Ads by Google Ads by Google

Maua fualaau faasaina ina ua osofa’i e Leoleo se fale tu’ufua o Namu Aetui i Futiga

ausage@samoanews.com

Pago Pago, AMERIKA SAMOA

 

O fualaau faasaina, o tupe faapea ai ma isi mea e fa’aaoga e i latou o loo faatau ma tuleiina atu fualaau faasaina i isi tagata, na maua ina ua osofa’i e Leoleo se fale tu’ufua i le nofoaga o Namu Aetui i Futiga i le vaiaso na te’a nei. 

 

E to’a 6 i latou na taofia faapagota ma auina atu i le Ofisa o Leoleo i Tafuna mo suesuega fa’aauau, ma i’u ina molia ai le to’atolu ae toe tatala i tua le isi to’atolu. O i latou e to’atolu ua molia e aofia ai Paulo Talili, Paulo Maea ma Sa Vaifanua. O i latou e to’atolu na toe tatala i tua, lea fo’i o loo taua o latou suafa i totonu o le tagi a le malo e aofia ai ni tamaitai se to’alua faapea ai ma se ali’i se to’atasi.

 

Na taua e se molimau faatuatuaina i le Samoa News e faapea, o le nofoaga lea na osofa’i e Leoleo, e latalata i le nofoaga o loo lafoa’i ai le lapisi i Futiga, o le nofoaga fou lea o lea ua avea nei ma nofoaga fou o le Aute, ma ua molimauina fo’i le to’atele o tagata ma ta’avale e aga’i atu i ai. 

 

O le vaiaso na te’a nei na tutula’i ai i latou nei e to’atolu i luma o le Fa’amasinoga Faaitumalo mo a latou ulua’i iloiloga. 

 

O Talili ma Vaifanua o loo molia i laua i moliaga taitasi o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000. 

 

Ae o le susuga a Maea, ua molia o ia i le moliaga e tasi o le umia faasolitulafono o vaega o fualaau faasaina o le aisa, faapea ai ma le moliaga mamafa e tasi o le umia faasolitulafono o le aisa ma le faamoemoe e tulei ma faatau atu i isi tagata, o ni solitlafono mamafa e mafai ona faasala ai se tasi i le Toese mai le 5 tausaga e oo atu i le 20 tausaga, pe faasala i le salatupe e oo atu ile $20,000, pe faasala foi i faasalaga uma ia e lua.

 

E tai $5,000 lea ua faatulaga e tatala ai i tua ia Talili ma Vaifanua ae $15,000 lea ua faatluaga e tatala ai i tua le susuga a Vaifanua.

 

Afai ae mafai ona tatala i latou nei i tua mai le Toese i Tafuna, ua poloaina i latou e le Faamasinoga e tausisi i tulafono a le malo, aua nei latou toe solia se tulafono, aua fo’i nei o latou toe umia ni fualaau faasaina pe toe tu vae se isi i le nofoaga na maua ai i latou, ae ia fesootai vava lalata ma le latou loia fautua ma ia auai i taimi uma e valaau ai a latou mataupu i luma o le Fa’amasinoga.

 

O le mataupu a Vaifanua lea ua tofu atu nei i luma o le Faamasinoga Maualuga, ina ua ia filifili e aua nei faataunuuina lana ulua’i iloiloga i luma o le Faamasinoga Faaitumalo, ae o mataupu a Talili ma Mae’a, ole vaiaso fou lea ua faatulaga e faia ai a laua ulua’i iloiloga i luma o le Faamasinoga Faaitumalo.

 

TAGI A LE MALO

 

O le aoauli o le aso 23 o Aperila, 2021 pe tusa o le itula e 2:40, na aga’i atu ai se vaega to’atele o Leoleo Suesue i le nofoaga o le Lapisi i Futiga i le vaega tonu o loo i ai se fale tuufua a Namu ma Su’e Aetui i Futig, e faataunuu le poloaiga a le Faamasinoga e sailia ai le fale tuufua lea faapea ai ma soo se tasi e maua ai, ona ua masalomia le toatele o tagata e aafia i fualaau faasaina i le nofoga lea.

 

O faamatalaga na mafai ona maua e Leoleo na taua ai le to’atele o tagata ma taavale e aga’i atu i le fale tuufua lea o Aetui i soo se taimi o le aso e aofia ai ma le po, mo le faatauina mai o fualaau faasaina. Na taua atili fo’i e ni molimau faatuatuaina i Leoleo, se alii e fealua’i ma sana ato faafafa i le nofoaga lea atoa ai ma se faili e uu i lona lima, o ia lea na te faatauina atu fualaau faasaina i tagata fegasoloa’i.

 

E to’a 6 i latou na taofia e Leoleo i le taimi o le osofaiga ma auin atu ai lea o i latou i le Ofisa o Leoleo i Tafuna ma suesuega. Sa taofia ai fo’i e Leoleo ma se ta’avale na vaaia ai i le nofoaga lea, ma auina atu fo’i lea ta’avale i Tafuna mo suesuega.

 

Na taunu’u Leoleo i le nofoaga lea ma latou molimauina ai se ali’i sa fealua’i ai i luma tonu o le fale tuufua o Aetui ma se ato faafafa i lona papatua. O ia lea o Paulo Maea.

 

Na alu i le atoa Maea ina ua ia vaaia Leoleo, peita’i e lei umi ona tuliloa o ia e Leoleo ae maua ma taitai atu loa ma le faamoemoe e ave i totonu o le ta’avale Leoleo e taofia ai. Na saili e Leoleo le tino o Maea ma maua ai i totonu o le taga o lona ofuvae sa faia se paipa tioata o loo tumu i vaega o le pauta paepae.

 

Na saili e Leoleo totonu o le ato faafafa lanu uliuli a Maea maua ai le tele o mea e fa’aaoga e se tasi mo le tuleiiina atu o fualaau faasaina e pei o pepa iila, o straws ua ta tipi tulimanu, o se fua, faapea ai sipuni laiti e asu ai le aisa atoa ai ma se tinoitupe e $47.

 

Ao faagasolo le suesuega a Leoleo, na molimauina ai e Leoleo Suesue se ta’avale o loo aga’i ese mai i luma tonu lava o le fale tuufua lea o Aetui, e toalua ni ali’i o loo malaga mai ai. Na taofi e Leoleo le ta’avale ma fesiligia ali’i e toalua i le mafua’aga o le la i ai i lea nofoaga. Ao talanoa Leoleo ma ali’i nei e to’alua, sa molimauina e Leoleo pepa iila e fa’aaoga e utu ai le aisa o loo paepae solo i totonu o le ta’avale, ma faatonu ai loa ali’i e to’alua e aga’i i fafo ma le ta’avale. 

 

O i laua e to’alua e aofia ai Sa Vaifanua, o ia lea sa faafoeina le ta’avale, ma le ali’i o Paulo Talili sa nofo i le nofoa o le pasese. Na saili e Leoleo totonu o le ta’avale pikiapu lanu mumu na malaga ai Vaifanua ma Talili ma maua ai straws e 3 ua uma ona ta tipi tulimanu  o loo i ai vaega o le pauta faasaina lanu paepae.

 

Sa toe faaauau le sailiga o le ta’avale e Leoleo, a o i ai ma le Tina o Vaifanua, o ia lea o loo lesitala ai le ta’avale, ma maua ai fo’i le isi straw ua uma ona tipi tulimanu i lalo o le nofoa o le pasese, o loo i ai vaega o le pauta paepae.

 

Sa maua ai fo’i e Leoleo ma se telefoni i totonu o le ta’avale. I totonu o le kava o le telefoni na maua ai e Leoleo straws e 2 o loo i ai vaega o le pauta paepaee. O le telefoni lea a le susuga a Vaifanua.

 

Na faagasolo atili le suesuega a Leoleo ma latou vaaia ai ni tagata se to’atolu o loo tau fetuli ese mai le fale ma aga’i atu i le togavao e lalafi ai. Na tuliloa e Leoleo i latou  nei e to’atolu ma taofia faapagota mai i tua o le togavao ma auina atu loa i le vaega o loo tutu ai ta’avale Leoleo. O i latou nei e to’atolu e aofia ai se alii se tasi ma ni tamaitai se to’alua.

 

Na quina uma lava i latou nei e to’a 6 na pu’e faapagota e Leoleo mai le nofoaga o le Lapisi, faapea ai ma le ta’avale i le Ofisa o Leoleo i Tafuna mo isi suesuega.

 

Na mumusu Maea ma Talili e talanoa i Leoleo e tusa ai o lenei mataupu, sei vagana ai le susuga a Vaifanua na manatu e talanoai Leoleo i le mafua’aga na maua ai lana ta’avale i le nofoaga o le Lapisi i Futiga.

 

Na taua e Vaifanua i Leoleo e faapea, e masani lava ona alu i le nofoaga o le Lapisi i le fale o Aetui e faatau mai ana fualaau faasaina o le aisa. I le aso lea, na alu atu ai e faatau mai ni ana aisa, ma ia vaaia ai Maea o loo fealua’i ma lana ato faafafa, ma fai loa i ai e mana’o i ni straw se 2 e ta’i $25 i le tasi. Ina ua uma lana faatau, na sauni ai loa e to’a fo’i ae na faatu mai se alii lana taavale ma talosaga atu mo se lifi aga’i i luma o le alatele. 

 

Ao aga’i ese mai le la ta’avale mai le nofoaga o le Lapisi, na faafuase’i ona taofi e Leoleo le la taavale ma maua ai loa fualaau faasaina. Na taua atili e Vaifanua i Leoleo Suesue, e le o aso uma e alu ai i le Lapisi e faatau mai ni ana aisa ma le faamoemoe e ula ma fa’aaoga mo ia lava, pe faatasi i le vaiaso ona alu i le nofoaga lea, ma ia vaaia ai Maea o fealua’i solo ma lana ato e faafafa i lona papatua.

 

E lei manatu Maea ma Talili e fai ni la faamatalaga i Leoleo. O le maea ai ona fesiligia e Leoleo o i latou nei, na auina atu ai loa i le Toese i Tafuna ma taofia ai e faatali ai le aso e tutula’i ai i luma o le Fa’amasinoga Faaitumalo.

 

Na fesiligia fo’i e Leoleo i latou e to’atolu lea na sosola ese mai i le fale o Aetui ma aga’i atu i tua o le togavao. Na muamua fesiligia tamaitai e toalua, o le isi e sau mai Alofau ae o le isi e sau mai Pago Pago.

 

Na taua e le tamaitai mai Alofau i Leoleo e faapea, sa la tietie mai i le pasi ma lana uo mai Pago Pago. Ina ua oo mai i Futiga, na faatu e lana uo mai Pago Pago le pasi fai mai la te o i le nofoaga o le Lapisi e aumai lana ato o loo i lana uo tama. Na la aga’i atu i tua o le nofoaga o le Lapisi ma piki mai le ato a lana uo.

 

Sa la vaaia Maea o fealua’i solo ai ma lana ato faafafa. O le galuega lava lea a Maea e faia i aso uma, e fealua’i ma lana ato faafafa o loo i ai fualaau faasaina e tulei ma faatau i tagata e aga’i atu i le nofoaga. 

 

Na faia se suega faapitoa i pauta papa’e na maua mai le nofoaga o le Lapisi ma faamaonia ai, o vaega uma ia o le pauta faasaina o le aisa.