Ads by Google Ads by Google

Molia se ali’i i lona fa’aaoga o se naifi e faaoo ai manu’a i se isi ali’i

ausage@samoanews.com

O le vaiaso na te’a nei na pu’e faapagota ai e Leoleo se ali’i o lo o tu’uaia i le fa’alavelave lea na manu’a ai se isi ali’i ina ua ta tui i se naifi lona tino, ma taatiatia ai i luma o se fale i Iliili.

 

Na fiu Leoleo e tau saili le ali’i sa tu’uaia i lenei solitulafono i le po lava na tula’i mai ai le fa’alavelave, le po o le aso 11 o Novema, 2019. Ae ina ua toe aga’i atu Leoleo e siaki le fale o le uo tama’ita’i a lea ali’i, sa latou mauaina atu ai o ia o lo o lafi i totonu o le potu ae faapulou i le ieafu.

 

E 2 moliaga mamafa ua tu’uaia ai e le malo le susuga a Auau Papali’i. O ia moliaga e aofia ai le taumafai e faaoo le maliu i se tagata; faapea ai ma le moliaga e tasi o le faaoolima i le tulaga muamua, o le vaega A lea o solitulafono mamafa, lea e mafai ona fa’asala ai se tasi i le toese mo le olaga atoa, poo le fa’asala i le fa’asalaga fa’a falepuipui e le itiiti ifoi le 10 tausaga ae le silia i le 30 tausaga.

 

Talu ai le tulaga matuia o lenei mataupu, ua manatu ai le Fa’amasinoga e taofia pea Papalii i le toese i Tafuna e aunoa ma se tupe e tatala ai o ia i tua.

 

O le aso Lua o le vaiaso nei, Novema 26, ua fa’atulaga e faia ai le ulua’i iloiloga o lenei mataupu.

 

TAGI A LE MALO

 

O lo o taua i le tagi a le malo e fa’apea, i le po o le aso 11 o Novema 2019, na faafesoota’i ai e se ali’i mai Iliili le Ofisa o Leoleo i Tafuna mo se fesoasoani, ona o se ali’i o loo ta’atia i luma o lona fale o loo aafia uma lona tino i ni manu’a e mafua mai i se a’upega maai.

 

Na aga’i atu Leoleo ma latou taumafai loa e ofo atu le fesoasoani i le ali’i na a’afia. E taunuu atu Leoleo, o loo taumafai se ali’i e fesoasoani i le tagata o loo manu’a, e ala i le taofi o le toto mai lona tino mai le soona alu ese atu.

 

O le mae’a ai ona faia o gaioiga mo se fesaosoani muamua, na auina atu ai loa le ali’i na a’afia i le falema’i mo togafitiga, ae toe fo’i atu loa Leoleo i le nofoaga na tula’i mai ai le fa’alavelave e saili poo ai le tagata sa ia faatinoina lenei fa’alavelave.

 

Na aga’i atu Leoleo i le fale o loo faamautu ai le ali’i ua masalomia i lenei mataupu, peita’i e le’i maua o ia. Sa faailoa ane e lana uo tama’ita’i i Leoleo, na alu ese atu lava le tafaoga a Papalii i le afiafi, o lea lava e le’i toe oo atu i le fale ae ua leva le po.

 

I le taeao po lava o le aso na sosoo ai pe tusa o le itula e 6:00, na toe aga’i atu ai loa Leoleo i le fale lea o loo taua o loo nofo ai Papalii, ona o le manatu e saili poo i ai o ia. Na taunuu atu Leoleo ma fesili i le uo tama’ita’i a Papalii, peita’i sa fai i ai le tama’ita’i lea, e le’i toe oo atu lava Papalii i le fale talu ona alu ananafi e tafao.

 

A o faagasolo sailiga a Leoleo, na faafuase’i ona aga’i atu le alii e ana le fale lea e faamautu ai Papalii ma lana uo tama’ita’i, ma ia tuuina atu le faatanaga i Leoleo e saili ai totonu o le fale atoa mo le tau sailia o le ua molia. Na malie foi le uo tama’ita’i e saili totonu o le la potu poo i ai Papalii.

 

A o faagasolo sailiga a Leoleo ma ua aga’i atu i totonu o le potu, sa faafuase’i ona alaga leotele le uo tamaitai ma faapea atu i Leoleo, “Ou te fia faailoa atu le mea moni lava.” E fai lava tala ia a le uo tamaitai ma taumafai e una’i ese Leoleo ina ia aua ne’i ulufale i totonu o le potu.

 

Na vaaia e Leoleo autafa o le moega o loo faapulou mai ai se mea i se ieafu. Na susue e Leoleo le ieafu ma vaaia ai Papalii o loo lafi ai i lalo. O le taimi lea na pu’e faapagota ai loa o ia ma loka ona lima, ma ta’ita’i mai loa i fafo faatasi ma lana uo tama’ita’i, ma auina atu loa i le Ofisa o Leoleo i Tafuna mo suesuega faaopoopo.

 

Na maua le avanoa o Leoleo e fesiligia ai molimau e to’alua sa i ai i le taimi na tula’i mai ai le fa’alavelave. O i laua ia o se au uso e ana le fale lea na tupu ai i luma le faalavelave. O le au uso e aofia ai le tama matua ma lona uso laititi.

 

Na taua e le molimau muamua i Leoleo e fa’apea, na faateia o ia ina ua sauni e moe i le po na tula’i mai ai le fa’alavelave, ae ona vaaia ni tagata se to’alua ua tu’itu’i atu i le faitoto’a o le latou fale. Sa ia tatala le faitoto’a ma iloa ai, o Papalii ma le alii na manu’a lea o loo tutu atu i luma o le Fale, na o atu e fia talanoa i le uso matua o le molimau muamua.

 

Na taua e le molimau muamua lona alu i totonu o le fale ma fai i lona uso matua, o loo fia talanoa Papalii ma le ali’i na aafia ia te ia.

 

Na taua e le molimau muamua e fa’apea, sa sau lona uso ma fesili i alii e to’alua, poo fea la te o i ai. Sa fesili fo’i le uso matua o le molimau i le alii na aafia, pe aisea ua alu atu ai ma avatu Papalii i le latou fale.

 

Na vaaia e le molimau le musumusu atu o Papali’i o sana tala i le ali’i na aafia, ma faafuase’i ai loa ona tu’i e Papalii le alii na aafia ma alu ai loa i le atoa lea ali’i, ae taotao tua atu ai lava Papalii ma ta tu’i o ia seia oo lava ina pau i lalo. E pei ona taua e le molimau i lana fa’amatalaga i Leoleo, e foliga mai sa fa’aaoga e Papalii se a’upega maai e faaoo ai tu’i i le tino o le alii na aafia, ona, soo se taimi lava e tu’i ai e Papalii le alii na aafia, na te vaaia ai loa le sau o le toto i fafo.

 

Na tuli oso atu molimau e to’alua ma taofi ese Papalii, ae taumafai e fesoasoani i le ali’i na aafia, ae o le taimi fo’i lea na tu ai i luga Papalii ma alu loa i le atoa. Mulimuli ane, na vaaia ai e le molimau se tama’ita’i naifi sa uu i le lima o Papalii e faatino ai le solitulafono.

 

Ina ua fesiligia e Leoleo ia Papalii e tusa ai o lenei faalavelave, sa ia taua ai lona le iloaina o se mea sa tupu ona sa ova lona ‘ona. Na taua atili fo’i le ua molia e fa’apea, o le tama’i naifi na faaaoga i le solitulafono sa ia tia’iina i le togavao i le vaega o loo i ai le Malae Tapolo i Iliili.

 

Na aga’i atu Leoleo ma saili le nofoaga na faasino e Papali’i na tia’i ai le tama’i naifi, ma latou maua ai le tama’i o lo o masalomia na faatino ai le solitulafono. Sa maitauina fo’i le pisia o le tino o le tama’i naifi i le toto.