Pago Pago - AMERIKA SAMOA

O le vaiaso nei ua faamoemoe e malaga mai le afioga i le Palemia o Samoa, ia Fiame Naomi Mataafa, aua le faatautoina o le kovana fou ia Pula Nikolao Pula ma le Lutena Kovana fou ia Pulu Ae Ae Jr.

O lenei fa’atautoga, ua faamoemoe e faataunuuina i le aso 3 o Ianuari, 2025.

O i latou ua faamoemoe e faimalaga mai ma le afioga i le Palemia, e aofia ai Agafili Shem Leo, lea o lo’o fa’auluulu iai le ofisa o le Minisita o le Palemia ma le Kapeneta.

Ua faamautuina ai i le asiasi mai o le Palemia, ia le vavalalata o so’otaga i le va o Samoa ma Amerika Samoa, ma fa’aalia ai lo latou galulue faatasi faapea ai le felagolagoma’i.

O le afioga i le kovana fou ia Pula, o se tasi ua loa ona galue i totonu o le malo feterale ma ua silia ma le luasefulu tausaga o avea ma Faatonusili o le Ofisa o mataupu i le va i fafo, e mataituina motu teritori a le Iunaite Setete.  Ma o lo’o ia umia le tele o le tomai tau i galuega taitai faalemalo ma fegalegalea’iga i va o malo.

O le afioga ia Pulu Ae Ae Jr., o se tasi ua litaea mai i vaega’au o le Ami ma sa avea foi o ia ma Faipule i totonu o le Maota Fono, ma ua loa ona ia mataituina le ofisa lotoifale a le sui Faipule i Uasigitone.

I lana tautalaga ina ua manumalo, sa ta’ua ai e le alii kovana filifilia le manaomia ona galulue faatasi o tagata o le teritori, e fofoina ni manu’a po o fevaevaea’iga, ua leva ona tula’i mai ona o faiga faakemupeni.

Ma na ia u’una’ia ia tagata o le atunu’u ina ia alofa le tasi i le tasi, ma ia avea le Agaga o le Atua ma u’una’iga i luma.

I lana saunoaga ina ua mae’a le palota, sa taliaina ai fa’atausala e le afioga Lemanu Peleti Mauga ia le faaiuga o le palota ma ia ta’ua, e fa’aalia loa manatu o tagata, ua tatau loa ia i latou o lo’o auaunaina i latou, ona faalogo.  O le auala lea faa temokarasi.  

Na ia fa’aalia lona agaga fa’amalo ia Pula Nikolao Pula ma Pulu Ae Ae Jr.

I le mae’a ai o le fa’atautoga, o lo’o fuafuaina le toe taliu atu o le afioga i le Palemia, i Samoa aua le sauniga faaletausaga mo sauniga lotu ma anapogi, lea ua fuafua e faia i le aso 5 o Ianuari,