Ads by Google Ads by Google

Loka se ali’i talavou ina ua maua fualaau fa’asaina totonu lana ta’avale

ausage@samoanews.com

E $10,000 le vaega tupe lea ua fa’atulaga e tatala ai i tua se ali’i talavou o lo o taofia i le Falepuipui i Tafuna i le taimi nei, e mafua mai i le fa’alavelave lea na maua ai e Leoleo se vaega o fualaau fa’asaina i totonu o lana ta’avale.

 

O le po o le aso Faraile o Iuli 5, 2019 na pu’e fa’apagota ai e Leleo ia Fred Wilson ma tula’i ai o ia i luma o le Fa’amasinoga Fa’aitumalo i le aso Gafua o le vaiaso nei.

 

O le afioga i le Tama’ita’i Fa’amasino ia Gwen Tauiliili-Langkilde na taulimaina le mataupu a Wilson. Ua molia e le malo ia Wilson i moliaga mamafa e 2 o le umia fa’asolitulafono o vaega o le pauta fa’asaina o le aisa, atoa ai ma le umia fa’asolitulafono o vaega o le laau fa’asaina o le mariuana.

 

Afai ae tatala Wilson i tua, ua poloaina o ia e le fa’amasinoga e le tatau ona ia toe solia se tulafono, auai i soo se taimi e valaau ai lana mataupu, ma ia fesoota’i ma lana loia fautua i soo se taimi, le susuga ia Anna Whiles, o ia lea o le Loia Fautua lagolago mo tagata lautele.

 

Ma ia tuuina atu lona tusi folau e taofi e le malo se’i vagana ua mae’a taualumaga o lana mataupu.

 

Na teena e le Fa’amasinoga le talosaga mo se avanoa e fa’aitiitia ai le tupe e tatala ai Wilson mai le $10,000 i le $5,000.

 

Na taua e Whiles e fa’apea, o le solitulafono o loo molia ai Wilson, e talafeagai ai lava le $5,000 e tatala ai o ia i tua. E le gata o ia o se tagatanu’u o Amerika Samoa, ae leai fo’i se isi nofoaga e ono sola i ai o ia, aua o lo o iinei uma lona aiga.

 

Na tete’e Mitchell i le talosaga. Na taua e le malo e fa’apea, ua silia ma le 3 masina o tau saili e Leoleo ia Wilson ona o ana tusi saisai mai le Fa’amasinoga.

 

O lo o i ai fo’i ana salatupe e le i totogiina i le fa’amasinoga, faapea ai ma isi poloaiga a le fa’amasinoga sa tuuina atu i ana mataupu ua mavae na te le i usitaia.

 

I le fa’aiuga a le fa’amasinoga e tumau pea le tupe e tatala ai i tua Wilson. 

 

Taua e le malo i le latou tagi e fa’apea, o le ta’avale a Wilson na taofi e Leoleo i se poloka sa faia i Nu’uuli, ina ua maitauina le sese o le numera o le laisene sa fa’apipi’i i le pito i tua o le ta’avale.

 

Na aga’i atu Leoleo e talanoa i le ave ta’avale e fa’amalamalama i ai le mafua’aga ua ala ai ona taofi lana ta’avale, ma vaaia ai ni ali’i talavou se to’alua i totonu o le ta’avale. O le susuga a Wilson, o ia lea e ana le ta’avale sa nofo i le nofoa o le pasese, ae o le isi ali’i talavou e suafa ia Matavanu Ifopo sa ia fa’afoeina le ta’avale.

 

Ina ua mae’a ona fa’ailoa e Leoleo ia ali’i talavou nei e to’alua le mafua’aga o le taofi o le la ta’avale, sa fa’atonuina ai loa i laua ina ia aga’i i fafo ma le ta’avale. Na vaaia e Leoleo foliga popole o Wilson ae o le ali’i ave ta’avale sa maitauina le au tago solo o ona lima i taga o lona ofu o loo fai, e foliga mai e i ai se mea o lo o ia taumafai e saili.

 

Ina ua tulioso ese i laua nei e to’alua i fafo mai le ta’avale, sa vaaia ai e Leoleo tama’i pepa iila e utu ai le pauta o le aisa o loo paepae solo i totonu o le ta’avale i le vaega tonu sa nofo ai Wilson.

 

Ina ua siaki e Leoleo le ta’avale, sa maua ai ni tama’i pepa iila se 2 o lo o i ai vaega o le pauta o le aisa. Sa fa’aauau pea ona siaki e Leoleo totonu uma o le ta’avale, ma maua ai loa fo’i ma le isi pepa iila o lo o i ai lau mamago o le mariuana.

 

O le mae’a ai ona maua e Leoleo o vaega e pei ona taua, sa taofia ai loa i laua nei i lalo o le vaavaaiga a Leoleo, faapea ai ma le taofia atu ai ma le la ta’avale, ma auina atu loa i le Ofisa o Leoleo i Tafuna mo isi suesuega atili.

 

Na faailoa e Ifopo i Leoleo ina ua fesiligia o ia, o ia sa taalo piliaki i le fale o le isi ana uo, ae na fa’ateia o ia ina ua alu atu Wilson ma tauanau o ia la te ti’eti’e aga’i i Vaitogi e asi le isi ana uo o loo i ai ona la toe fo’i mai ai lea. Sa mana’o fo’i Wilson na te aveina le ta’avale, ona o loo inu lana apa pia e tasi.

 

Na fa’ailoa atili e Ifopo i Leoleo e fa’apea, sa ia vaaia Wilson o loo ia nana se mea i lalo o le nofoa sa nofoa i o ia. O fualaau fa’asaina uma sa maua i totonu o le ta’avale, o mea uma lava ia a Wilson.

 

Na siaki e Leoleo le ta’avale ma faamaonia ai, o Wilson e ana le ta’avale, o lona igoa o loo lesitala ai le ta’avale.

 

Na toe aga’i atu Leoleo i le ta’avale ina ua mae’a ona latou maua le fa’amatalaga mai ia Ifopo. Na saili e Leoleo le pito i lalo o le nofoa o le pasese sa nofo ai Wilson ma latou maua ai se paipa tioata o loo i ai se vaega o le pauta fa’asaina o le aisa.

 

O le maea ai ona fesiligia o Ifopo, sa toe tatala ai loa o ia i tua e aunoa ma le moliaina o ia, ao faaauau pea suesuega e uiga i lenei mataupu.

 

Ina ua fesiligia e Leoleo ia Wilson e uiga i fualaau fa’asaina sa maua i totonu o le ta’avale, sa teena ai e le ua molia lona iloa o le tagata e ana fualaau fa’asaina nei. Na taua e Wilson i Leoleo e faapea, o lona uncle e igoa ia “STAVA” sa ia fa’aaogaina lana ta’avale e la’u ai ana meamata e fa’atau i le maketi.

 

Na toe fesili Leoleo ia Wilson poo ai e ana le paipa tioata lea na nana i lalo o le nofoa o le pasese sa nofo ai, na tali le ua molia, “ou te le iloa se mea, e le faapea o a’u sa nofo i lalo o le nofoa ona outou manatu lea o a’u e ana le paipa”.

 

Na musu Wilson e tuuina atu sana fa’amatalaga tusitusia i Leoleo e tusa ai o fualaau fa’asaina sa maua i lana ta’avale. Sa ia fa’ailoa i Leoleo e fa’apea, e le mafai ona faia sana fa’amatalaga se’i vagana ua talanoa i lana loia fautua.

 

E ese mai i le mataupu e pei ona molia ai Wilson i le umia faasolitulafono o fualaau fa’asaina, o lo o faaaua fo’i suesuega a Leoleo i le mataupu e fa’atatau i le ta’avale a Wilson, lea e faapea mai ripoti o le ta’avale lea na gaoi mai e le ua molia ma se tasi o ali’i Inisinia i le tausaga na te’a nei, ona ia sui lea o le vali o le ta’avale toe fa’amalosia fo’i ona faia le pepa e lesitala ai le ta’avale i le Ofisa o Ta’avale Afi a le malo i Tafuna.