Ua amata fa’amalosia nei e le ASCC le latou fa’atamau fa’ataoto e puipuia ai le fanau a’oga, tagata faigalouega ma faia’oga uma i le ASCC mai le oo atu i ai o le Coronavirus ma so’ona pesia ai i latou ma ua amatalia lea ia Mati 12, 2020.

I soo se taimi nei i le lotoa a le tatou Kolisi Tuufa’atasi ua tatau ona e mua’i vala’au mai i le telefoni 699-9155, ma fa’ailoa mai le ua e fia talanoa i ai.

Ua fa’atonuina uma i latou e faigaluega tumau i le Kolisi sa malaga i fafo i luga o le galuega, ae ua toe malaga mai e toe amata faigaluega, ua fa’ailoa i ai e ao lava ina taofia i latou i aiga e suesuea mo le 14 aso ia mautinoa e le o afaina i le covid-19 a’o lei toe oo mai e faigaluega i le kolisi.

O i latou na malaga i fafo ona o latou fa’alavelave fa’aleaiga, e ao ina ave nisi o latou livi mo le 14 aso mo suesuega e toe fa’amautinoa atili ai e le o a’afia i le coronavirus.

Ua fa’atonuina fo’i fanau aoga, le aufaigaluega ma le vasega o faia’oga uma, afai ae matauina e i latou so’o se tasi sa malaga i fafo ma ua i ai ni auga o le coronavirus pe leai fo’i ia i latou, e tatau ona lipotia mai ae fa’anofo fo’i lea sui i lona aiga ma va’ava’aia toto’a ai pe mata o a’afia i le coronavirus mo le 14 aso ona fa’ato’a toe fo’i mai lea e faigaluega.

Mo so’o se tasi e fia ulufale e va’aia se tasi i le Kolisi e ao ina muamua afea le Ofisa o Leoleo a le Kolisi mo latou suesuega i le fa’ama’i fa’ato’a fa’aauau ai lea ona va’aia mlea sui pe taofia fo’i o ia. O le a tapunia le kolisi mai le o atu i ai o nisi i le aso Toona’i ma le Aso Sa.

Pe afai o le a tapunia loa faitoto’a o le Kolisi, o i latou uma e piki a latou fanau a’oga, e paka uma lea i fafo o le Kolisi, fa’apea fo’i ma i latou na malaga mai e avatu latou fanau i le a’oga.

O i latou uma e faigaluega, a’o’oga ma faia’oga i le Kolisi, e so’o se taimi lava e fa’ao’o atu ai le suesuega o le Coronavirus ia te oe e i latou ua mae’a fa’atulaga e va’ava’aia toto’a le soifua maloloina o tagata uma mai le Covid 19 e le pulega o le Kolisi.

Ua maea fa’atulaga le aufaigaluega e fa’amamaina atoa le Kolisi i so’o se potu ma mea e tagofia e le fanau a’oga ma le aufaigaluega i le tele o taimi, ma ua fa’atutu solo foi vaifafano i nofoaga e matele ina to’atele i ai fanau a’oga ma le aufalgaluega ina ia mautinoa e fafanoa lima o i latou uma.

Ua i ai fo’i i totonu o faleta’ele o le fanau a’oga ma tagata lautele fa’apea ma fale e fa’aaoga ele aufaigaluega, vaifafano ina ia mautinoa lava ua fa’amamaina a’ao o tagata uma i so’o se taimi i lea Laumua.

Ua totogia uma lava e le Kolisi lenei sapalai o mea uma e fa’amama ai le Kolisi atoa ma lima o le fanau a’oga le aufaigaluega ma faia’oga o le Kolisi.

Ua fautuaina i latou uma i le Laumua: Aua le toe naunau e fa’atasia solo i totonu o le lotoa; Ia taumfai e fa’aitiitia lava tagata e mafai ona auai i vasega ta’itasi ma i latou fo’i e fa’atautaia ni aoaoga faapitoa: fa’amalosia le mamalu o fanau a’oga, aufaigaluega ma faia’oga ina ia to’aga e fa’amama lelei mea latou te fa’aaogaina, fa’amama lima a’o le’i tagofia tou mea’ai, ma fafano lima pe a ulufale i vasega ta’itasi.