, e a’afia ai ni vaegatupe se lua mo le Ofisa o Sailiga ma Laveai (SAR) ma le vaega a le EMS, ae o lo’o aga’i atu i le LBJ.

Na faamatala e Anderson, ia Ianuari 2024 sa fa’afeso’ota’i atu ai o ia e le Ofisa a le SAR ma se faatalosaga “faamolemole, fai ia Dr. Ledua e mana’omia pa’u o taavale a le EMS”.

Na saunoa Anderson, o le tupe lea o lo’o maua e le LBJ, o le tupe faapitoa mo le EMS ma le SAR.  Ma sa amata loa ona ia galue ma ofisa nei e lua, ae peitai, sa taofia o ia e le Komiti Faafoe, ma fa’ailoa atu ia te ia, e le mafai ona ia faia lea tulaga.  Ma faatonuina o ia e aua ne’i toe faia ni feso’ota’iga po o ni fonotaga ma le SAR po o le EMS.

Sa ta’ua foi e Anderson e faapea, sa faatonuina foi Dr. Ledua ina ia ona taofia lana (Anderson) galuega o lo’o faia ona e le o fiafia le Komiti Faafoe ia te ia.

Na saunoa Anderson, le maua foi ni faamaoniga o se fa’atonuga mai i se tasi o totino o le Komiti Faafoe na o’o atu i le pule o le Ofisa o Tupe a le falema’i (CFO), ina ia totogi le $80,000 i se kamupani, mai i vaegatupe a le EMS.

Na saunoa Anderson, sa ia fesiligia le vaega a le EMS ma le SAR pe na maua ia pa’u po o sapalai a le EMS mai i le $80,000 lea, sa sau le tali, e leai.

Sa faamatalaina foi e Anderson, le mauaina o ni faamaoniga, i se faletua a se tasi o sui o le Komiti Faafoe, o lo’o ia maua ni tupe i galuega tua, mai i vaegatupe a le EMS, talu mai le tausaga e 2013 ma sa fa’atula’i mai foi lenei mataupu e nisi o CEO se to’alua i na vaitaimi.

I le ulua’i folasaga a le alii fomai po o le CEO faamalolo, ia Dr. Ledua, sa ia faamatalaina ai le fa’ailoa gutu atu ia te ia, e le Taitaifono o le Komiti Faafoe a le LBJ, ia le fa’ate’aina o ia, i le aso 21 o Aukuso o le tausaga nei. 

Ma sa faatonuina o ia ina ia ave’ese ana meatotino mai totonu o le ofisa sa ia fa’aaogaina ma ia toe fa’afo’i atu le taavale a le falema’i sa ia fa’aaogaina.  Na ta’ua e Dr. Ledua, sa ia faia e pei ona sa faatonuina ai o ia.

Ae o le lua aso na soso’o ai, na fa’ato’a taunu’u atu ai le tusi aloaia mai i le komiti faafoe e fa’ailoa atu ai le faamutaina o lana tautua i totonu o le falemai.  Ma sa ta’ua e Dr. Ledua, sa fai lava sina lautele o le mafuaaga na tu’uina atu i totonu o le tusi, ua mafua ai ona fa’ate’a o ia.  Ae o le auga o ia mafuaaga, o lona le usiusitai ma le mulimuli i faatonuga a le Komiti Faafoe, e aofia ai ma lona le usitaia o tulafono a le falemai.

Sa saunoa Dr. Ledua, i sona talitonuga, o lo’o iai sina fe’ese’esea’iga i manatu i le va o ia ma le komiti faafoe ma le faatinoina o lona tiute o le Pulesili a le falemai.  Sa fa’ailoa atu e Dr. Ledua i afioga i Senatoa, talu lava ona amata ona galue i le LBJ i le 2002, se’ia o’o mai i le aso na fa’ate’a ai o ia, e le’i suia lava lana sini autu po o lona faamoemoega i le faatinoga o ona tiute.  

Sa ia fa’aalia, o lana matafaioi i totonu o le falemai, o le tausiga o tagata gasegase ma le faasaoina o soifua o tagata.

Na ia saunoa e faapea, e ui i le eseese o vaega o le falemai sa ia tautua ai, lea na amata mai i totonu o le potu talavai (Orthopedic), ona soso’o mai ai lea o le avea o ia ma ‘Chief of Staff’, sau ai lava i le Chief Medical Office se’ia o’o mai lava ina filifilia o ia e avea ma Pulesili le tumau ia Fepuari 2023, ma o’o mai ai ina fa’amautuina lona tofiga lea ia Iulai 2023, ae sa tumau pea lona faamoemoega ma lana matafaioi autu i totonu o le falemai.

Sa fa’aalia foi e Dr. Ledua, o lona galue i totonu o le falemai, e le o se galuega ae o se valaauga ma o lana misiona sa faatino, o le tausia lea o tagata gasegase i lona malosi ma lona atamai atoa.  Ma ua silia ma le 22 tausaga o ona ia faatinoina lea valaauga.

Na fa’aleoina foi e le alii fomai lona agaga fa’afetai i le avanoa sa ia maua e auauna ai i tagat ao le atunu’u i le silia ma le 22 tausaga.  Sa ia fa’aalia le agaga fiafia sa ia maua a’o ia fa’ataunu’uina lea valaauga.  O se valaauga lona sau i Amerika Samoa, ona e le’i iai se foma’i tipitipi faapitoa (Orthopedic surgeon).  Ma o le mafuaaga lea sa ia faamautu ai iinei ona o lo’o mana’omia lona tomai faapitoa.

Sa saunoa le afioga Senatoa Tuiasina, o le tala moni lava, o Dr. Ledua o se fomai e alofagia tele e tagata o le atunu’u, e o’o lava i le Senate ona o lona talitonuga maumaututu i le mea moni, i le faatinoga o lona tiute faafomai faapea ma le avea o ia o se taitai.

Ae ui i lea, na saunoa le afioga i le Taitaifono, o le faaiuga a le Komiti Faafoe, o le latou lava lea faaiuga.  Ae sa fia tu’uina atu le avanoa ia i la’ua e fa’asoa mai ai o latou manatu ma tali ni fesili a afioga i Senatoa.

Sa faapea foi ona faaleoina e le afioga i le Senatoa ia Tuiagamoa Tavai le agaga fa’afetai ia Dr. Ledua ona o lona agaga onosa’i e tusa ai ma mea ua tutupu ma na ia ta’ua le fa’ate’ia tele o i latou ona o lenei tulaga ua tula’i mai.  Na toe fesiligia e Tuiagamoa le auala sa fa’ate’aina ai le alii fomai, pe na ta’u gutu atu ia te ia, pe sa ia tu’uina atu se tusi.

Na toe fa’amanino mai e Dr. Ledua, sa ta’u gutu muamua atu ia te ia, ae na fa’ato’a o’o atu le tusi ia te ia, i le lua aso na soso’o ai.

Na saunoa Tuiagamoa, i le latou iloiloga ma le Komiti Faafoe i le taeao lava lea e tasi sa fesiligia ai le Taitaifono o le Komiti Faafoe i le mafuaaga ua o latou faia ai lea faaiuga.  Lea sa tali mai ai le Taitaifono, ona o le tele o faaiuga o lo’o faia e Dr. Ledua, e le tusa ai ma tulafono a le komiti faafoe po o le falemai.  Ma sa o latou fautuaina pea le alii faatonusili ina ia mulimulitai i nei tulafono, ae peitai, e le faalogo le alii faatonusili.  Sa saunoa foi le afioga i le Senatoa, na ta’ua e le taitaifono a le komiti faafoe a le LBJ le fa’aauau pea ona fa’alogo Dr. Ledua i nisi o le aufaigaluega ae le fa’alogo atu ia i latou.

Sa fa’ailoa atu foi e Tuiagamoa ia Dr. Ledua, e tusa ai ma le molimau a le komiti faafoe, e le o fa’ate’aina o ia mai i ona tiute fa’afoma’i, ae ua na’o ona tiute fa’aleta’ita’i.  Sa fesiligia e Tuiagamoa ia le alii fomai pe sa fa’ailoa atu lea tulaga ia te ia.

Na saunoa Dr. Ledua, e ui ina sa ta’u gutu atu ia te ia le tumau pea o lana galuega fa’afoma’i, ae peitai, e le o ta’ua lea tulaga i totonu o le tusi na fa’ao’o atu ia te ia.

Sa ta’ua e Dr. Ledua, o le tulaga e fia faamanino mai i le maota maualuga, e le o iai sona mana’oga e soli se tulafono.  Ma o so’o se faaiuga sa ia faia a’o avea o ia ma Faatonusili, e muamua lava ona ia soalaupuleina lea faaiuga ma le loia a le falemai.  Na saunoa Dr. Ledua, e na te le mulimuli i le mea o mana’o ai le Komiti Faafoe, aemaise lava pe a ia silafia, e le o se tulaga e solia ai le tulafono.

Sa fa’aalia e Dr. Ledua, afai ae faatonuina o ia e faia se tulaga e na te iloa e le tonu ma sa’o, pe solia ai le tulafono, e na te tu malosi ina ia tete’e atu i lea faaiuga.  Sa ia ta’ua foi, o lo’o ia iloa o lo’o iai nisi e le o fiafia ia te ia.  Ae o ia lava ia, e alofa i tagata uma.

Na toe fa’ailoa atu e Tuiagamoa ia Dr. Ledua le alofagia o ia e tagata o Samoa ma o lo’o manaomia pea lana auaunaga i le falemai.

Sa faapea foi ona fa’ailoa atu e Tuiagamoa ia Anderson e faapea, “Na fesiligia le Board po o le a le mea ua a’afia ai fua oe i le mea ua fai ia Ledua.  Ae tali le taitaifono, e le o toe manaomia lau tautua.”

Na saunoa le afioga i le Senatoa ma fautuaina Anderson ina ia aua le taumamao mai i le falemai, ae ia saili pea sona auala e toe fo’i mai ai e toe fa’aauau lana tautua.