Ads by Google Ads by Google

Molia se ali’i i le umia faasolitulafono o fualaau fa’asaina

ausage@samoanews.com

E 35 tausaga o se alii mai Tafuna na pu’e faapagota e Leoleo i le lua vaiaso talu ai, ona o tu’uaiga i lona umia faasolitulafono lea o vaega o fualaau fa’asaina ma le faamoemoe e tulei ma faatau atu i isi tagata.

 

O le vaiaso na te’a nei na tula’i ai Anetele’a Iosua i luma o le Fa’amasinoga Faaitumalo mo le ulua’i taimi. E 4 moliaga ua tu’uaia ai o ia e le malo, o ia moliaga e aofia ai lona umia faasolitulafono o vaega o le pauta faasaina o le aisa; umia faasolitulafono o le aisa ma le faamoemoe e tulei ma faatau atu i isi tagata; ua faasolitulafono o vaega o le laau faasaina o le mariuana; atoa ai ma le umia faasolitulafono o mariuana ma le faamoemoe e tulei ma faatau atu i isi tagata.

 

E $30,000 le vaega tupe lea ua faatulaga e le afiogai le ali’i Faamasino ia Elvis P. Patea e totogi ona faatoa mafai lea ona tatala Iosua i tua mai le toese i Tafuna.

 

O le aso Tofi o le vaiaso nei lea ua faatulaga e faia ai le ulua’i iloiloga o lenei mataupu i luma o le afioga i le alii Faamasino ia Patea.

 

TAGI A LE MALO

 

E pei ona taua e le malo i le latou tagi e fa’apea, o le po o le aso 5 o Fepuari na taofi ai e Leoleo se taavale i luga o le alatele i Tafuna ina ua maua o alu saoasaoa i luga o le alatele a le malo.

 

E to’atolu Leoleo na tiute i le luga o le vaega lea o le alatele i le po lea i le taimi na latou taofia ai le pikiapu na vaaia le ova o le saoasaoa mai maila faatulafono i luga o le alatele. Na siaki e Leoleo le ta’avale ma iloa ai, e to’afa alii o lo o i ai i totonu, o i latou nei e toafa e aofia ai tagata matutua e to’atolu, lea sa aofia ai Anetele’a Iosua, faapea ai ma se alii talavou i lalo o le tulafono e 17 tausaga le matua.

 

Ao talanoa atu Leoleo i le ave taavale e faailoa i ai le mafua’aga ua taofi ai lana ta’avale, sa vaaia e Leoleo se tasi o le pasese, o ia lea o Iosua, o loo minoi solo ona lima e foliga mai o lo o tau aapa i le taga o lona ofuvae o loo laei.

 

Ao talanoa Leoleo i le ave ta’avale, ae o le taimi fo’i lea na aga’i atu ai Leoleo Suesue mai le Vaega o Fualaau Faasaina faatasi ai ma le latou Ta’ifau ia Lucy ma siaki faataamilo vaega uma o le ta’avale mo le sailia o fualaau fa’asaina. A o taamilo Leoleo Suesue ma le Ta’ifau ia Lucy i le tino o le ta’avale, na faafuase’i ona faia e le Ta’ifau o Lucy se faailoilo e ta’u atu ai i Leoleo, o lo o i ai fualaau faasaina i totonu o le ta’avale.

 

O le taimi lea na faatonu ai loa e Leoleo alii e to’afa sa i totonu o le ta’avale e aga’i uma i fafo, ma faanonofo ai loa i latou i luma o se pa maa e latalata ane i le vaega sa paka ai le latou ta’avale, ae faatino e Leoleo le galuega mo le sailia lea o totonu o le ta’avale mo ni fualaau fa’asaina faapea ai ma a’upega.

 

A o faatino galuega a Leoleo e saili ai totonu o le ta’avale, e to’alua isi Leoleo na tofia e vaavaaia alii e to’afa i le vaega na nonofo ai i latou. Ina ua tutula’i alii e to’afa ma sauni e aga’i atu i totonu o le ta’avale a Leoleo, mo le faamoemoe e momoli i latou aga’i i le Ofisa o Leoleo i Tafuna, na maua e Leoleo pepa iila laiti e 6 ia e faaaoga e utu ai fualaau fa’asaina i le vaega tonu sa saofa’i ai Iosua.

 

O se tasi o pepa iila sa i ai vaega o le pauta pa’epa’e, lea na faia i ai se suega ma faamaonia ai, o vaega ia o le pauta faasaina o le aisa.

 

Na maua e Leoleo i lalo o le nofoa pito i tua o le ta’avale se teutusi lanu samasama o lo o i ai pepa iila feololo se tolu. I totonu o ia pepa iila o lo o i ai vaega o fualaau fa’asaina o le aisa faapea ai ma le mariuana.

 

Ina ua mae’a ona faailoa ia Iosua ona aia tatau faaletulafono, sa ia malie ai loa e talanoa ma Leoleo e tusa ai o fualaau faasaina sa maua i totonu o le ta’avale.

 

Na taua e Iosua i Leoleo, o le teutusi samasama lea sa maua i totonu o le ta’avale i tua o le nofoa o le pasese lea sa i ai fualaau faasaina, o le teutusi lea e patino lava ia te ia. Sa ia taua e fa’apea, sa ia faaaluina se vaega tupe tele mai tupe na maua i lana faatoaga e faatau mai ai fualaau faasaina o le aisa ma le mariuana mai se alii i Vaitogi, ma le faamoemoe e maua ai se tupe e tau amata ai lana tama’i pisinisi o loo fuafua e tatala.

 

O lona faamoemoe atoa sa i ai, ia maua se auala e televave ai ona ia maua se tupe e fesoasoani ai i le tau amataina o lana pisinisi mo lona aiga. O le tele o tupe na te maua mai i lana faatoaga, e alu i le tausiga o lona aiga, ae o se vaega tupe itiiti sa ia faaputu ma le faamoemoe e faatau mai ai ana fualaau faasaina e amata ai lana pisinisi.

 

Na musu Iosua e tuuina atu sana faamtalaga tusitusia i Leoleo e tusa ai o fualaau faasaina sa maua ia te ia, ae sa ia mana’o e maua le avanoa e talanoa ai lana loia.

 

Na maua e Leoleo e fesiligia ai e Leoleo alii e to’atolu sa malaga faatasi ma Iosua i le ta’avale. Na taua e le ave ta’avale, o ia fo’i lea e ana le ta’avale, na faateia o ia ina ua faailoa atu e Leoleo fualaau faasaina sa maua i totonu o lana ta’avale, peita’i o loo ia mautinoa, na te le tagofia fualaau fa’asaina.

 

Na taua e le ave ta’avale i Leoleo e fa’apea, o latou ma le alii talavou e 17 tausaga le matua na aga’i i Tafuna e piki mai lona tuafafine ma lona to’alua sa o i le talanoaga a le latou aiga. Ina ua latou oo mai i luga o se faleoloa i Puapua, ae taofi atu ai e Iosua le latou ta’avale, ma latou tietie ai loa i Tafuna. Na te iloa lelei Iosua mai le tele o tausaga ua mavae, o ia foi o se uo ia te ia.

 

Ae na faateia o ina ua taofi e Leoleo le latou taavale ma maua ai fualaau faasaina.

 

Na taua e le isi ali’i lea sa i totonu ole ta’avale, ina ua taofi e Leoleo le taavale, na tei ina ua tuu atu e Iosua ia te ia se teutusi samasama. Sa ia talia le teutusi ona ia tuu atu lea i le alii talavou e 17 tausaga le matua, peita’i sa tete’e le alii talavou, o lea na ia tago ai loa ua afifi le teutusi samasama i lona ofu, ae ina ua faatonu i latou e Leoleo e o i fafo ma le ta’avale, sa ia tago ai loa ma tiai le teutusi i tua o le pa ma’a i le vaega na su’e ai e Leoleo le ta’avale.

 

E to’alua Leoleo Suesue na toe agai ma le alii lea i le nofoaga na su’e ai le ta’avale mo le toe sailia mai o le teutusi sa tia’i i tua o le pa ma’a, lea na maua e Leoleo ma iloa ai, o lo o i ai se vaega tele o fualaau fa’asaina i totonu o lea teutusi.

 

Ina ua toe fesiligia e Leoleo ia Iosua e faatatau i le teutusi samasama lea, sa ia ioeina ai, o ia e ana le teutusi lea.

 

E nao Iosua ua molia e le malo i lenei mataupu, ae o alii e to’atolu sa latou i ai i le ta’avale e aofia ai alii matutua e to’alua ma le alii talavou i lalo o le tulafono, na toe tatala i latou i tua.