Pago Pago - AMERIKA SAMOA

O le afiafi o le aso 6 o Iulai, 2024, na fa’afeso’ota’i ai e se alii ia le Ofisa a Leoleo i Tafuna, e ripotia ai le fasia o se tamaloa i se faleoloa, e fa’aaoga ai pate kirikiti.

Na aga’i atu leoleo i le nofoaga na tupu ai le faalavelave ma fa’atalanoaina le tamaloa na a’afia i lenei mataupu, ma sa molimauina e leoleo le ma’osia o foliga o le na a’afia, ma le fula o lona mata taumatau.

O i latou ua molia i lenei mataupu, na aofia ai Gauta Satele, Avele Satele, Sialia Fesagaiga, ma Tagiilima Samu.

E tusa ai ma faamaumauga a le malo, o lo’o ta’ua ai le fa’amatalaina e le na a’afia, i leoleo, lona iai i totonu o le faleoloa e fai sana faatau, ae o atu Gauta, Avele ma Sialia ma pate kirikiti.  Ma na fesiligia le na a’afia, e Gauta, po o le a lana tala na fai i lana (Gauta) fanau.  Ae ina ua tali mai le na a’afia, o ia sa talanoa i ni alii matutua se to’alua, ae le o ni tamaiti, sa ta’ua e le na a’afia, le sasau atu  e Sialia o le pate kirikiti  ae feosofi atu Gauta ma Avele ma fasi o ia.

Ina ua o ese i latou, na faapea loa ona valaau le ofisa a leoleo.

Sa maua atu e leoleo ia Gauta, Avele ma Sialia i le maota a Avele ma sa faapea loa ona aveina i latou i le ofisa a leoleo i Tafuna, mo le fa’aauauina o su’esu’ega a leoleo.  Ae ua sola Tagiilima Samu mai i le nofoaga na tupu ai le faalavelave.

Ina ua fa’atalanoaina e leoleo i latou e to’atolu i le ofisa a leoleo i Tafuna, sa faamatalaina e Gauta e faapea, a’o fai se latou ta’aloga kirikiti, ae tamomo’e atu lana fanau ma le fanau a lona tuafafine o Avele ma ta’u atu, na palauvale atu (le na a’afia) ia i latou ma faatonu i latou e o ese ma le fanua.  Sa saunoa Gauta, o le mafua’aga lena na feitai ai ma o latou o atu loa i le fufusu ma le na a’afia.

I le molimau a Avele, sa ia faamatalaina ai foi le faia o se latou ta’aloga kirikiti ae tamomoe atu a latou fanau ma fai atu, na fa’atonuina i latou  e le ua molia, e o ese ma le fanua.

Na molimau foi Sialia, na palauvale le na a’afia, i tamaiti a’o faia le latou kirikiti ma sa ta’u e tamaitai i a latou matua.  Ma sa o latou o uma e su’e le ua a’afia ma tupu ai le latou fusuaga, ona sa muamua pa’i atu le ua a’afia, ia te ia (Sialia).  Sa ta’uina foi e Sialia i leoleo igoa o tamaiti na iai i le taimi na palauvale ai le ua a’afia.

Ina ua su’esu’eina e leoleo ia se tasi o teineititi na iai i le taimi sa tupu ai le faalavelave, sa ia faamatalaina i leoleo e faapea, na fai le latou ta’aloga kirikiti, ae palauvale atu le ua a’afia, ma faatonu i latou e o ese ma le fanua, ona e le o se latou fanua.  Ma o le mafua’aga lea na tu’u ai loa le latou ta’aloga ae o latou o e ta’u i o latou matua faamatalaga sa faia e le ua a’afia.

Ina ua matamata leoleo i ata vitio mai totonu o le faleoloa, sa va’aia ai le ulufale atu o Gauta, Avele ma Sialia i totonu o le faleoloa ma agai sa’o atu i le ua a’afia ma na molimauina ai foi le faia o se talanoaga i le o le ua a’afia ma Gauta, ae o lo’o tu ai Sialia i lo la va.  Ma na molimauina ai foi i le ata vitio le a’apa fa’alua atu o Sialia ma u’u le gutu o le ua a’afia ona ia po ina lea o le gutu a le ua a’afia.  Ma oso atu ai loa Gauta i le ta faalua le ulu o le ua a’afia, i le pate kirikiti.

Sa faapea foi ona va’aia i le ata vitio, le sasau atu e Avele o lana pate kirikiti ae na misi.  Na a’apa mai le ua a’afia ma mau i le pate kirikiti a Gauta ma amata ona o le fetosoa’i, ae a’apa atu Gauta i le kola mai i tua le ua o le ua a’afia ma amata ona titina o ia.  A’o mau Gauta i le ua o le ua a’afia, sa oso atu Tagiilima Samu ma tu’i le ulu o le ua a’afia, ae toe ta mai e Sialia le itu taugavale o le ulu o le ua a’afia, i le pate kirikiti.

E fa’afitu ona tatu’i e Tagiilima ia le ua a’afia, a’o taumafai le ua a’afia e fa’ama’amulu ese le lima a Gauta ma a’o fa’aauau pea ona mau Gauta i le ua o le ua a’afia ae o lo’o tatu’i mai e Tagiilima, sa faapea ona ta e Avele le manava o le ua a’afia, i le pate kirikiti.  Ina ua mamulu ese le ua a’afia mai i lima o Gauta, sa ia tamo’e loa i tua o le masini kesia ma valaau mai ia Gauta, i lana mea sa faia i ni nai tausaga ua tuanai.  O iina na o ese atu ai loa Gauta, Avele, Sialia ma Tagiilima, mai i le faleoloa.

Na faapea ona agai atu le ua a’afia ma lona faletua i le falema’i i lea aso, mo le togafitiga o ona manu’a.

Ua molia uma nei i latou i moliaga, e aofia ai:

Faitauga 1:  Faatupu Vevesi i nofoaga faitele – o se vaega ‘B’ o solitulafono mama, e mafai ona nofosala ai i le falepuipui mo le o’o atu i le ono (6) masina, po o se sala tupe e $500; po o faasalaga uma e lua.

Faitauga 2:  Fa’ao’olima i lona tikeri e 2 – o se vaega ‘D’ o solitulafono mamafa, e mafai ona nofosala ai i le falepuipui, i le o’o atu i le lima tausaga, po o se sala tupe e $5,000; po o faasalaga uma e lua.

E ta’i $10,000 vaegatupe sa faatulagaina e tatalaina ai i latou ua molia, mai i le falepuipui, e fa’atalitali ai o latou faamasinoga.