Pago Pago - AMERIKA SAMOA

Sa fa’aleoina e le afioga i le Senatoa ia Togiola T.A. Tulafono, i luma o le komiti a le Senate, o le Falemai ma le Soifua Maloloina, i sa latou iloiloga na fa’ataunu’uina i le aso Lua na se’i mavae atu, ia le mauaina e Faatonusili o le Komiti Faafoe a le LBJ, ia ni alauni e ta’i $1,000 a le tagata, ae e le’i pasiaina pe ua fa’atulafonoina.

O nei alauni, e tuaftufaina pe a mae’a ni fonotaga a le komiti faafoe, lea e pe ta’i fa’alua ona faia i le masina.

O molimau sa auai i le iloiloga i le aso Lua, na aofia ai le Taitaifono a le Komiti Faafoe a le LBJ, le susuga ia Aifili J. Tufa; o le susuga ia Magele Scot Anesi, le Faatonusili a le LBJ, o le CMO a le LBJ, le susuga ia Dr. James Sunia faapea le Fa’atonusili o le DOH, le susuga i le alii fomai ia Dr. Saipale Fuimaono.

Na mua’i fesiligia e Togiola le aofaiga o taimi e fono ai le komiti faafoe, i le masina.  Na faamanino mai e Aifili, o le taimi nei, e fa’atasi i le masina, ae o nisi masina, e manaomia ona toe faia se fono faaopoopo, ona o ni mataupu e le mae’a ona fa’atalanoaina i le fono muamua.

Na toe fesili Togiola, pe tupu so’o lea tulaga, e fa’atatau i le fa’alua o fonotaga i le masina. Sa tali ioe mai Aifili, ma sana faamalamalamaga ona o le tele o mataupu e fetufaa’i ma liuliu le tofa, o le tele o taimi, e te’a le lima i le afiafi, e le’i uma ona fa’atalanoaina.

“E to’afia totino o le komiti o tagata faigaluega a le malo a Amerika Samoa?” o le toe fesili mai lea a Togiola.

Sa tali mai Aifili, e leai se totino o le komiti, o lo’o galue i totonu o le malo.

“O fono nei, a ta’i lua i le masina, e $1,000 i le fono fa’aauau?  O lona uiga, e $2,000 e maua i le masina?” o le fesili lea a Togiola.

Sa faapea ona tali ioe ia le susuga ia Aifili i le fesili a Togiola.

“O e malamalama i le Maga 13-0103 o le Tulafono patino i le Fono Faafoe a le Medical Authority?” o le toe fesili mai lea a Togiola.

Sa tali atu le susuga i le taitaifono, sa ia taga’i iai.  O le fesili foi lea sa tu’u atu i le loia sa iai i le falemai i le taimi lea, e faafesili iai, po o le mea e solitulafono ia le fa’ai’uga lea sa fai, e $1,000 le stipend a le director.

Ma na ta’ua e Aifili, sa fautua mai le loia, i lalo o le bylaws, e iai lava le malosiaga o le laulauafono, e na te faia ia faaiuga ia.

Na faapea ona fesiligia e Togiola ia le susuga i le taitaifono, pe mafai e bylaws a le komiti faafoe ona fa’ato’ilalo le tulafono.

Sa tali mai Aifili, i sona talitonuga, e le mafai.

“Ae ua fa’afefea la ona outou suia le usitai i le tulafono, e ala i le tou bylaw?” o le toe fesili mai lea a Togiola.

Ina ua taumafai le susuga i le taitaifono e fa’ailoa mai, o le a toe tagai toto’a iai le latou komiti ia lea mataupu, ae sa faapea ona fa’auilavea mai Togiola i lana tali ma ia toe faamanatu mai i le taitaifono, lana molimau lea “sa fai mai ai le tou loia, e tusa lava po o le a le tulaga o le tulafono e mafai e outou ona sui i le bylaw.”

 Sa faapea ona toe faamanino mai e Aifili, o lana molimau, e le mafai e ‘bylaws’ a le komiti faafoe a le LBJ ona sili atu, i lo tulafono a le malo.

“Ae ua outou le usita’i la e a, i tulafono a le malo?” o le toe fesili mai lea a Togiola.

“O le faamalamalaga mai a le matou loia, e le’i iai se ‘clause’ o le tulafono a le malo, o faapea mai, e le mafai ona fai le tulaga lea.  E pei o iina sa fai ai le filifiliga o le laulauafono sa iai, e pasia le tulaga lea, o le fai o Allowance, a tatou directors,” o le toe taumafai mai lea a le susuga i le taitaifono.

Sa faapea loa ona lauina mai e Togiola le vaega o le tulafono (Maga 13.013(j), o lo’o manino mai ai le totogiina o totino o le komiti faafoe, i le $5,000 i le tausaga, se’ia vagana ai le taitaifono, e $6,000 lona totogi, i le tausaga.

Ma o fa’atonusili o lo’o fa’amautu i atunu’u i fafo, e latou te maua tupe (compensation) mo femalagaiga, fale e nonofo ai, taumafa, ma feso’ota’iga, i taimi e fa’atino ai o latou tiute.

Sa toe saunoa mai le susuga i le taitaifono, o le a faapea ona toe iloiloina e le latou komiti ia lea mataupu, i le latou fonotaga ua fa’atulagaina mo lea aso.  Ma ia folafola mai i afioga i Senatoa, o le a faapea ona o latou fofoina lenei faafitauli, ma faamautuina lo latou usitaia o le tulafono.

Na saunoa le afioga Togiola, “Talosia ia faia se tou fuafuaga e usitaia le tulafono.  Aua e tutusa lelei lava le fa’aupuga o le Maga lea, o le maga lea na matou aumaia i le tulafono foi lea e savali ai le ASPA.”

Ma na ta’ua e Togiola le usitaia e le ASPA i lea tulafono.  “Ae lea e fai mai la outou fa’aupuga, ‘e le o aumai ma se fa’asaga e fa’asa ai matou, e fai lava e matou a matou stipend.”

Sa faapea foi ona fesiligia e Togiola ia le suafa o le loia sa fautuaina ia le komiti faafoe a le LBJ.  Lea na tali mai ia Aifili, o le loia na iai, o Thomas Jones.  Ae sa fa’amanino mai e Aifili, e ui ina o le fautuaga sa sau mai ia Jones, ae o le fa’ai’uga e faia nei ‘stipends’ faalemasina, o le fa’ai’uga na faia e le komiti faafoe.  Sa faamanino mai foi e Aifili, o lenei tulaga sa fa’atuina e le komiti faafoe ua mavae atu, lea ua suitulaga iai latou, ae o lo’o fa’aauau pea ia ‘stipends’ se’ia o’o mai i lenei vaitaimi.

Sa saunoa Togiola, “O le mafua’aga lea ua alai ona ou fai atu, aua e tatau i le malo ona toe fo’i i tua e fai le ‘claims against’ i ‘directors’ uma ia na maua le ‘fee’ lea e afe, e sopo atu loa i luga o le $5,000, toe fa’afo’i mai uma tupe a le malo.”

Ona ua taofi Togiola, o se tupe maua faasolitulafono.  Ma e iai le aia tatau a le malo, e toe saili mai ai lea tupe.  Ona o se tupe totogi fa’asolitulafono, e manaomia ona toe fa’afo’i mai i le malo.

I taualumaga masani a le Senate, sa saunoa ai le peresetene o le Senate, le afioga i le Senatoa ia Tuaolo Manaia Fruean, e tusa ai ma le felafolafoaiga a Togiola ma molimau a le LBJ, le iai o sona faamoemoega o lo’o matamata uma komiti faafoe a le malo ma o latou teu fatu ia lea feau taua, ma ia tausisi i le tulafono, i le faatinoga o a latou tiute.

Sa saunoa Tuaolo, e foliga mai o lo’o fa’aaogaina e nisi o totino o komiti fa’afoe ia a latou ‘bylaws’, e fai ma ‘alofaga o a latou gaioiga.

Na faapea ona lagolagoina e le afioga i le Senatoa ia Togiola ia le manatu a le peresetene ma ia toe fa’aleoina le tatau ona toe totogi mai uma o tupe sa totogi ai ia fa’atonu o le komiti faafoe a le LBJ, mai lava i le taimi na amata solia ai le tulafono, se’ia o’o mai i le taimi nei.

Sa faamamafaina e Togiola le manaomia i le Ofisa a le Kovana ona tu malosi e fa’asagatau i nei ituaiga masani, ma ia fa’asala i latou o lo’o taumafai e fa’aaoga le tulafono e maua ai a latou tupe.  Ma sa ia lapataia foi le fa’alototeleina o isi e fa’aauau ona soli le tulafono, pe afai ae le faia e le ofisa a le kovana se fa’ai’uga e fofoina ai lenei mataupu.

Na ta’ua e Togiola le le na’o na mauaina e le komiti faafoe a le LBJ o latou totogi ua mae’a ona fa’atulafonoina, ae ua o latou suia a latou ‘bylaws’ e faatagaina ai le mauaina o ‘stipends’ e ta’i $1,000 i le masina.

Ma sa ia faamamafaina le tatau ona fa’ao’oina atu lenei mataupu i le Kovana ma le Loia Sili, ma fautuaina ia le faatonuina o totino tuai uma o le komiti faafoe a le LBJ sa mauaina nei tupe, ina ia toe totogi mai tupe a le malo.

Sa fautuaina e le afioga i le Senatoa ia Gaoteote Palaie Tofau ia le a’ami (subpoena) o le komiti faaofe a le LBJ, e su’esu’eina e tusa ai ma lenei mataupu, pe a toe fo’i tatalaina tauaofiaga a le fono faitulafono.