Ads by Google Ads by Google

Faila Amerika Samoa apili i le fa'amasinoga sitiseni Amerika

Ua fa’alauaitele e faipule i le Konekeresi, Aumua Amata ma le afioga le Kovana Sili o Amerika Samoa ua apili e Amerika Samoa le fa’aiuga a le fa’amasinoga e tusa o le Sitiseni o Amerika e tatau ona maua e i latou uma e soifua mai i Amerika Samoa.

 

O lea apili ua toe fa’aulu i le 10th Circuit US Court of Appeals lea na latou faia le fa’aiuga i le fa’amasinoga i le va o Fitisemanu i le Fa’amasinoga fetarale i le setete o Utah ma ua malo ai Fitisemanu i le fa’aiuga na latou taua’aoina ai le aia tatau ia Fitisemanu e avea ai ma Sitiseni o Amerika fa’atasi ai ma isi uma tagata Amerika Samoa o i lea setete.

 

Ua fa’ailoa e Aumua, o lea fa’aiuga i le avea ai o tagata Amerika Samoa ma Sitiseni o Amerika e tele lona a’afiaga i le aganuu a Samoa ma isi uma agaifanua a le atunuu e soloa’i i ai fanau i le lumana’i, ma e tatau ai ona toe apili lea fa’aiuga.

 

Ua faaalia fo’i e Aumua Amata, “O a’u ou te tu malosi i le fa’amautuina a’ia’i o le Aganuu a Samoa, ma e le tatau ai ona fa’atautaia lea mataupu i le mana’o o se tagata e to’atasi ina ia maua lona sitiseni Amerika, ae o le aia tutusa a tagata uma e tatau ona uia ala e tusa ma le finagalo fa’aalia o le mamalu lautele o le atunuu.”

 

“O le fa’amau na fuafua lelei e tua’a ua mavae ina ia maopoopo aia tatau a tagata Amerika Samoa fa’atasi ai ma le aganuu ia mautinoa e fa’aauau ona soloa’i mai tupulaga ma soifua ai, e ao lava ina fa’amautu atili aua o lea ua mae’a mausali i le maliliega na matu’u atu ai le atunuu ina ia tausia fa’afailele a le Malo Tele o le Iunaite Setete o Amerika. E ao ina mautinoa e le masofa le lona fa’avae i le taimi nei, ona o se mana’omia a nisi e to’aititi o le atunuu.”

 

“E le o mafai ona pule’esea nisi o mea totino ma ua i ai fo’i lona lava fa’avae ua mautu e fa’atautaia ai lana faigamalo ma tausia ai ona tagatanuu ma i latou uma ua agava’a ona soifua fa’atasia ai i ona eleele.”

 

Manatua, o le fa’aiuga ua i ai nei, ua fa’alauteleina ina ia aofia ai tagata uma, tusa lava pe o manana’o i ai i latou i lena suiga pe leai, ma ua le talafeagai lea mo aia tatau a tagata e avea ai i latou ma Nesionale o Amerika.