Ads by Google Ads by Google

Falepuipui le alii na maua i ai fualaau fa’asaina


[ata: foa'i]
ausage@samoanews.com

Pago Pago, AMERIKA SAMOA

 

E 20 masina lea ua fa’asala ai i le toese i Tafuna le susuga a Anetone “Anthony” Valaau Jr, ina ua fa’amaonia e le Fa’amasinoga Maualuga moliaga o lona umia faasolitulafono o fualaau fa’asaina, e pei ona ta’usala ai o ia i lalo o se maliliega na latou sainia ma le itu a le malo. 

 

O lea faasalaga faa falepuipui, faatoa tuli pe a mae’a ona tuli le faasalaga faa falepuipui o lo o tuli e le ua molia i le Toese i Tafuna i le taimi nei.

 

E ui i talosaga a Loia mai itu e 2 o le faamasinoga faapea ai ma le faatoesega a le ua molia i le Fa’amasinoga mo se faasalaga faanofovaavaaia, e aunoa ma le toe tu’uina atu i ai o se isi faasalaga faa falepuipui e tuli e le ua molia, peita’i na manatu le Faamasinoga, talu ai le matuia o le gaioiga sa faia e le ua molia, e tatau ai lava ona ia tuliina se taimi umi i le Toese i Tafuna. 

 

O le vaiaso na te’a nei na tula’i ai Valaau Jr i luma o le Fa’amasinoga Maualuga mo le tuuina atu o lana fa’asalaga. O le ali’i loia fautua lagolago ia Ryan Anderson na tula’i mo Valaau Jr, ae o le tama’ita’i loia sili lagolago ia Kristine Soule na tula’i mo le itu a le malo.

 

Na ulua’i tu’uaia e le malo le ua molia i le moliaga o le umia faasolitulafono o vaega o le pauta fa’asaina o le aisa, le solitulafono mamafa e mafai ona fa’asala ai o ia i le toese mo le umi e le itiiti ifo i le 5 tausaga ae le sili atu i le 10 tausaga, pe fa’asala fo’i o ia i le salatupe e le itiiti ifo i le $5,000 ae le sili atu i le $20,000.

 

Ae i lalo o se maliliega na sainia e le ua molia ma le malo, lea fo’i na talia e le Fa’amasinoga Maualuga i le masina o Iuni na te’a nei, na malie ai le ua molia e tali ioe i le moliaga ua toe teuteu e le malo, le solitulafono mamafa o le umia fa’asolitulafono o vaega o le pauta fa’asaina o le aisa, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le sili atu i le 5 tausaga, poo le fa’asala i le salatupe e le sili atu i le $5,000, poo le fa’asala fo’i i fa’asalaga uma ia e lua.

 

I le tali ioe ai o le ua molia i le moliaga e pei ona ta’usala ai o ia e le Fa’amasinoga Maualuga, sa ia ta’utino ai e fa’apea, i se taimi o le aso 28 o Tesema i le tausaga e 2019 i Amerika Samoa, sa ia umia faasolitulafono ai vaega o le fualaau fa’asaina o le aisa e aunoa ma se faatanaga faaletulafono.

 

Na ta’utino atili e le ua molia e fa’apea, ina ua saili e Leoleo lana ta’avale, sa latou maua i ai vaega o fualaau fa’asaina o le aisa. Ina ua saili fo’i e Leoleo lona tino, sa maua ai fo’i se pepa iila o lo o i ai vaega o le pauta o le aisa.

 

Ina ua maua le avanoa o Valaau Jr mai le Fa’amasinoga, sa ia faatoese ai loa e tusa ai o lana solitulafono, ma ia talosagaina ai se isi avanoa se tasi mo ia se’i fo’i atu ai i tua e tausi ona matua ua matutua o la soifua, ma fai sona aoga i lona nu’u ma lana Ekalesia.

 

Sa ia faailoa i le Fa’amasinoga e fa’apea, o masina e 13 na taofia ai o ia i le falepuipui, ua ia a’oa’oina mai ai se lesona taua mo lona olaga, e le o se mea lelei le solitulafono. Sa ia ta’utino i le Fa’amasinoga lona salamo fa’amaoni e tusa ai o lana solitulafono, ma ia ia manatu fo’i e toe afua se isi taeao fou i lona olaga.

 

Na fesili le afioga i le ali’i Fa’amasino Sili lagolago ia Fiti Sunia i le ua molia, poo faafefea ona ia toe taumafai e toe susu’e se isi moemoe fou o lona olaga, pe afai o lea ua fa’alua ona ta’usala o ia i le Fa’amasinoga i solitulafono eseese.

 

Na tali le ua molia, “Ou te le toe tagofia le ‘ava malosi ma fualaau fa’asaina, ou te le o toe mafuta atu fo’i i a’u uo sa masani ona matou inupia ma ulaula i fualaau faasaina. Ou te iloa, o le mafua’aga tonu lava lea na ala ai ona fa’aletonu lo’u olaga, ona ua sese tagata ou te mafuta atu i ai,” o le tali lea a le ua molia.

 

I le toe fa’aauau ai o lana faatoesega, sa ia ta’utino i le Fa’amasinoga, afai ae toe maua se isi avanoa mo ia, o le a taumafai loa i lona malosi e gata ai e saili sana galuega e galue ai ma faaaoga tatau aso o lona olaga.

 

Na talosaga le loia fautua a le ua molia ia Anderson i le fa’amasinoga, ina ia tuuina atu se isi avanoa se tasi mo Valaau Jr e faamaonia mai ai i le Fa’amasinoga, o ia o se tagata ua suia atoatoa lona olaga.

Na taua atii e Anderson e fa’apea, o le amataga o le tausaga na te’a nei na faaleaoga ai e le Fa’amasinoga Maualuga tuutuuga o le nofovaavaaia a le ua molia, ma poloaina ai loa o ia na te tuliina le faasalaga faa falepuipui sa faamalumalu e le Fa’amasinoga mai le mataupu na ta’usala ai o ia i le 2016.

 

Na faailoa e Anderson i le Fa’amasinoga e fa’apea, o le taimi nei, o lo o tuli e Valaau Jr le faasalaga e 28 masina i le falepuipui, ina ua ia le usitaia tuutuuga o lana nofovaavaaia sa tuuina atu i le 2016, ina ua ta’usala o ia i le moliaga mamafa o le talepe fale.

 

Afai e manatu le Fa’amasinoga e tuuina atu se isi faasalaga faa falepuipui mo Valaau Jr, na talosaga Anderson ina ia tuli faatasi lea fa’asalaga ma le fa’asalaga fa’a falepuipui o lo o tuliina nei.

 

Na tete’e le loia a le malo i le talosaga mo se avanoa e tuli faatasi ai le faasalaga tuai a le ua molia atoa ai ma se fa’asalaga mai le mataupu fou e pei ona nofosala ai o ia i le Fa’amasinoga. 

 

Na taua e le tama’ita’i loia sili lagolago ia Soule e faapea, e talafeagai le tuuina atu o se isi faasalaga faa falepuipui mo le ua molia, ina ia mafai ai ona ia aoaoina se isi lesona taua mo lona olaga, e le o se mea lelei le soli o le tulafono.

 

Na faailoa e le Fa’amasinoga i le ua molia e faapea, ina ua ta’usala o ia e le Fa’amasinoga i le moliaga o lona taupulepule lea ma se isi tagata e fa’atino le solitulafono o le talepe fale, sa faamalumalu e le Fa’amasinoga le tuuina atu o ia i le falepuipui mo le 7 tausaga, ae sa tuu atu le avanoa e faanofovaavaaia ai o ia, ae lava na o masina e 28 na te tuliina i le toese.

 

E na o le 16 masina na tuli e le ua molia mai le faasalaga e 28 masina ae tatalaina loa o ia i tua e saili sana galuega e totogi ai lana salatupe e $2,000. Na poloaina fo’i o ia ina ia usita’i i tuutuuga o lana nofovaavaaia, peita’i o lea ua toe tasi le tausaga mae’a lana nofovaavaaia, ae toe molia mai o ia e le malo i se isi fo’i solitulafono mamafa, e mafua mai ina ua maua i lona tino atoa ai ma totonu o lana ta’avale fualaau fa’asaina.

 

Na faailoa atili e le Faamasinoga ia Valaau Jr e fa’apea, o le moliaga fou lea na tuuaia ai o ia e le malo, e mafai ona faasala ai o ia i le toese mo le umi e oo atu i le 10 tausaga, peita’i, o lea ua manatu le malo e faamama le faasalaga mo ia i le umi e 20 masina.

 

Talu ai o lea na ia faatinoina le solitulafono a o nofovaavaaia ai o ia, o lea ua manatu ai le Fa’amasinoga, e tuuina atu o ia i le falepuipui mo le umi e 20 masina. O lea faasalaga faatoa tuli pe a mae’a ona tuli lana faasalaga e 28 masina o lo o tuli i le Toese i le taimi nei.

 

Na faailoa e le Faamasinoga ia Valaau Jr e faapea, sa i ai le manatu e faasala o ia i le Toese mo le umi e 5 tausaga, peita’i ua manatu le Faamasinoga e tuu atu le avanoa mulimuli lenei mo ia. 

 

O le masina o Mati o le tausaga nei lea e mae’a ai ona tuli le faasalaga faa falepuipui e 28 masina a le ua molia, ma amata ai loa ona tuli lana faasalaga lona lua e 20 masina.