Pago Pago - AMERIKA SAMOA

Ua molia nei se tamaloa e 23 tausaga, i lona fa’ao’olima i lona to’alua, i se fa’alavelave na tula’i mai i le afiafi o le aso 30 o Me, 2024.

E lua moliaga ua tu’ua’ia ai lenei alii, e aofia ai;

Faitauga 1:  Faatupu vevesi i le aiga – o se vaega ‘B’ o solitulafono mama, e mafai ona nofosala ai i le falepuipui i le o’o atu i le ono (6) masina, po o se sala tupe i lva o le $150 ma le $500; po o faasalaga uma e lua.

Faitauga 2:  Fa’ao’olima i lona tulaga e lua – o se vaega ‘C’ o solitulafono mamafa, e mafai ona nofosala ai i le falepuipui, i le le silia ma le fitu (7) tausaga, po o se sala tupe e i le va o le $150 ma le $5000; po o faasalaga uma e lua.

E tusa ai ma fa’amaumauga a le malo, na o’o atu se tina i le Ofisa a Leoleo i Tafuna i le afiafi o le aso 30 o Me, ma fa’aulu sana lipoti e faasaga i lona toalua, i le sauaina o ia i lena taeao, ina ua manava atu mai i lana galuega.

Sa ta’ua e le tina lona va’aia le le fiafia o lona to’alua i lona le ‘auai i ona manatu fa’aalia faapea lona tali ‘upu mai ia te ia (tamaloa.  Na fa’amatala e le tina le talanoa atu o lona to’alua e uiga i se alii na o la feola faatasi ifo ma sa fa’ailoa atu iai e le tina, le leai o se mea o tupu i lo la va ma lea alii.

Ae peitai, sa ta’ua e le tina le tosoina o ia e lona toalua, mai i le la potu, aga’i i totonu o le la faleta’ele, loka le faitoto’a ma amata ona titina lona lua, se’ia o’o ina matapogia ai.  Ina ua toe te’i ifo i luga, sa ia va’aia le u’uina o ia e lona to’alua aga’i i le sima o le fale (wall), ona tago lea ua fa’apa’u o ia i lalo ma tau ai lona muaulu i le foloa o le fale.

Na ta’ua e le tina le savali i fafo o lona to’alua ma loka le faitoto’a o le faleta’ele faapea ma fa’amalama ina ia le lagona e seisi le mea o tupu.  

Sa faamatala foi e le tina le toe fo’i atu o lona to’alua i totonu o le faleta’ele ma toe amata ona titina lona ua ma fai atu, e mafai ona ia (tamaloa) fasiotia o ia (fafine) pe a mana’o ai.  Ae na ‘ai’oi iai le tina e tu’u loa.

Sa molimauina e leoleo ia manu’a i le ua ma le tuaua o le tina.

O le afiafi o le aso lava lea na o’o atu ai le tamaloa i le Ofisa a Leoleo ma sa fautuaina ai o ia e tusa ai ma ona aia tatau fa’aletulafono.

I se faamatalaga a le ua molia i leoleo, o le fa’alavelave na tupu, o se mataupu lea i le va o ia ma lona to’alua, ma e na te le fia faamatalaina i leoleo.

E le’i te’ena e le ua molia ia le molimau a lona to’alua e faasaga ia te ia, se’ia vagana lona tago i le fa’ata’ita’i i leoleo ana taga sa faia i lona to’alua, ma lona u’una’ia esea o lona to’alua.

E $15,000 le vaegatupe sa fa’atonuina le ua molia e totogia, ina ia mafai ona tatalaina ai o ia mai i le falepuipui, e fa’atali ai lona faamasinoga.