Ads by Google Ads by Google

Molia se ali’i i lona umia o le fualaau fa’asaina o le mariuana

ausage@samoanews.com

O le vaiaso na te’a nei na pu’e faapagota ai e Leoleo fa’aaupegaina a le Vaega e Suesue Mataupu tau i Fualaau Fa’asaina a le Ofisa o Leoleo, se ali’i na masalomia lona umia fa’asolitulafono o vaega o le laau fa’asaina o le mariuana.

 

O le mae’a ai ona pu’e fa’apagota e Leoleo o le susuga a Uiluama’a Galea’i, na auina atu ai loa o ia e taofia i le Toese i Tafuna i le afiafi o le aso Faraile o le vaiaso na te’a nei, e fa’atali ai le taimi e tula’i ai i luma o le Fa’amasinoga.

 

O le taeao o le aso Gafua o le vaiaso nei na tula’i ai Galea’i i luma o le afioga i le Tama’ita’i Fa’amasino ia Gwen Tauiliili-Langkilde. O le tama’ita’i loia sili lagolago ia Christy Dunn na tula’i mo le malo, ae o le ali’i loia tua ia Marcellus Talaimalo Uiagalelei o lo o tula’i mo le ua molia.

 

O lo o molia Galea’i i le moliaga mamafa e tasi o lona umia faasolitulafono lea o vaega o le laau fa’asaina o le mariuana, o se solitulafono mamafa, e mafai ona fa’asala ai se tasi i le toese mo le umi e le itiiti ifo i le 5 tausaga ae le sili atu i le 10 tausaga, poo le fa’asala foi i le salatupe e le itiiti ifo i le $5,000 a le sili atu i le $20,000.

 

E $5,000 le vaega tupe lea ua tatala ai i tua Galea’i.

 

O le aso Faraile o le vaiaso fou lea ua fa’atulaga e faia ai le ulua’i iloiloga o lenei mataupu.

 

TAGI A LE MALO

 

E pei ona taua e le malo i le latou tagi e fa’apea, i le amataga o le tausaga nei, na tuuina atu ai e se molimau faatuatuaina i Leoleo ni fa’amatalaga e fa’atatau ia Galea’i, o lo o ia faatauina mai lona fale i Vaitogi. Na taua e le molimau faatuatuaina lea i Leoleo e fa’apea, la te masani lelei ma Galea’i, e tele fo’i taimi e masani ai ona la talanoa.

 

Na fa’aalia atili e le molimau i Leoleo e fa’apea, e i ai le aso na alu atu ai Galea’i ma talanoa atu ia te ia, pe mafai ona avea o ia ma tagata na te tuleia ana fualaau fa’asaina. Sa ia fai ia Galea’i, e tu’u atu sina taimi se’i mafaufau atili ai e uiga i lana mataupu, ona la toe talanoa ai loa lea.

 

E tusa ai ma le talanoaga a le molimau faatuatuaina ma Leoleo, na faailoa ai e le molimau e fa’apea, e tele taimi na ia molimauina ai le fa’aaoga e Galea’i o lona fale i Vaitogi e tulei ma fa’atau mai ai fualaau fa’asaina. Sa i ai fo’i taimi na ia vaai ai, o lo o tulei e lenei ali’i le pauta o le aisa faapea ai ma le laau fa’asaina o le mariuana.

 

E le gata na taua e le molimau le faaaoga e Galea’i o lona fale i Vaitogi e tulei mai ai fualaau fa’asaina, ae i ai fo’i isi taimi e fa’aaoga ai lana ta’avale pikiapu lanu mumu e kiliva ai fualaau fa’asaina i tagata e le maua le avanoa e oo atu ai i lona fale.

 

I le mae’a ai ona tauaaoina e Leoleo o faamatalaga uma nei mai le molimau, na latou galulue ai loa e fa’atulaga se auala e mafai ai ona faamaonia atili tu’uaiga faasaga i lenei ali’i, ma tapena ai loa e Leoleo le avanoa e alu ai le molimau e faatau mai fualaau fa’asaina mai ia Galea’i.

 

O le aso e pei ona tuupoina e faatino ai lea fuafuaga, na feiloa’i ai Leoleo ma le molimau faatuatuaina, ma tuu atu ai loa e Leoleo le $50 i le molimau e alu e fa’atau mai ai ni aisa mai ia Galea’i.

 

Na siaki uma e Leoleo le tino o le molimau ma faamaonia ai, e leai ma ni fualaau fa’asaina o ia te ia.

 

Na faafesoota’i e le molimau ia Galea’i ma faailoa i ai lana faatau e $50 o lo o fia fai mo aisa, ma aga’i atu ai loa le molimau i le fale o Galea’i i Vaitogi. Na aga’i atu le molimau i le fale o Galea’i, ae paka atu Leoleo i le isi itu mo le mataituina o gaioiga uma o le a faia.

 

Na vaaia e Leoleo le savali mai o Galea’i i fafo ma lona fale ma talanoa ma le molimau, e le’i umi ona talanoa ae vaaia le toe savali o Galea’i i totonu. E lei umi ona alu atu Galea’i i totonu ae vaaia loa le ulufale mai o se ali’i mai totonu o le fale o Galea’i, ma savali ua tuu atu se tama’i taga pepa iila o loo i ai le pauta o le aisa i le molimau, ae tu’u atu i ai e le molimau le $50.

 

O le mae’a ai ona tauaao e le molimau o le tama’i pepa iila laititi o lo o i ai vaega o le pauta faasaina o le aisa, na toe fo’i ai loa le molimau ma aga’i atu i le nofoaga ua faatulaga latou te feiloa’i ai ma Leoleo, ma ia tuuina atu ai i Leoleo le pepa iila sa tuuina atu e le ali’i lea na ulufafo mai i le fale o Galea’i i Vaitogi.

 

Na faia e Leoleo se suega i le pepa iila lea ma faamaonia ai, o vaega o le pauta faasaina o le aisa o lo o i ai i totonu.

 

O le mae’a ai o lea gaioiga a Leoleo, na latou talosagaina ai loa se poloaiga mai le Fa’amasinoga e fa’ataga ai i latou ona saili le fale a Galea’i faapea ai ma lana ta’avale, ona o lea ua masalomia lona aafia i le tulei atoa ai ma le umia faasolitulafono o fualaau fa’asaina.

 

I le aoauli o le aso Faraile na te’a nei, Setema 13, 2019, na taofi ai loa e Leoleo le ta’avale pikiapu lanu mumu a Galea’i i luga o le alatele i Pago Pago, e tusa ai ma le poloaiga a le Fa’amasinoga.

 

Na vave gaioiga a Leoleo ma latou taofia faapagota ai loa Galea’i mo se taimi le tumau i le taimi lava na taofia ai lana ta’avale, mo le saogalemu o ia aemaise ai fo’i Leoleo.

 

Na auina atu Galea’i i le ofisa o Leoleo i Tafuna, ma aga’i atu ai loa mo le sailia o lona fale i Vaitogi, e tusa ai ma le poloaiga a le Fa’amasinoga. Na sailia e Leoleo le fale ma maua ai vaega laiti o le laau faasaina o le mariuana. Sa maua ai fo’i ma se paipa e faaaoga e ula ai le pauta o le aisa, faapea ai ma se tinoitupe tele lava sa maua i le tino o Galea’i.

 

Na toe foi mai Leoleo i le Ofisa i Tafuna ma faatoa su’e ai loa totonu o le ta’avale a Galea’i. I lea sailiga na maua ai e Leoleo vaega o lau mamago o le mariuana, o se pepa taai, faapea ai ma se muli sikaleti mariuana sa maua i le faitoto’a o le pasese.

 

Ina ua fesiligia Galea’i e Leoleo, sa le’i mana’o o ia e talanoa i Leoleo, e le’i mana’o fo’i e faia sana fa’amatalaga e tusa ai o mea o lo o tu’uaia sa maua i lona fale ma lana ta’avale.