Pago Pago - AMERIKA SAMOA

O le afiafi o le aso 21 o Iuni, 2024, na valaau ai se tamaitai i le Ofisa a Leoleo i Fagatogo, e lipotia ai le tu’ua’ia o le susuga ia Olo Setu Muliau i le fa’ao’olima i lona (tamaitai) tuagane.

Ua molia nei ia Muliau i le moliaga e tasi, o le Fa’ao’olima i lona tulaga e tolu – o se vaega ‘A’ o solitulafono mama, lea e mafai ona nofosala ai i le falepuipui mo le o’o atu i le tausaga e taso (1), po o se sala tupe e $1,000 po o faasalaga uma e lua.

E $1,000 le vaegatupe sa faatulagaina e mafai ona tatalaina ai le ua molia, mai i le falepuipui, e faatali ai lona faamasinoga.

Ina ua taunu’u leoleo i le afioaga o Utusia, sa feiloai ai ma le tamaitai lea na valaau mai i le Ofisa a Leoleo, ma ia faamatalaina ai i leoleo le mea sa tupu faatasi ai ma ata o manu’a a lona tuagane.  Ma o lo’o iai se talitonuga, na aofia i manu’a o le na a’afia ai le ma’osia o lona papatua, lima, tulivae faapea ma le fula o lona mata tauagavale.

Sa faamatalaina e le na a’afia e faapea, a’o fealuai i luma o le latou fale, sa ia va’aia le ua molia, o lo’o inu pia mai i tua o le pikiapu ma sa faapea mai le ua molia i le na a’afia, e tu’u lona fia tama mamafa, soso’o mai ai ma le tu’i mai e le ua molia, ia le mata o le na a’afia.

Na ta’ua e le na a’afia le pogisa o lana va’ai ma pa’u ai i lalo, a’o le taimi lea, ua fa’aauau le sauniga a le ua molia, i le tatu’iina o lona ulu ma lona tino, ae le’i sau lona tuafafine ma tulei ese.

Na aga’i atu loa leoleo i le fale o le ua molia ma va’aia le faia o sana inuga pia ma ina ua lokaina mai ona lima e leoleo, sa sosogia e leoleo le manogi pia I lana manava ma ona itutino.

Sa aveina le na molia i le ofisa a leoleo i Fagatogo, ae aveina le na a’afia i le falemai mo le togafitiga o ona manu’a.

Sa fa’ailoa mai e le foma’i na togafitia le na manu’a, i sui malu o le malo, e foliga main a fa’aaoga se a’upega ae peitai, sa ta’ua e le na manu’a, e na te le manatua.

Ae i le fa’atalatalanoaga o le ua molia, e leoleo, sa ia faamatalaina ai le faia o sana inuga pia i tua o le taavale, ma tilotilo mai i le a’afia o savali atu i fafo ma na ta’ua e le ua molia, lona le fiafia i le auala na tautala ai le na manu’a, i lona (Muliau) tua’a, o le le fa’aaliali, a’o laititi o ia (le na manu’a).

Ma o le mafua’aga lea na ia u’uina ai se apa pia ma tu’i ai le mata o le na manu’a.  Ina ua pa’u le na manua, i lalo, sa faapea ona togiina e Muliau, lona ulu i le apa pia ma tatu’i lona ulu ma lona tino.