Pago Pago - AMERIKA SAMOA

O le aso Faraile ua mavae, na toe o’o atu ai le Faatonusili fou a le Matagaluega o le Soifua Maloloina, le susuga ia Dr. Saipale Fuimaono, i luma o Afioga i Senatoa, e soalaupuleina ia se pili taufa’aofi a le Senate, e suia ai le tulafono, mo agava’a ma’oti o le Faatonusili o le Soifua Maloloina.

Sa saunoa ai le Afioga i le Peresetene o le Senate, ia Tuaolo Manaia Fruean, e tusa ai ma tulafono o iai nei, o le Faatonu o le Soifua Maloloina, o se foma’i, ae sa ia ta’ua e faapea, i vaitaimi a’o ia galue i le falemai, o le Taitaifono o le HRB (Health Regulatory Board), o foma’i na se’ei i lea tofi, e pei o Dr. Edgar Reid, Dr. Nofo Siliga ma Dr. Aliiaiga. 

“Ona amata lea ona o tatou vaaia ua iai suiga,” o le saunoaga lea a Tuaolo. “Ua faatonu ni tagata e le o ni fomai.”  Ae o le komiti faafoe lea o le HRB, o i latou ia e gafa ma le tu’uina aut o laisene e mafai ai e fomai ona galulue i totonu o falemai a le teritori.

Ma na fesiligia ai e Tuaolo pe tatau ona avea i latou, e le o ni fomai ma taitaifono o le HRB. Sa ia faamalamalama mai e faapea, o suiga ia o lo’o i totonu o le pili taufa’aofi, e tatau ai i so’o se tasi e avea ma Faatonu o le Soifua Maloloina, o se foma’i.

I le saunoaga a le Afioga i le Senatoa ia Togiola T.A. Tulafono, sa ia ta’ua ai e faapea, i totonu o le Tulafono 13.0207 Maga (i), o lo’o ta’ua ai e faapea, “E tatau i le Faatonusili ona umia se tikeri i le soifua maloloina lautele, vaila’au, po o se isi vaega faapena; ia 10 tausaga pe itiiti mai, o le tomai masani i le soifua maloloina lautele, po o seisi vaega faapena, ia fa’aalia le tomai e pulea ai ma fai ma ta’ita’i.”

Ma sa saunoa ai Togiola, “O aso nei, ua tele foi lava ituaiga aoaoga eseese, i luga o [upega tafailagi] ‘online’, ua le ‘accredited’ [pasia] ina. E aofia ai ma le tulaga lea fa’afoma’i mai i le itu i Sasa’e o Amerika ma le itu Karipe.” 

O lea na fautuaina ai e le Senatoa ia le tu’uina o se faaopoopoga i le gagana o le pili, ina ia ma’oti mai ai le iai o se tikeri a le Faatonusili i le soifua maloloina, vailaau ma isi vaega faapea, mai i se kolisi po o se iunivesite ua pasia (accredited) e se ofisa faavae e gafa ma le pasiaina o a’oga (accredited agency).

Ua taofi le afioga Togiola, “o le tikeri lea o le a aumai e sapasapaia ai le tofiga, o se tikeri tauoloa.”  Aua ua ia talitonu, a le’i pasia se aoga, e mafai lava ona ta’u a latou fa’ailoga, o le fa’ailoga fa’afoma’i o vailaau, po o fa’ailoga fa’afoma’i o le soifua maloloina lautele.  Ae e le’i pasiaina, “e pule lava latou i a latou mea e fai.  E le o se a’oa’oga tauoloa.”

Na fesiligia ai e Togiola ia le Faatonu o le Soifua Maloloina, pe na te sapasapaia lea faaopoopoga e tu’u i totonu o le pili.

Sa faaleoina lona lagolago atoatoa o lea tulaga, ma sa ia ta’ua foi e faapea, o lenei mataupu sa faapea ona talanoaina i totonu o se tasi o a latou fonotaga, o se vaega o taumafai e fa’aleleia atili ai le latou auaunaga.  

Na faamamafaina foi e le faatonusili le tatau i fomai, ona umia ia tikeri mai i aoga ua mae’a ona pasia (accredited), e aofia ai ma le fa’amalosia o Laisene a le USMLE (United States Medical Licensing Examination) mo so’o se foma’i e saili galuega mai i totonu o le teritori.

Sa toe fa’aopoopo atu iai e Togiola pe mafai ona toe tu’u mai i lalo i le lima tausaga le agava’a na tatau ona galue ai se fomai, mai i le 10 tausaga o iai nei.  I sona taofi, sa fa’aalia ai e Togiola e faapea, ua umi tele le sefulu tausaga.  Ae e tele se tomai e mafai ona maua i totonu o le lima tausaga.

E le gata i lea, “A faatalitali i le sefulu tausaga, e i’u ina faigata ona saili nisi e mafai ona tofia.”

 Na faapea ona toe lagolago mai e Dr. Fuimaono ia le manatu faaalia a Togiola ma ia ta’ua ai e faapea, o lea lima tausaga, sa tatau ona fa’aalu i le galue i totonu o se falemai.

O lea na fa’atula’i ai loa e Togiola ia se mau mo le faia o suiga i le Vaega 13.0207 (e) o le pili, lea e faapea lona fa’aupuga, “O le Faatonusili e tofia ma faia lana auaunaga i le malie o le Kovana faatasi ai ma le fa’amaoniga a le Fono Faitulafono.”  Ae sui le upu ‘faamaoniga’ i le ‘faatagana’.