Ads by Google Ads by Google

Molia se Tama i le ave ta’avale ‘ona a o se’i lona laisene


[ata: SN]
ausage@samoanews.com

Pago Pago, AMERIKA SAMOA - 

 

O le vaiaso na te’a nei na faila ai e le malo moliaga mamafa faasaga i le Tama matua lea na maua o loo ia faafoeina se ta’avale ma tagofia le ‘ava malosi, aemaise ai o lona faafoeina lea o se ta’avale ae ua mae’a ona se’i e le Faamasinoga lona laisene ave ta’avale, e le mafai ona ia toe faafoeina se ta’avale i le olaga atoa.

 

O moliaga faaopoopo ua faila e le malo fa’asaga i le susuga a Uatime Leilua e aofia ai le ave ta’avale a o se’i lona laisene, o le vaega D lea o solitulafono mamafa, lea e mafai ona fa’asala ai se tasi i le Toese mo le umi e oo atu i le 5 tausaga, pe fa’asala foi i le salatupe e oo atu i le $5,000, pe fa’asala fo’i i faasalaga uma ia e 2, faapea ai ma moliaga mama e 2 o le ave ta’avale ‘ona atoa ai ma le ave ta’avale faatamala.

 

O le aso Gafua o le vaiaso na te’a nei na tula’i ai Leilua i luma o le Fa’amasinoga Faaitumalo ina ua mae’a ona taofia faapagota o ia e Leoleo i le faaiuga o le vaiaso, ma faatulaga ai loa e le Fa’amasinoga le tupe e $2,000 e tatala ai o ia i tua. 

 

Na toe faatulaga le isi iloiloga a Leiloa i le aso Lulu o le vaiaso lava na te’a nei mo le failaina e le malo o moliaga faaopoopo faasaga i le ua molia, ma siitia ai loa e le Fa’amasinoga le tupe e tatala ai le ua molia i le aofaiga e $6,000.

 

O le aso Tofi o le vaiaso nei lea ua fa’atulaga e faia ai le ulua’i iloiloga o lenei mataupu.

 

TAGI A LE MALO

 

E pei ona taua e le malo i le latou tagi e fa’apea, pe tusa o le itula e 6:30 i le afiafi o le aso 20 o Iuni 2020, na taofi ai e se ali’i Leoleo sa tiute i luga o le alatele a le malo i Tafuna se ta’avale pikiapu na laasia luma o le Faleoloa o le Cost-U-Less ma le fa’amoemoe e aga’i atu i le itu i Sisifo, ina ua vaaia e le Leoleo ni fanau laiti o loo tutu i totonu o le ta’avale e aunoa ma le faia o ni a latou fusipa’u.

 

Na aga’i le ta’avale pikiapu lea i le auala i Ottoville ma faatonu ai loa e le Leoleo le ave ta’avale e taofi le ta’avale. 

 

O totonu o le ta’avale sa i ai se Tama matua sa ia faafoeina le ta’avale, o lona suafa o Uatime Leilua, o ia lea ua molia i lenei mataupu, ma se Tina ma sana fanau laiti.

 

A o talanoa atu le ali’i Leoleo ia Leilua ma faailoa i ai le mafua’aga ua taofi ai lana ta’avale, na faalogoina e le ali’i Leoleo le malosi o le manogi ‘ava malosi o loo sau mai totonu o le ta’avale. E oo fo’i i le taimi e talanoa atu ai Leilua i le Leoleo, na lagona e le Leoleo le nanamu ‘ava malosi, faapea ai ma le mumu o totonu o fofoga o Leilua, o se vaega lea e ono masalomia ai lona tagofia o le ‘ava malosi.

 

Na faailoa e le ali’i Leoleo ia Leilua e fa’apea, na mafua ona taofi lana ta’avale ina ua ia vaaia fanau laiti o loo tutu i totonu o le ta’avale e aunoa ma le faia o ni a latou fusipa’u e puipuia ai lo latou saogalemu. 

 

Ina ua fesiligia e le Leoleo ia Leilua i le mafua’aga ua le faia ai ni fusipa’u a fanau laiti sa i totonu o le ta’avale, na taua ai e le ua molia e fa’apea, o ia na aga’i mai ma le faamoemoe e alu i le fale, peita’i na ia faia se galuega alofa i le Tina ma lana fanau sa savavali mai i luga o le alatele, e ala i lona pikiina mai o i latou ma le faamoemoe e momoli i le latou fale.

 

Na faamalie Leilua i le Leoleo e tusa ai o lona faatamala i le malu puipuia o le saogalemu o fanau laiti. Sa ia taua atili fo’i i le Leoleo lona manatu sa i ai, e le taofia lana ta’avale i luga o le alatele e se Leoleo a o aga’i atu e momoli le Tina ma lana fanau i lo latou fale. 

 

Na fesili Leoleo ia Leilua pe sa ia tagofia le ‘ava malosi, ae na tali le ua molia, e na o le 2 lava ana apa pia o le Busch Ice na inu i le fale o lana uo, a o le i aga’i mai i luga o le alatele. 

 

Na faailoa e le ali’i Leoleo ia Leilua le tatau lea ona faia sana suega ina ia mautinoa ai le malosi o le ‘ava o lo o i totonu o lona tino. O le suega sa faia e aofia ai le savali i luga o le alatele mo se mamao faatulagaina; o le suega e aofia ai le savali i le vae e tasi; ma le suega e aofia le savali ma toe liliu i le itu na aga’i mai ai e aunoa ma se avanoa e tu ai.

 

Na usita’i Leilua ma ia faia loa suega uma ia e 3 e pei ona faatonuina ai o ia e le Leoleo. O le faaiuga o ia suega uma e 3, e lei pasia e Leilua suega uma ia e tolu. E le gata na tau pau o ia a o savali i le mamao sa faatulagaina, ae le i mafai fo’i e ia ona faatino le suega lea e savali ai i le vae e tasi.

 

Na faatonuina fo’i e le Leoleo ia Leilua e feula le masini lea e fua ai le malosi o le ‘ava i totonu o le tino o le tagata. Ina ua fa’atino e le ua molia lea tulaga, na manino ai, e tusa ma le .125% le malosi o le ‘ava malosi sa i totonu o lona tino, ma ua maualuga tele atu nai lo le malosi faatulagaina.

 

I le mae’a ai ona fa’atino e Leilua o suega uma e 3 e pei ona faatonuina ai o ia e le Leoleo, faapea ai ma le feulaina o le masini, na faia ai loa le faaiuga e taofia o ia i lalo o le vaavaaiga a Leoleo, ina ua faamaonia lona faafoe o le ta’avale a o ia tagofia le ‘ava malosi. 

 

Ina ua fesiligia e Leoleo le laisene ave ta’avale a le ua molia, sa ia faailoa ai i Leoleo, o lona laisene o loo galo i le fale. Peita’i o suesuega sa faia e Leoleo na faamaonia ai, o lo o se’i e le Fa’amasinoga le laisene ave ta’avale a le ua molia mo le olaga atoa, e le mafai fo’i ona ia toe faafoeina se ta’avale i luga o auala tele a le malo i Amerika Samoa.

 

E tusa ai ma faamaumauga a le Fa’amasinoga, o le tausaga e 2016 na ta’usala ai Leilua i le solitulafono o le ave ta’avale ma tagofia le ‘ava malosi. O se tasi o tuutuuga sa tuuina atu e le Faamasinoga ia Leilua i lea tausaga, o le faasa lea ona ia toe faafoeina se ta’avale i totonu o Amerika Samoa mo le olaga atoa, e mafua mai ina ua fa’atolu ona tausala o ia i le solitulafono o le ave ta’avale ma tagofia le ‘ava malosi.

 

Sa fautuaina fo’i e le Fa’amasinoga ia Leilua i le taimi lea, afai ae maua o ia o loo ia faafoeina se ta’avale ao se’i lona laisene, e ono mafai ona molia o ia i le solitulafono mamafa o le ave ta’avale ae o loo se’i lona laisene. 

 

Afai ae faamaonia e le Fa’amasinoga lana solitulafono lea, e ono mafai ona faasala o ia i le Toese mo le umi e oo atu i le 5 tausaga, pe faasala i le salatupe e oo atu i le $5,000, ae faamalosia ai lona tuliina o le umi e 90 aso i totonu o le Toese, e pei ona faatulaga mai e le Tulafono.