Pago Pago - AMERIKA SAMOA

O le masina o Aperila o le tausaga nei, na vala’au ai se mafine i le Ofisa a Leoleo e lipotia ai lona uso, ua ona fa’ao’olima i se tagata o lo’o nofo totogi i o latou fale, ina ua musu lea tagata e tu’u atu ia te ia tupe o le ‘rent’.

E tusa ai ma fa’amaumauga a leoleo, e faapea, na valaau atu le uso o le tamaitai o Lesieli Fanene (lea ua molia i le tulafono) i le ofisa a leoleo, ma lipotia atu iai Lesieli o lo’o faamisa i se tagata o lo’o nofo totogi i a latou fale i Malaeimi.

Sa faapea loa ona aga’i atu leoleo i le nofoaga na tupu ai le faalavelave, ma o iina na faamatala auiliili ai e le uso a Lesieli ia le mea na tupu.  Na ta’ua e le uso a Lesieli i leoleo, sa to’atama’i le tamaitai o Lesieli ina ua musu le tagata lea o lo’o nofo totogi i le latou fale, e aitalafu ia Lesieli se $200.

Sa ta’ua e le uso a Lesieli le palauvale o le ua molia i le na a’afia i lenei mataupu, ma sa taumafai foi le uso e taofiofi mai Lesieli ina ua oso atu o le a fasi le na a’afia.  Ae ina ua oso Lesieli i totonu o lana taavale ma so’a ai le ta’avale a le na a’afia, lea sa paka i luma o le fale, o iina loa na valaau ai loa leoleo mo se fesoasoani.

Sa faatalanoaina foi e leoleo ia le na a’afia ma sa ia faamatalaina le o’o atu o Lesieli i lona fale ma faatonu o ia e avatu se $200, ae peitai, na musu le na a’afia ma to’atama’i ai loa le ua molia.

Na ta’ua foi e le na a’afia lona valaauina o le uso a Lesieli ona sa fa’aauau pea ona faatonu o ia e Lesieli ina ia tu’u atu le tupe.  Ma ina ua taunu’u atu le uso a Lesieli, sa ia taumafai e faamanino i le uso a Lesieli le mea o tupu, ae amata on palauvale atu ia Lesieli ma faia uiga tau faamata’u.  Na ta’ua foi e le na a’afia le tau o le po a Lesieli i lona lima a’o ia talanoa i luga o le telefoni.  Sa taumafai foi Lesieli e tu’i o ia, ae sa le’i tau le tu’i a Lesieli, ona tago lea o le ua molia i le ta le manava o le na a’afia i se paipa, ma tau i le manava o le na a’afia.

Sa ta’ua e le na a’afia, lona taumafai e pu’e uma amioga sa fa’atino e Lesieli, ae o le taimi lea o lo’o taofiofi ai o ia e le uso a le ua molia.  Ae na mafai ona pu’eina e le na a’afia ia le oso o Lesieli i totonu o lana taavale ma palauvale ma lafo mai faamatalaga taufa’amata’u i le na a’afia, faapea ai ma le faaleagaina o ana taavale.

O le aoauli o lea lava aso, na toe maua ai e le ofisa a leoleo i Tafuna ia se telefoni mai i seisi fafine, o lo’o fa’ailoa mai le paka o le taavale a Lesieli i luma o le latou fale i Malaeimi.  Na aga’i atu loa iai leoleo ma lokaina mai ai loa le ua molia.

Ua molia nei Lesieli i moliaga e tolu;

Faitauga 1:  Faatupu Vevesi i totonu o aiga – o se vaega ‘C’ o solitulafono mama, lea e mafai ona lokaina ai se tasi i le o’o atu i aso e sefululima (15), po o se sala tupe e $300; po o faasalaga uma e lua.

Faitauga 2:  Fa’ao’olima i lona tulaga e tolu – o se vaega ‘C’ o solitulafono mama, lea e mafai ona nofosala ai se tasi i le falepuipui, i le o’o atu i aso e sefululima (15) po o se sala tupe e $300; po o faasalaga uma e lua.

Faitauga 3:  Faaleagaina o mea totino, i lona tulaga e lua – o se vaega ‘C’ o solitulafono mama, lea e mafai ona nofosala ai se tasi i le falepuipui, i le o’o atu i le tausaga e tasi (1), po o se sala tupe e $1,000; po o faasalaga uma e lua.

E $2,000 le vaegatupe sa faatulagaina mo le tatalaina o le ua molia, mai i le falepuipui, e faatali ai lona faamasinoga.

I le faamatalaga a le ua molia, sa ia ta’ua ai lona le faamalosia o se tasi e tu’u atu se tupe, ae sa ia faia i se auala fa’aalolao.  Ae na ia faamaonia lona po ina o le lima a le na a’afia, a’o ia u’uina lana telefoni.