Ads by Google Ads by Google

Fa’auau Tapunia Samoa e oo atu ia Ianuari 27


Afioga i le Palemia o le malo o Samoa, Fiame Naomi Mataafa. [ata: Samoa Gov’t Facebook]

“Taofia malaga i le va o Samoa e lua”

 

APIA, Samoa--I lana saunoaga fa’alauaitele i le aso Gafua i Apia, ua fa’ailoa ai e le afioga i le Palemia, Fiame Naomi Matafa le fa’aauau ona tapunia atoa Samoa e o’o atu i le itula e 6 i le afiafi o le aso 27 o Ianuari. 

 

Sa muai fa’ailoa e le Palemia i le fa’aiuga o le vaiaso ua te’a, le tapunia o le atunu’u atoa mai i le ta o le 6 i le afiafi o le Aso Toonai na tea nei, seia oo mai i le 6pm i le afiafi o le aso Gafua, Ianuari 24. 

 

Ua mafua lea tulaga ona ua fa’amonia le pesia o le to’a 15 o le au malaga mai Ausetalia i le Koviti-19. 

 

Saunoa le Palemia e fa’apea ua fa’ailoa e le Matagaluega o le Soifua Maloloina ua toe faaopoopo ai leisi toalima (5) o i latou ua aafia i le faamai. 

 

“O lenei toalima o le aufaigaluega o loo vaavaaia i latou e toasefululima (15) na muamua pesia i le siama,” o se vaega lea o le saunoaga a Fiame sa fa’asalalauina i luga o leitio ma televise fa’apea foi i upega tafa’ilagi. 

 

“O i latou foi nei e toalima, o loo nonofo mau i totonu o nofoaga o loo fanofoesea ai i le falemai. O lona uiga ua 20 i latou ua aafia i lenei faamai e oo mai i le aoauli nei,” o a Fiamea lea. 

 

Ma o loo faaauau pea ona faia suega a i latou uma o loo faanofoesea e aofia ai ma le 208 o le aufaigaluega sa galulue i le aso na taunuu mai ai le vaalele mai Ausetalia. 

 

“Talu ai ona o le faamamafa a le tatou Malo i le puipuiga malu o si o tatou atunuu mai le faaono pepesi i tua o le faamai, atoa ai ma le faamautinoa lelei o le maea uma o suega ai latou o loo faanofoesea nei, ma isi foi suega ua fuafuaina mo le Aso Tofi nei,” o se saunoaga lea a le Palemia. 

 

Ma ua  faaiugafonoina e le Kapeneta le faaauau o le tapunia atoa o le atunuu, e afua atu i le 6pm i le afiafi o le aso 24 o Ianuari seia oo atu i le Aso Tofi, 27 Ianuari i le 6 i I le afiafi.

 

Peitai ua iai nai vaega ua talatala e pei o faleoloa uma, maketi, faletupe ma money transfer, o faletalavai ma fale e faatau ai cash power mo le atunuu e afua atu ona tatala i le 8am – 2pm i le afiafi o le Aso Lua, 25 Ianuari ma le Aso Tofi, 27 Ianuari o le vaiaso nei. 

 

“Ua faia lenei tulaga ina ia maua ai le avanoa mo faatauga a le atunuu ina ia maua pea meataumafa ma vaega e moomia mo aso o le a faaauau ai le tapunia o le atunuu. E tumau isi aiaiga e pei ona muai faailoa atu,” o a Fiamea lea. 

 

E iai aiaiga o lenei fuafuaga e pei o le faamalosia o tali fofoga, pepa tui, tu vava, atoa ai ma le tapu o tamaiti e i lalo ifo o le 12 tausaga le matutua.

 

“Peitai afai e aliae mai se tulaga ua pepesi le faamai i le atunuu, o le a toe agai loa le Kapeneta i le tulaga e tapu ai ona tatala nei auaunaga,” o se vaega lea o le saunoaga a Fiame.

 

Ua fa’ailoa e le faigamalo a Amerika Samoa le taofia o malaga i le va o Samoa ma le teritori mo le vaiaso e tasi e lagolago sua i taumafaiga a le malo o Samoa. 

 

Fa’amoemole le malo o Amerika Samoa e fa’ailoa i se taimi o i luma le aso e toe tatala ai alava’a i le va o Samoa e lua.