Pago Pago, AMERIKA SAMOA

 E 20 tausaga le matua o se ali’i mai Samoa o lo o aumau i Malaeloa ua taofia nei i le Toese i Tafuna, ona o tuuaiga i lona faia lea o uiga mataga faafeusuaiga ma se tama’ita’i e 15 tausaga le matua mai Leone. 

O le mata’ala o le Tina o le tama’ita’i na aafia i lenei mataupu, na mafua ai loa ona tofu atu lenei mataupu i le Ofisa o Leoleo mo suesuega, ma i’u ina molia lenei alii talavou i le Faamasinoga.

O le vaiaso nei na tula’i ai le susuga a Senio Tovia i luma o le Fa’amasinoga Faaitumalo, ma poloaina ai loa e le afioga i le ali’i Fa’amasino Sili lagolago le tumau ia Elvis P. Patea le taofia o ia i le Toese i Tafuna e aunoa ma se tupe e tatala ai i tua.

Ua molia nei e le malo ia Tovia i moliaga e 2 o le faiaiga ma se tama’ita’i e i lalo o le 16 tausaga le matua, faapea ai ma le moliaga e tasi o le faia o amioga faasotoma, o le vaega B lea o solitulafono mamafa, lea e mafai ona faasala ai se tasi i le Toese mai le 5 e oo atu i le 15 tausaga le umi.

TAGI A LE MALO

E pei ona taua e le malo i le latou tagi e fa’apea, pe tusa o le itula e 9:27 i le po o Iulai 10, 2020, na talosagaina ai e se Tina e 43 tausaga le matua o lona soifua se fesoasoani a le Ofisa o Leoleo i Leone, ona o lana tama teine e fai ma sola ese mai le fale a lona tuagane o loo nofo ai i le po, ae le iloa poo fea e sola aga’i i ai.

Na talosaga le Tina i Leoleo mo se avanoa latou te fesiligia ai lana tama teine, pe aisea e sola ese mai ai i le fale i le po, ae poo i ai fo’i se mafua’aga e ala ai ona sola ese e aunoa ma se faatanaga mai lona Tina poo lona uncle. 

E to’atele Leoleo na tali atu i le valaau, ma maua ai loa le avanoa latou te fesiligia ai le Tina o le tamaitai o loo aafia e uiga i lenei mataupu, faapea ai fo’i ma le manaoga o le Tina ina ia saili se auala e foia ai le tula’i soo mai o lenei fa’afitauli i lana tama teine.

O le mae’a ai o le talanoaga a Leoleo ma le Tina, na talosagaina e Leoleo le Tina ina ia la aga’i atu ma lana tama teine i le Ofisa o Leoleo mo se isi a latou feiloaiga, ma taumafai ai e saili le mafua’aga o le fa’afitauli. 

Na maua le avanoa e fesiligia ai e Leoleo le tamaitai e tusa ai o le faafitauli o loo tula’i mai i le latou aiga, i lona sola ese lea i le leva o le po e aunoa ma se faatanaga. Sa le i mana’o le tamaitai e talanoa i Leoleo, ae ina ua fesiligia o ia e Leoleo poo i ai sana uo o loo la mafuta i le taimi nei, na tali ai loa le tamaitai i Leoleo, “Ioe, o lo o i ai lana uo tama e igoa ia Senio Tovia mai Malaeloa, e 20 tausaga lona matua, ma ua tusa ma le 9 masina le umi o le la faigauo”.

O le faamatalaga lea a le tamaitai na tuuina atu i Leoleo na mafua ai loa ona fesiligia o ia e Leoleo e faatatau i le la mafutaga ma Tovia, ae o a fo’i mea sa tutupu i le 9 masina o le la mafutaga.

Na taua e le tamaitai i Leoleo e faapea, o le la mafutaga ma Tovia na amata mai i le masina o Oketopa 2019 ina ua la masani i luga o le Facebook, ona sosoo ai loa lea o le talanoa i luga o le telefoni, ma fa’aauau atu ai lava seia oo ina la feiloa’i ma fa’atino loa gaioiga o le alofa moni o le isi i le tasi.

E pei ona taua e le tamaitai na aafia e faapea, e 4 masina talu ona fai le la faigauo ma Tovia, ae tupu loa le faalavelave muamua ina ua la feusua’i ma la momoe i le fale o Tovia i Malaeloa. O le ulua’i taimi fo’i lea ua ia oo atu ai i le tulaga tau feusuaiga ma se ali’i.

Na taua e le tamaitai na aafia i Leoleo e faapea, pe tua o se taimi o le masina o Tesema o le tausaga na te’a nei, na faia ai se faatasiga a le latou Ekalesia. Ina ua mae’a lea faatasiga, na aga’i atu ai loa i le Fale Faatali pasi e faatali se pasi e alu ai i le fale. A o tietie i le pasi, na faateia o ia ina ua tu le pasi i se tasi o vaega o le auala, ma ia vaaia ai Tovia ua oso atu i luga o le pasi, ma savali sa’o atu lava ma saofa’i i le nofoa o loo nofo ai, ona la nonofo to’alua ai loa lea i le nofoa.

Sa la talanoa ma Tovia e faatatau i le la faigauo ma faasolo atu ai lava a laua talanoaga i isi tulaga o le olaga, seia oo ina talosaga atu Tovia ia te ia mo se avanoa la te fetaui ai na o i laua i se nofoaga lelei ma talafeagai.

O le aso 1 o Fepuari, 2020, o le ulua’i taimi lea na taua e le tamaitai na aafia i Leoleo na la feusua’i ai ma Tovia. Talu mai masina e 9 o le la faigauo, pe tusa ua fa’a 7 i le fa’a 8 ona la momoe ma la feusua’i ma Tovia.

Na manatua e le tamaitai na aafia se tasi o po na sola ese ai mai le latou fale, ma aga’i atu i le nofoaga o loo faatali mai ai Tovia. Na la o i le fale o Tovia i Malaeloa ma ia manatu ai loa e fai sina malologa puupuu i luga o le moega. A o taoto i luga o le moega, sa ia faalogoina le taoto atu o Tovia i ona tafatafa, ma i’u ai loa ina fa’atino le alofa i lo la va. Sa ia taua fo’i i Leoleo, o taimi uma lava la te feusua’i ai ma Tovia, e malie ai lava lona loto e fa’atino e lana uo gaioiga uma ia te ia.

Na manatua fo’i e le tamaitai na aafia se tasi o po ina ua mae’a ona faia a laua meaaoga ma lana uo, na la aga’i atu ai loa i luma o le alatele ae la fetaui ai ma Tovia. Na mana’o Tovia la te o i tua i le togavao ma faatino ai fo’i iina le isi gaioiga o le alofa e ala i feusuaiga.

O le mae’a ai ona faatalatalanoa e Leoleo o le tamaitai na aafia e tusa ai o lenei mataupu, na latou aga’i atu ai loa i le fale o Tovia e saili mai o ia mo sana faamatalaga e uiga i lenei mataupu. Na taunuu Leoleo i le fale ma latou fetaui ai ma se alii talavou i luma o le pa, ma faamaonia mai ai e lea ali’i i Leoleo, o ia tonu lea o Tovia o loo latou tau sailia.

Na talosaga Leoleo ia Tovia mo se avanoa latou te aga’i atu ai i le Ofisa o Leoleo i Leone mo le faatalatalanoaina o le mataupu e pei ona mana’omia ai o ia, lea fo’i na malie i ai le alii ua molia.

A o le i fesiligia e Leoleo ia Tovia e uiga i lenei mataupu, na muamua faitau i ai ona aia tatau faaletulafono, atoa ai ma le fautuaina o ia i soo se faamatalaga na te tuuina atu i Leoleo, e ono mafai lea ona faia faasaga ia te ia. Na faailoa e Tovia i Leoleo lona malamalama i ona aia tatau faaletulafono, ma ua ia sauni fo’i e tuuina atu lana faamatalaga e tusa ai o le mataupu na mafua ai ona latou sailia o ia.

Na faamaonia e Tovia i Leoleo faamatalaga uma a le tamaitai na aafia e uiga i lenei mataupu. Sa ia faamaonia e faapea, o le la mafutaga na amata mai i luga o le Facebook, ma faasolo atu ai lava i talanoaga i le telefoni, seia oo atu lava ina la feiloa’i i nofoaga eseese e masani ona la feiloa’i ai ma faatino ai loa feusuaiga e pei ona la malilie uma i ai.

Na taua atili e Tovia e faapea, o le tele o taimi la te feiloa’i ai, e muamua lava ona la talanoa ma faatulaga lelei se nofoaga la te fetaui ai, faatoa faatino ai loa lea o le isi laasaga o le feiloaiga.