Pago Pago - AMERIKA SAMOA

O le aso 28 o Aperila na taofia ai e leoleo se taavale i luga o le alatele ma taofia ai e leoleo le taavale, ona e le’i iai se laisene avetaavale a le susuga ia Pati Solomona, lea sa faafoeina le taavale.

Ina ua suesueina e leoleo ma faamaumauina mea totino sa i totonu o le taavale, na maua ai e leoleo ia se vaega o fualaau faasaina.

O lo’o ua moliaina nei ia Solomona i moliaga e aofia ai;

1.  Umia faasolitulafonoina o vaega o Fualaau Faasaina (Aisa) - o se vaega o solitulafono mamafa, e mafai ona lokaina ai se tasi, i le va o le lima ma le 10 tausaga. Po o se sala tupe e i le va o le $5,000 ma le $10,000; po o faasalaga uma e lua.
2.  Umia faasolitulafono o vaega o Fualaau Faasaina (Mariuana) - o se vaega o solitulafono mamafa, e mafai ai ona nofosala i le va o le lima ma le 10 tausaga, po o sala tupe i le va o $5,000 ma le $20,000. 

E tusa ai ma faamaumauga a le malo, na taunuu se valaau i le vaega su’esu’e a leoleo (Detectives), na faailoa iai le mauaina o se paipa mata’eta’e o iai ni pauta pa’epa’e, I totonu o le taavale na taofia e leoleo. 

Sa faapea ona agai atu le sui Su’esu’e a le malo ma suesueina totonu o le taavale, Lea na maua ai se sikaleti ta’ai, o no pepa ta’ai faapea ma ni pulufana.

Na suesueina le pauta paepae e se tasi o kapeteni leoleo ma faamaonia ai, o le Aisa.  Na faapea foi ona faia I lau lanumeamata na maua foi I totonu o le taavale.

Ma sa faamaonia foi, o Mariuana.

E tusa ai ma le faamatalaga a Solomona I leoleo, e mafua ona manaomia le Aisa, ona o lana galuega mamafa.  Ae o le mariuana, e malolo ai.