Ads by Google Ads by Google

Loka se ali’i ina ua maua e Leoleo fana ma fualaau faasaina i lana ta’avale

ausage@samoanews.com

O le vaiaso na te’a nei na pu’e faapagota ai e Leoleo se ali’i sa fa’afoeina se ta’avale, ina ua taofia e Leoleo le ta’avale i le soona alu saoasaoa i luga o le alatele ae maua ai fualaau fa’asaina ma se a’upega malosi (fana).

 

O le vaiaso na te’a nei na tula’i ai le susuga a Farani Uili i luma o le Fa’amasinoga Fa’aitumalo mo lana ulua’i iloiloga.

 

Ua molia nei e le malo ia Uili i le moliaga e tasi o le umia faasolitulafono o vaega o le pauta fa’asaina o le aisa; tasi le moliaga o le umia faasolitulafono o vaega o le laau fa’asaina o le mariuana; tasi le moliaga o le umia faasolitulafono o se a’upega malosi, o solitulafono mamafa uma ia e pei ona fa’atulaga mai e le tulafono. O loo tu’uaia fo’i e le malo ia Uili i le moliaga mama e tasi, o lona umia faasolitulafono lea o ni pulufana e le tusa ai ma le tulafono

 

Talu ai tulaga fa’aletonu i pepa nofomau a Uili, na faaleaoga ai loa e le Fa’amasinoga lana poloaiga ina ia fa’atulaga le tupe e $15,000 e tatala ai o ia i tua, ae ua poloaina le taofia loa o Uili i le Toese i Tafuna e aunoa ma se tupe e tatala ai o ia i tua.

 

O le aoauli o le aso Faraile o le vaiso nei lea ua fa’atulaga e faia ai le ulua’i iloiloga faapitoa a Uili i luma o le Fa’amasinoga.

 

TAGI A LE MALO

 

E pei ona taua e le malo i le latou tagi e fa’apea, o lenei mataupu na tula’i mai i se vaega o le afioaga o Pago Pago i le po o le aso 8 o Ianuari 2020, ina ua maitauina e ni ali’i Leoleo se to’alua sa tiute ai i lea vaega o le alatele se ta’avale Suzuki lanu uliuli o lo o sau mai i sisifo e aga’i atu i le itu i sasa’e i se saoasaoa uiga ese e le tusa ai ma tulafono i luga o le alatele.

 

Na vave ona faaola e alii Leoleo faailoilo o le la ta’avale ao la tuliloaina le Suzuki ma mafai ai loa ona taofia le ta’avale lea i luma o se Faleoloa Asia i Pago Pago. E le gata na alu saoasaoa le ta’avale, ae sa maitauina fo’i e Leoleo le ese o le itu o le alatele o lo o alu ai, e foliga mai e ‘ona le ave ta’avale.

 

Na  aga’i atu Leoleo ma fesiligia le ave ta’avale, ma faailoa mai ai e le ave ta’avale, o lona igoa o Farani Uili. Ae ina ua fesiligia e Leoleo ia Uili i lona laisene, sa faailoa i ai e le ua molia, e leai sona laisene ave ta’avale, e leai fo’i sona ID mai le ofisa o Femalagaaiga a Amerika Samoa, ona e leai ni ona pepa nofomau.

 

Na faailoa e Leoleo ia Uili, o le a taofia o ia ona o le leai o se pepa e faamaonia ai o ia, atoa ai ma lona faafoeina o le ta’avale e aunoa ma sona laisene ave ta’avale. Na saili e Leoleo pe i ai se faila a Uii i le Ofisa o Taavale Afi a le malo, peita’i na faamaonia, e leai se faila i lalo o le igoa Farani Uili o i ai i faamaumauga.

 

A o taumafai Leoleo e faamanino ia Uili le tulaga lea ua oo i ai o ia, sa talosaga le ua molia i Leoleo mo se avanoa e alu ai i le fale e momoli le ta’avale i lona aunty o loo faatali mai. Na faailoa e Uii i Leoleo, o lona aunty e ana le ta’avale, ma o loo faatali mai o ia e fa’aaoga le ta’avale e alu ai e faigaluega.

 

Sa faia pea le finauga i le va o Uili ma Leoleo. Ina ua taumafai Leoleo e toso mai i fafo le lima o Uili mai le ta’avale, na se’i e le ua molia lona lima ma tago ua unai ese le isi ali’i Leoleo, sosoo ai ma lona kikiina o le ali’i Leoleo lea ma tau ai lana kiki i le fatafata.

 

Sa taumafai malosi pea Leoleo e toso mai i fafo ia Uili, peita’i na toe faasaga ane Uili ma kiki le isi Leoleo ma tau ai lana kiki i le auvae o le ali’i Leoleo. Mulimuli ane, na mafai ai loa e Leoleo ona toso mai i fafo le ua molia ma loka loa ona lima.

 

Ao ta’ita’i atu e Leoleo ia Uili i totonu o le ta’avale Leoleo, sa vaaia e Leoleo le taumafai o le ua molia e aapa i le taga o lona ofu o loo fai. Na fesili Leoleo ia Uili poo le a le mea o loo i totonu o le taga o lona ofu, ae na tali le ua molia, “e leai sau feau e te fesili ai fua.”

 

Na saiil e Leoleo le tino o Uili ma maua ai ni sikaleti mariuana se 2 i totonu o le taga o lona ofu o loo fai, faatasi ai ma se paipa tioata e fa’aaoga e ula ai le aisa, o loo tumu i vaega o le pauta pa’epa’e o le aisa.

 

I totonu o le taavale na faafoe e le ua molia, sa maua ai e Leoleo se ato sipi lanu moana o lo o i luga o le nofoa i le pito i tua o le ta’avale. Na fesili Leoleo ia Uili mo se faatanaga e su’e ai le ato, peita’i na tali le ua molia, e tatau ona faanoi muamua i lona aunty mo se faatanaga, o lona aunty e ana le ta’avale, atonu fo’i o ia e ana le ato o loo i totonu o le ta’avale.

 

Mulimuli ane, na malie le ua molia e su’e e Leoleo le ato. I totonu o le ato, sa maua ai e Leoleo se fana o le ituaiga o le 12-gauge faatasi ai ma ni pulufana. Na maua ai fo’i e Leoleo i totonu lava o le ato sipi lanu moana ni taga pepa iila se lua. O le isi pepa iila o lo o i ai tama’i pepa iila e 4 o loo tutumu i vaega o le pauta faasaina o le aisa. O le isi pepa iila o lo o i ai i totonu ni tama’i pepa iila se 3 o loo tutumu i vaega o lau mamago o le mariuana.

 

Sa faapea fo’i ona maua ai e Leoleo i lalo o le nofoa o le ave ta’avale se tama’i ato fusi manava lanu uliuli. I totonu o lea tama’i ato sa maua i ai ni sikaleti mariuana se 3 ua uma ona taai, faapea ai ma se paipa tioata o loo i ai vaega o le pauta fa’asaina o le aisa.

 

O le pito i tua o le ta’avale na maua ai e Leoleo isi vaega o fualaau fa’asaina o loo afifi i se ie lavalava lanu mumu, e aofia ai le paipa tioata e tasi o loo i ai vaega o le pauta faasaina o le aisa, faapea ai ma se tama’ita’i taga pepa fai sipi o loo i ai vaega o le pauta fa’asaina o le aisa.

 

O vaega uma o fualaau fa’asaina na maua i totonu o le ta’avale ma le tino a le ua molia, na faia i ai se suega faapitoa ma faamaonia ai, o vaega ia o le pauta fa’asaina o le aisa faapea ai ma vaega o le laau fa’asaina o le mariuana.