Ads by Google Ads by Google

Lauga Kovana Lolo -


ata: Kovana o AS, Lolo Matalasi Moliga

- NISI ALA FAALELEIA TAMAOAIGA MAI LE MALO TELE

 

O nisi o ala ua fa’ailoa i le lauga a le Kovana Sili, Lolo Matalasi Moliga,  e tatala ai tauaofiaga o fonotaga a le Fono faitulafono o lenei tausaga, ua ia fa’ailoa ai le tupe mai le fetarale e fesoasoani i le mamalu lautele na a’afia i le Afa o Gita i le 2018.

 

“O le fesoasoani tele o le a maua mo le mamalu lautele o le atunu’u e agava’a ai, fa’atasi ai ma le au faioa o le atunu’u e ala i faleoloa ae maise fo’i ose vaega o le a fa’aaogaina e fa’atau ai fa’aeleeleaga a le atunu’u mo le sauniga o latou mea taumafa. O lenei fesoasoani ua fa’amatuu mai ai le $18miliona ma e fa’auia mai le USDA,” o se vaega lea o le lauga a le kovana.

 

O le isi fesoasoani mo le afa foi o Gita, mai le Dept. of Housing & Urban Development mo le fa’aleleia pe fausia ai fo’i fale nofo mo aiga ua fa’amatu’u mai ai le $23 miliona.

 

O nei fesoasoani uma o le a matua fa’aleleia ai le tamaoaiga o le atunu’u, ae maise ai i le tulaga o le fausia o fale fou mo aiga, ae maise o pisinisi e fa’atautaia i le atunu’u, ma ua aiaia nei nogatupe mo lea tautua e le faletupe o Atina’e a le tatou Malo. Ua fa’ailoa mai fo’i, o le aotelega o le tinoitupe ua mae’a nono atu e le Faletupe o Atina’e i le mamalu o le atunuu ua atoa le $14.9miliona mo fale nofo ae $3.1miliona mo nogatupe a Pisinisi laiti.

 

Ua ia fa’ailoa fo’i, o le a amata fo’i ona maua nisi fa’amanuiaga pe a o’o ina maea fa’atauina atu le malosi’aga fa’aso’otaga a le Hawaiki Cable lea ua fa’atautaia e le ASTCA lea ua si’itia i le 200gigabytes.

 

I le tulaga o Turisi, ua ia fa’ailoa ai, “O le afea o i tatou e le tele o Meli tetele ua i ai pasese tafafao ma latou auva’a ua si’itia ai le tulaga o fefa’ataua’iga i faleoloa ua latou gaosia oloa taulima a Samoa ma isi atumotu o le pasefika, lavalava ma isi mea uma e manana’o ai turisi, ae maise o le ala o tautua feso’ota’i ma le tautuaina o nei meli e tatou Uafu o lo’o taula mai i ai, ma le kesi ae maise le suavai manino e masani ona mana’omia ona toe fa’atutumu pe a taula mai Meli Tetele nei.”

 

Ole lipoti fo’i lenei, sa i ai lona una’iga fou na tapena e le tama’ita’i faipisinisi o Patricia Vaivao, sa ia tufaina atu chips talo, o se tasi o ana oloa gaosi ua fa’atau atu i fafo ae maise o tagata e avea ma fa’amomoli mo alo ma aiga i atunu’u e mamao.

 

Sa faaalia e Lolo, “Ua ou fiafia ua mafaia e lenei tama’ita’i o le atunuu ona tapena ma fa’alauiloa ana oloa gaosi, ma ua saunia lelei e auina atu i fafo i ala o fefa’ataua’iga.”