E 28 masina lea ua fa’asala ai e le Fa’amasinoga Maualuga se ali’i e 32 tausaga le matua mai Tafuna, ina ua ta’usala o ia i moliaga mamafa e 2 o le gaoi ma le talepe fale i le tulaga lua.

O le fa’asalaga fa’a falepuipui ua tuuina atu i le susuga a Heremoni Mapu, o se tasi lea o tuutuuga o lana nofovaavaaia e 5 tausaga, lea na tuuina atu e le Fa’amasinoga Maualuga i le vaiaso na te’a nei. O le ali’i Loia Fautua lagolago ia Ryan Anderson na tula’i mo ia, ae o le ali’i Loai Sili lagolago ia Laura Garvey na fai ma sui o le malo.

E 2 tagi eseese na tu’uaia ai e le malo ia Mapu. I le tagi muamua, na tu’uaia ai o ia i moliaga mamafa e 2 o le gaoi ma le talepe fale i le tulaga muamua, faapea ai ma le moliaga mama o le faaleaga meatotino i le tulaga lua.

I le tagi lona lua, na tu’uaia ai o ia i moliaga mamafa e 3 o le gaoi, faia o faamaumauga tau faasese, faapea ai ma le talepe fale i le tulaga muamua, atoa ai ma moliaga mama e 2 o le tu fua i le fanua o le isi aiga, faapea ai ma le faaleaga meatotino i le tulaga lua.

Ae i lalo o se maliliega na sainia e le ua molia ma le malo, na malie ai Mapu e tali ioe i moliaga mamafa e 2, le moliaga o le gaoi faapea ai ma le moliaga o le talepe fale i le tulaga lua.

I le tali ioe ai o Mapu i le moliaga e pei ona ta’usala ai o ia, sa ia ta’utino ai e fa’apea, i le po o le aso 23 o Setema 2018, na ia osofaia ai se faleoloa Asia i le afioaga i Petesa e ala i lona talepe o le faitoto’a pito i tua ae ulufale faamalosi ai i totonu ma le faamoemoe e faatinoina ai se solitulafono i totonu.

A o i ai i totonu, na ta’utino Mapu, sa ia gaoia le tele o oloa e silia i le $100 pe a faatupe. Sa ia gaoia fo’i se tinoitupe e $550 sa i totonu o se tama’i fagu sa i tua o le Ofisa, faapea ai ma se tusi siaki sa i luga o le laulau.

Na ta’utino atili le ua molia e fa’apea, sa ia aveese mai se siaki se tasi ai le tusi siaki a le pisinisi, ona ia tusi ai lea o lona igoa ma faamalosi le saini a le Pule o le pisinisi, ma ia talaina ai le tupe e $415 ma le faamoemoe e fa’aaoga mo ia lava.

Na taua e le malo i tuutuuga o le maliliega e faapea, o oloa na gaoia e le ua molia mai le faleoloa na a’afia, sa ia ave ma faaputu i totonu o se tama’i fale tu’ufua e tu i tua o lana ma’umaga i Tafuna, ae o isi oloa sa ia fa’atau atu i ni isi o ana uo ma maua ai ai tupe e fa’atau ai a latou pia ma ana uo.

Na sainia faamalosi fo’i e Mapu le siaki sa ia gaoia mai i luga o le laulau, e ala i lona tusia ai o lona igoa ma saini ai le igoa o le pule a le pisinisi, ina ia faafoliga ai o ia e ana moni le siaki.

E tusa ai ma faamaumauga a le malo, o le ali’i o Mapu, sa galue i le faleoloa na ia osofaia, o ia o se teu fanua. Mulimuli ane ni nai masina na sosoo ai talu ona fa’a faigaluega o ia o se teu fanua, ae suia loa lana galuega o se teu oloa i totonu o le Fale Teuoloa a le pisinisi.

I le taimi na galue ai le ua molia o se teu oloa, sa mafai ai ona ia maitauina vaega uma e teu ai oloa faapea ai ma nofoaga eseese uma i totonu o le Ofisa a le ali’i Pule o le faleoloa, lea e pito lava i tua o le faleoloa.

I le 2 masina talu ai a o le i osofa’i e le ua molia le faleoloa, na tuli ese ai o ia mai lana galuega, ina ua maua e le Pule lona ave faagaoiiina o ni oloa mai totonu o le faleoloa.

Ina ua maua lona avanoa mai le fa’amasinoga, na faatoese ai loa Mapu e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i tua e tausi ona matua ma fai sona aoga i lona aiga. Na talosaga lana loia i le fa’amasinoga mo se fa’asalaga faanofovaavaaia, ina ia mafai ai ona vave tatala le ua molia i tua e saili sana galuega e totogi ai lana sala faapea ai ma le tau o oloa sa ia gaoia.

Na taua e le ali’i loia fautua ia Anderson i le Fa’amasinoga le salamo moni o Mapu mai lana solitulafono, ma ua ia naunau fo’i e toe fia fo’i i lona aiga ina ia toe amata ai se isi suiga fou i lona olaga.

Na lagolagoina e le loia a le malo se fa’asalaga faanofovaavaaia, atoa ai ma le talosaga ina ia toe totogi e Mapu le $965 mo le tau aofa’i o oloa ma tupe sa ia gaoia mai le pisinisi na a’afia.

I le mae’a ai ona iloilo e le Fa’amasinoga o faafinauga a itu e lua, na taua ai loa e le fa’amasinoga e fa’apea, o le gaioiga sa faia e le ua molia e ala i lona gaoi ma talepe meatotino a le pule o le pisinisi sa galue muamua, ua atagia mai ai lona aveesea o le talitonuga sa tuuina atu ia te ia e avea ai o ia o se tagata faigaluega.

Na taua e le fa’amasinoga e fa’apea, na ofo atu e le pisinisi le avanoa faigaluega mo Mapu e galue ai, ina ia maua ai sona totogi e atina’e ai lona aiga ma lona olaga, ao lea ua ia gaoia tupe ma oloa mai le pisinisi sa alofa ia te ia.

Saunoa le fa’amasinoga e fa’apea, na pau le ituaiga faasalaga e tatau ona tuuina atu i le ua molia, o le nofovaavaaia lea mo se taimi umi ina ia mafai ai e le fa’amasinoga ona mata’itu se suiga i lona olaga.

E ta’i 7 tausaga i le falepuipui na faasala ai e le Fa’amasinoga Maualuga ia Mapu, o ia fa’asalaga e tuli eseese, lona uiga, e 14 tausaga na manatu le Fa’amasinoga e tatau ona taofia ai le ua molia i le falepuipui. Peita’i ua faamalumalu lona tuliina o lea faasalaga, ae ua faanofovaavaaia o ia mo le 7 tausaga i lalo o tuutuuga e ao ona ia usita’i i ai.

O ni isi o ia tuutuuga e aofia ai lona tuliina o masina e 28 i le toese i Tafuna, totogi le salatupe e $1,000, atoa ai ma le totogiina o le tupe mo le tau o oloa sa ia gaoia e $965.

Ua fautuaina e le fa’amasinoga ia Mapu, afai e magalo mai le toese, ia saili sana galuega tumau e maua ai sona totogi e totogi ai lana salatupe, aua ne’i ona toe solia se tulafono, aua fo’i nei toe tu vae i le nofoaga o lo o i ai le faleoloa na aafia i Nuuuli, a ia avea o ia ma tagatanu’u e tausisi i tulafono i taimi uma.

O le a aofia ai i le faasalaga faa falepuipui o le a tuliina mai e Mapu ia masina e 14 lea na taofia ai o ia e fa’atalitali ai se faaiuga o lana mataupu. Lona uiga, toe 14 masina e tuli e le ua molia ona magalo loa lea o ia.