Molia se tamaloa i le gaoi i ni fa’alavelave se lua
Pago Pago - AMERIKA SAMOA
E lua ni mataupu ua molia ai nei le alii o Hurry Magalsin, o le tasi na tupu ia Me 9, 2024 ae o leisi na tupu ia Me 22, 2024.
I le mataupu muamua, o lo’o molia ai Magalsin i le gaoi – o se vaega ‘C’ o solitulafono mama, lea e mafai ona fa’asala ai i le o’o atu i le fitu (7) tausaga i le falepuipui, po o se sala tupe e le silia ma le $5,000; po o fa’asalaga uma e lua.
E le gata i lea, o lo’o molia foi o ia i le fa’aleagaina o se masini, i lona tulaga e lua – o se vaega ‘A’ i solitulafono mama, e mafai ona fa’asala ai i le falepuipui i le le silia ma le tasi (1) tausaga, po o se sala tupe e le silia ma le $1,000; po o fa’asalaga uma e lua.
E $10,000 sa faatulagaina e tatalaina ai le ua molia, mai i le falepuipui, e fa’atali ai lona faamasinoga.
O lenei mataupu sa uluai lipotia e le Samoa News ia Aperila 2024, lea sa ta’ua ai le a’afia o Magalasin faatasi ma Lorenzo Sualoa ma Ieti So’osemea, i le gaoia o se taavale moa vao (lawn tractor), mai i se aiga i Nu’uuli.
E tusa ai ma fa’amaumauga a le malo, na fa’afeso’ota’I e le ana le fale sa osofaia, i leoleo, le gaoia o lana ta’avale moa vao ia Mati 29, 2024.
E tusa ai ma fa’amaumauga a le malo, i le aso 9 o Me, 2024, o lo’o ta’ua ai se su’esu’ega a leoleo i lenei mataupu, na aofia ai ma se fa’atalanoaga ma le e ana le taavale moa vao, lea sa ia fa’asinoina i leoleo ia ata o le nofoaga na tupu ai le fa’alavelave, faatasi ai se ata vitio o se tagata sa la’ei i ofu uliuli ma se’evae papa’e, o tuleia le taavale moa vao mai i le fale.
O le tau o le ta’avale moa vao, e $3,000.
Na mua’i lokaina e leoleo ia Sualoa, ona o lenei mataupu, ina ua fa’amaonia o ia i luga o le vitio a le faleoloa e i leisi itu auala o le fale na gaoia mai ai le moa vao. Lea na va’aia ai o ia o aveina le taavale moa vao, a’o toso e seisi taavale.
Sa maua uma e leoleo ia le moa vao faapea le taavale na tosoina, i le nofoaga na tupu ai le faalavelave, ma o latou aveina loa i lo latou ofisa e taofia ai. O se taimi mulimuli ane, na toe fa’afo’i ai le moa vao i le e ana. Ae lokaina Sualoa ma ia fa’amatalaina ai i leoleo lana vaega i le gaoia o le moa vao.
O se taimi mulimuli ane, o le aso lava na loka ai Sualoa, sa lokaina mai ai foi ma Magalasin, ina ua maua o ia e leoleo i le nofoaga sa faamautu ai. Ina ua aveina o ia i le ofisa a leoleo, sa fa’amaonia e Sualoa, o ia lea sa savali i tafatafa o le moa vao, e pei ona sa va’aia i le ata vitio. Ma o ia lea na fa’asinoina le mea e ave agai iai le moa vao.
Ae peitai, ina ua fa’atalanoaina e leoleo ia Magalasin, sa ia ta’ua lona le iloa o se mea e tasi e uiga i lenei mataupu.
Ma e tusa ai ma fa’amaumauga a le malo i le aso 9 o Me, 2024, o lo’o ta’ua ai e faapea, o le aso 30 o Mati, 2024, sa va’aia ai e leoleo ia le alii o So’osemea, lea e to’atolu ai i latou ua molia i lenei mataupu, o lo’o savali atu agai i se fale’aiga. Na taofia o ia e leoleo ma fesiligia o ia e latou te o i le ofisa a leoleo.
Ma o iina na ioe ai So’osemea e fai sana faamatalaga e uiga i lenei mataupu. Ma sa faamatalaina e So’osemea, o la’ua ma Hurry sa faia le fuafuaga e gaoia le moa vao, ma sa ia faamatalaina foi vaega uma o le la fuafuaga.
E tusa ai ma fa’amaumauga a le malo, na toe tu’ua e So’osemea ia le ofisa leoleo i Tafuna, i lona lava loto faitalia, ae o Magalasin ma Sualoa sa lokaina.
O lo’o ta’ua foi i fa’amaumauga a le malo mai i le aso 9 o Me e faapea, o Magalasin sa fanau mai i Vietnam ae o lo’o fa’amautu i Nu’uuli, ae o So’osemea o se sitiseni a Amerika ae o Sualoa, o se tagatanu’u a le Iunaite Setete.
I le mataupu lona lua, lea ua molia ai Magalasin, ia Me 22, 2024, o lo’o ta’ua ai e faapea, o Magalasin o se sitiseni a Filipaina.
Ma e $10,000 le tupe sa faatulagaina e tatalaina ai o ia i tua mai i lea mataupu, e fa’atali ai ona fa’amasinoga.
O le mataupu lona lua o lo’o molia ai Magalasin i le Faomea i lona tulaga e lua – o se vaega ‘C’ i solitulafono mamafa, e mafai ona fa’asala ai i le falepuipui, i le le silia ma le fitu (7) tausaga po o se sala tupe e le silia ma le $5,000; po o fa’asalaga uma e lua.
Atoa ai ma le moliaga o le Faaleagaina o Meatotino, i lona tulaga e lua – o se vaega ‘A’ i solitulafono mama, e mafai ona nofosala ai i le falepuipui mo le o’o atu i le tausaga (1), po o se sala tupe e $1,000; po o faasalaga uma e lua.
E tusa ai ma fa’amaumauga a le malo i lea mataupu, o le aso 16 o Aperila 2024, o lo’o masalomia ai le gaoia e Magalasin o ni oloa mai i le faleoloa ma le fale ta lavalava a le TMJ i Pavaiai.
Sa tu’uina e le pule o le faleoloa ia se ata vitio i leoleo, o lo’o va’aia ai se tagata o savalivali solo i totonu o le faleoloa, ona ia fa’aaogaina lea o se a’upega e tata’e ai le faitoto’a tioata.
Na ta’ua e le pule o le faoloa, ina ua ia matamata i le ata vitio sa ia va’aia ai lenei alii o lo’o ia masalomia, e nofo i Nu’uuli ma sa ia va’aia foi i lea alii i le latou faleoloa i Nu’uuli.
E le o ma’oti mai i fa’amaumauga a le malo po o ai sa fa’amaonia o Magalasin lea o lo’o masalomia i lenei mataupu, ma pe na faapefea ma po o anafea foi na ave faapagota ai o ia.
Ae o lo’o ta’ua ai le tula’i mai o le gaoia o le faleoloa, ina ua mae’a ona gaoia le taavale moa vao. E le o manino foi pe na faapefea ona tatala i tua ia Magalasin mai i le falepuipui, ina ua lokaina o ia ona o tu’uaiga i le gaoia o le moa vao.