Pago Pago - AMERIKA SAMOA

O le taeao o le aso 9 o Me, 2024, na fa’afeso’ota’i ai e se tamaitai loto mafatia ia le ofisa a leoleo i Tafuna, mo se fesoasoani i si ana uo i Fagaima ona o se faafitauli ua tula’i mai i le va a lana uo ma si ona to’alua.  Sa faapea foi ona lafo mai e le tamaitai na valaau i le ofisa a leoleo, ia le ata o lana uo (tina o le aiga), i leoleo.

Sa faapea loa ona agai atu leoleo i le fale a sia ulugalii i Fagaima ma maua atu ai le tama o le aiga, o faia se malologa i totonu o le potu malolo ma nai ona alo tamaitai se to’alua.  Ae o le tina o le aiga, e pei ona fa’ailoa mai i leoleo, o lo’o i totonu o le potu moe ua le mafai ona tu i luga ona o le tiga o lona ulu.

(O le a le lomia suafa o i latou o lo’o a’afia i lenei mataupu, ona o le puipuiga o fanau iti.)

Na fa’afeso’ota’ia e leoleo ia le vaega a le EMS ina ia faatali mai i le ofisa a leoleo i Tafuna, ina ua molimauina le fula toe uno’oa o le mata taumatau a le tina faapea ma le fula o lo’o laugutu ma nisi o vaega o ona foliga ua ma’osia.

O le taeao lava foi lea na lokaina ai loa le tamaloa ma aveina atu i le ofisa a leoleo, ma sa aveina atu ai foi ma le tina o le aiga ma si a la fanau.  Ae e le i aveina atu le tina i le falemai, sa ia talosagaina leoleo pe mafai ona ave lana fanau i si ana uo, se’i toe fo’i mai mai le falemai.

Na mafai ona su’esu’eina e leoleo ia le alo a lenei ulugalii, e 9 tausaga, i luma o lona tina.  Ma sa ta’ua e le teineititi 9 tausaga, e na te le i va’ai o fasi e lona tama ia lona tina ae sa faatonuina o ia e lona tama, e avatu se aisa.

O lea afiafi na aveina atu ai le tina o le aiga i le falemai mo le togafitiga o ona manu’a.

Ae i le taunu’u o leoleo ma le ua molia i le ofisa a leoleo sa faia ai loa su’esu’ega a leoleo i le mafuaaga o le faalavelave ma sa faamatalaina e le ua molia, a’o la iai i le umukuka ma lona to’alua, na tatagi le telefoni a lona to’alua (facebook messenger).  Ina ua tali e lona to’alua lana telefoni, sa ia lagonaina le leo o se tama o ata mai ai, ae tago lona to’alua toe tape le telefoni.

O se taimi mulimuli ane, na alu ai le tina o le aiga i le faleoloa, ae ua liliu le ua molia, e inu ni ana apa pia se lua.

Ina ua toe fo’i atu le tina mai i le faleoloa, sa faamatala e le ua molia, lona toe fesiligia o lona to’alua po o ai lea na valaau atu.  Ma na tali atu lona to’alua, o se tama sa masani ona o la talanoa, ae ese ai leisi tama lea na valaau muamua atu foi.

Sa faamatala e le ua molia, na mana’o e fa’ato’ese atu lona to’alua ae peitai, na atili ai ona fa’ateteleina le la tauga’upu.  Ma ina ua sauni lona to’alua e alu ese atu ma le fale, sa ia tago atu i le u’una’i lona to’alua aga’i i le pa sima o le fale (wall) ae na tago mai lona to’alua ma tatu’i ona foliga.

O le afiafi lava lea, ina ua maua e le ofisa a leoleo se valaau mai i le tina o le aiga, ua mae’a togafitiga a le falemai, sa aga’i atu loa leoleo ma auina mai o ia i lo latou ofisa, e faatalitali ai le aufaigaluega a le CPS (Child Protective Services).

I le mae’a ai o su’esu’ega a le vaega a le CPS na fa’ailoa atu ai loa i le ofisa a leoleo, o le a latou malaga faatasi ma le tina e piki mail ana fanau ma momoli latou i lo latou fale i Fagaima.

Ae i le faatalanoaga a le ofisa a leoleo ma le tina, sa ia ta’ua ai le le fiafia o lona toalua ina ua valaau atu se alii i lana ‘Facebook Messenger’.  Sa ta’ua e le tina ia lona le fia mana’o e tali le telefoni ona e le’i iloa po o ai.

Sa faamatala foi e le tina, sa le fia mana’o e tau’upu ma lona toalua ma o le mea lea na ia fai atu iai e la te talanoa i le taeao e soso’o ai, ona ua fa’asuaava le tama o le aiga.  Ae peitai, a’o la sauni e fai se malologa i lea afiafi, na tago atu ai lona to’alua ma u’u mai lona gutu ona o lo’o fia talanoa e uiga i le tagata na valaau atu.

Na ta’ua e le tina lona tu i luga ma alu atu i le faleta’ele ma loka mai le faitoto’a ae na alu atu lona to’alua ma tu’itu’i atu le faitoto’a.  O lona tatalaina mai o le faitoto’a, na oso atu ai lona to’alua ma titina lona ua.

Sa ta’ua foi e le tina ia lona le manino i mea uma na tutupu i lea afiafi, se’ia ona toe te’i mai i le taeao na soso’o ai ma ia iloa ai ua uno’oa lona mata ma le fufula o na foliga.

Ua molia nei le tama o le aiga i moliaga e lua;

Faitauga 1:  Faatupu Vevesi i totonu o aiga – o se vaega ‘C’ o solitulafono mama, e mafai ona nofosala ai se tasi i le o’o atu i aso e sefululima (15), po o se sala tupe e $300; po o faasalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona nofosala ai i le falepuipui, i le o’o atu i le tausaga e tasi (1); po o se sala tupe e $1,000; po o faasalaga uma e lua.

E $5000 le vaegatupe na faatulagaina mo le tatalaina o le ua molia, e faatalitali ai lona faamasinoga.