Apia - SAMOA

E to’alua ni alii ma se tamaitai e to’atasi, na ripotia mai e le Samoa Observer, na lokaina e leoleo i Samoa, i sa latou osofaiga fa’afuase’i na faia i Lotopa.  Ma e ui ina ua mae’a ona fa’atulagaina se vaegatupe e mafai ona tatalaina ai i tua le tamaitai, ae o lo’o lokaina pea nei alii e toalua. 

O le aso 25 o Setema lea ua fuafua e lauina ai le latou mataupu i luma o le faamasinoga.

Ua ta’ua mai i le ripoti a le Samoa Observer, le mamafa o moliaga o le a feagai ma i latou nei, e aofia ai le umia o vaega o fualaau faasaina (Aisa), o ni meatotino e gaosi ma fa’aaoga ai nei fualaau faasaina, e pei o paipa.

I se faatalanoaga a le Samoa Observer ma le Komesina o Leoleo, le afioga Auapa’au Logoitino Filipo, ua mae’a ona molia.  

E le gata i lea, sa ia faaleoina ai lona atugalu tele ona o agai i luma o le tupu so’o o nei ituaiga faalavelave i totonu o Samoa, lea o lo’o a’afia ai fualaau faasaina.

Na fa’ailoa mai foi e Au’apa’au le avea o lenei mataupu i solitulafono e a’afia ai fualaau faasaina, ma totonugalemu o fetufaa’iga a leoleo faavaomalo i le latou fonotaga lea sa faia i le vaiaso ua mavae.

Sa ma’oti lava nei talanoaga i auala ua avea ai Samoa ma ni isi o motu tuaoi ma nofoaga autu ua fa’aaogaina e feavea’i ai fualaau faasaina, o lo’o faamoemoe e aveina i Ausetalia ma Niu Sila ona o le tele atu o auala e mafai ona fa’atauina ai i tagata lautele (market).

Ma na fa’amamafaina e le Komesina o Leoleo le ‘oga’oga o lenei mataupu, ma ua avea ma faapopolega i ofisa leoleo i motu ma malo uma.

Sa ta’ua e Au’apa’au le ‘aufa’atasi o sui uma o ofisa leoleo ma malo eseese, sa auai atu i lea fonotaga, i le mana’omia ona fofoina vave o lenei faafitauli ma ua o latou tu’uto o le a galulue faatasi ina ia tineia lenei faafitauli ua fa’aauau ina tele ona a’afiaga.