Ads by Google Ads by Google

Molia le uncle i lona faia o uiga mataga i lona niece 16 tausaga le matua


[ata: foa'i]
ausage@samoanews.com

Pago Pago, AMERIKA SAMOA

 

E 47 tausaga o se ali’i ua molia e le malo i lona faia lea o uiga mataga i lona niece e 16 tausaga le matua. O lenei gaioiga faasolitulafono e pei ona taua e le malo i le latou tagi na amata mai i le tausaga na te’a nei, ae o le masina o Iulai o le tausaga nei na faatoa faailoa ai loa i Leoleo lenei mataupu.

 

Ina ua pu’e faapagota e Leoleo le ua molia, sa latou maua i ai vaega o fualaau faasaina.

 

O lenei mataupu na tofu atu i le Ofisa o Leoleo i Tafuna ina ua faila e le grandmother a le tamaitai na aafia sana talosaga i le Ofisa o Leoleo faasaga i lona nephew (le alii ua molia), i lona soli soo atu o le fanua ae ua mae’a ona taoto le poloaiga mai le Faamasinoga e faasa ai ona toe tu atu i le fanua.

 

Na fesili Leoleo i le grandmother pe i ai se mafua’aga tuga ua ala ai ona ia naunau e faasa lona nephew ona toe soli atu le fanua, ae na tali le grandmother e faapea, “e i ai uiga mataga faata’uvalea aiga na faia e lo’u nephew ou te le fia talanoa i ai.”

 

Ina ua fesiligia e Leoleo le grandmother poo a uiga mataga na faia e le ua molia, na faamatala ai loa e le grandmother mea uma lava sa tutupu i le va o le ua molia ma lona niece ua 16 tausaga le matua. 

 

Na taua e le grandmother e faapea, i se tasi o aso i le masina o Iulai o le tausaga nei, na maua ai e lona grandson e 12 tausaga le matua le ua molia o loo ia faia uiga mataga i lona niece (le tamaitai na aafia).

 

O ia uiga mataga e aofia ai faiga faafeusuaiga faamalosi faasaga i le tamaitai na aafia ae ave ai e le ua molia tupe. Ina ua ia fesiligia le ua molia e tusa ai o le faalavelave sa tula’i mai, na ta’utino ai le ua molia ma faatoese e tusa ai o ana gaioiga mataga sa fai. Na ta’utino le ua molia i lona aunty, e le toe tula’i mai uiga mataga lea i le lumana’i. Na avea le faalavelave lea ma itu na ita tele ai le grandmother i lona nephew ma ia manatu ai loa e faasa ona toe soli atu e le ua molia le fale ma le fanua.

 

Na taua atili e le grandmother i Leoleo e faapea, e tusa ai ma le faamatalaga a lona niece ia te ia, o le tausaga na te’a nei ao 15 tausaga le matua o lona niece na amata ai ona faatino e le ua molia nei uiga mataga. 

 

Na maua le avanoa e fesiligia ai e Leoleo le tamaitai na aafia, ma ia ta’utino ai i mea sa tutupu i le va o ia ma lona uncle (le ua molia).

 

Na taua e le tamaitai na aafia e faapea, o le tausaga na te’a nei na tula’i mai ai le ulua’i faalavelave, ina ua ulufale faamalosi le ua molia i totonu o lona potu i le leva o le po ma tauanau o ia la te faiaiga. E ui sa musu, ae na faamalosi lava ona faia e le ua molia uiga mataga ia te ia. Ina ua mae’a, sa tuu atu e le ua molia le $20 ia te ia faatasi ai ma lana faaupuga, e aua ne’i ona ta’uina i se tasi le mea sa tupu.

 

O le isi faalavelave na tula’i mai i le tua o le umukuka a le aiga. Na taua e le tamaitai na aafia e faapea, na alu i tua i le umukuka pe tusa o le itula e 9:00 i le po e aumai le apa ma le ulo sa faaaoga i le mea’ai. Na faateia o ia ina ua tu atu fo’i ma le ua molia ma tauanau o ia la te feusua’i i totonu o le umukuka. 

 

Na musu le tamaitai na aafia e talia le manaoga a le ua molia peita’i na faamalosi lava ona faatino e le ua molia uiga mataga i lona niece, ma faatino gaioiga e faamalie ai ona lagona tu’inanau. 

 

Na fiu le tuagane o le tamaitai na aafia e faatali le taimi e toe fo’i atu ai lona tuafafine na alu e piki mai apa ma le ulo i le umukuka, o lea na alu ai loa e saiki lona tuafafine. Na faateia le tuagane o le tamaitai na aafia ina ua ia maua atu le ua molia o loo ia faia uiga mataga i ona tuafafine i totonu o le umukuka. 

 

Na fesiligia e Leoleo le tuagane o le tamaitai na aafia e tusa ai o lenei mataupu, ma faamaonia ai e le ali’i talavou lona maua atu o lona uncle (le ua molia) o loo feusua’i ma lona tuafafine i totonu o le umukuka i se taimi o le po. Na taua e le alii talavou nei i Leoleo le tula’i o lona uncle (le ua molia) ma savali ese e pei lava e leai se mea na tupu, ae taoto ai lava nao lona tuafafine i totonu o le umukuka.

 

Na fiu Leoleo e saili le ua molia ae ua le maua lava o ia. Ae o le masina na te’a nei, na maua ai e Leoleo faamatalaga o loo nofo le ua molia i le fale o lana uo i Kokoland. E to’atele Leoleo na aga’i atu i Kokoland ma latou pu’e faapagota mai ai le ua molia ma auina atu loa i le Ofisa o Leoleo i Tafuna mo suesuega. 

 

A o le i auina atu le ua molia i le Ofisa o Leoleo i Tafuna, na muamua saili e Leoleo lona tino mo ni aupega poo ni fualaau faasaina. 

 

I totonu o le taga o le ofu a le ua molia sa laei, na aua ai e Leoleo le pepa iila laititi e tumu i lau mamago o le mariuana. Na toe saili e Leoleo le isi taga o lona ofu sa laei, ma maua ai se paipa tioata o loo i ai vaega o le pauta faasaina o le aisa. Na faia se suega i fualaau faasaina na maua i le tino o le ua molia ma faamaonia ai, o vaega ia o fualaau faasaina o le aisa ma le mariuana.

 

O le masina na te’a nei na tula’i ai le ua molia i luma o le Fa’amasinoga Faaitumalo. E 2 tagi ua faila e le malo faasaga i le ali’i ua molia. 

 

I le tagi muamua, e 8 moliaga ua faila e le malo faasaga i le ali’i ua molia. O ia moliaga e aofia ai moliaga e 2 o le faia o gaioiga faafeusuaiga ma se tamaitai e laititi i lalo o le tulafono; 2 moliaga o le tagofia o itutinosa o se tamaitai talavou i le tulaga muamua; ma moliaga e 2 o le faia o gaioiga faa sotoma faasaga i se tamaitai e laititi i lalo o le tulafono; o le vaega C lea o solitulafono mamafa, lea e mafai ona faasala ai se tasi i le Toese mai le 5 e oo atu i le 15 tausaga; faapea ai ma moliaga e 2 o le faia o gaioiga e ono lamatia ai le saogalemu o fanau laiti, o le vaega A lea o solitulafono mama, lea e mafai ona faasala ai se tasi i le Toese mo le umi e le silia i le tasi le tausaga, pe faasala foi i le salatupe e le silia i le $1,000, pe faasala fo’i i faasalaga uma ia e 2.

 

I le tagi lona lua faasaga i le ali’i ua molia, ua tu’uaia ai o ia i le moliaga e tasi o lona umia faasolitulafono o vaega o le pauta faasaina o le aisa, faapea ai ma le moliaga e tasi o lona umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000.

 

E $30,000 lea ua faatulaga e tatala ai i tua le ua molia. Afai ae tatala o ia i tua, e le mafai ona ia toe taumafai e faafesoota’i le tamaitai na aafia poo nisi o lona aiga, e le mafai fo’i ona ia taumafai e faafesoota’i molimau a le malo o loo taua i faamaumauga a le Faamasinoga, a ia avea o ia ma tagatanu’u lelei e tausisi i tulafono uma a le malo.

 

O le tausaga e 2009 na ta’usala ai e le Faamasinoga Maualuga le ua molia i le moliaga mamafa o le umia faasolitulafono o vaega o le laau faasaina o le mariuana, ma faasala ai loa o ia i le faasalaga nofovaavaaia e 5 tausaga i lalo o tuutuuga e ao ona ia usita’i i ai.

 

O nisi o ia tuutuuga e aofia ai lona tuliina o masina e 20 i le Toese i Tafuna.

 

O le mataupu e pei ona ta’usala ai le ua molia na afua mai i le faalavelave lea na tula’i mai i le Maketi i Fagatogo, ina ua logo e se alii fai faatoaga le Ofisa o Leoleo, faasaga i se ali’i o loo ia tulei ma faatau atu fualaau faasaina i isi tagata i le Maketi.

 

Na taunu’u Leoleo ma latou molimauina ai gaioiga a le ua molia o loo faia i le vaega e faatali ai pasi i le Maketi i Fagatogo, o lona faatau atu lea o fualaau faasaina i isi tagata. Ina ua pu’e faapagota e Leoleo le ua molia, na latou maua ai i totonu o se tama’i ato sa fusi i lona manava sikaleti mariuana e 12 ua uma ona taai.