Pago Pago - AMERIKA SAMOA

O le aso Gafua o le vaiaso ua mavae, na faataunu’uina ai fono fa’alauaitele a le Senate, e tapaina ai finagalo ma manatu o le mamalu lautele, e tusa ai ma le mataupu lenei i le ‘veto override’ lea ua fa’aopoopoina i luga o pepa palota, lea o le a palotaina e tagata palota, i le aso.

Sa le’i totale nisi na auai atu i lea fonotaga, ma e na’o le to’afitu sa faaleoina o latou manatu i lea aso.

O i latou ia, na Sofia ai Sinasina Joe Langkilde, o le afioga Su’a Alexander Jennings, le Faipule mai Swains, o le susuga ia Kenneth Kuaea ma le faletua ia Luisa Kuaea, lea o lo’o tausinio nei mo le tofi o le sui Faipule i Uasigitone, o James McGuirde, o le sui tauva mo le tofi Faipule, le susuga ia Kiso Skelton, faapea ai ma le alii loia ia Nathaniel Sotoa Savali.

I le saunoaga a Langkilde, sa le’i iai sona manatu e molimau i lea aso, ae sa fia auai e fa’alogologo ma fa’afofoga i le mafuaaga o le ‘veto override’, ina ia mafai ona ia toe fo’i atu ma fa’asoa atu i lona aiga, ina ia mafai ai ona palota malamalama.

Na fesiligia e Tuaolo ia Langkilde, po o le fea tonu itu o lenei mataupu, e le o malamalama ai.  Sa faamanino mai e Langkilde, o lo’o ia fia mansion i manatu a afioga i Senatoa e tusa ai ma lenei faaopoopoga, aua e na te lagolagoina lenei lava mataupu.

Sa fa’aauau le saunoaga a Langkilde e faapea, i sana suesuega, a maua e le Fono ia palota e 2/3 e taofia ai le ‘veto’ a le kovana i so’o se tulafono, o le a muta ai loa iina lena mataupu po o lena tulafono, aua o lea ua fa’ailoa le finagalo a taitai o le atunu’u.

Na faamamafaina mai e le afioga i le Senatoa ia Malaepule Saite Moliga ia vaega patino ma gaioiga eseese o lala e tolu a le malo.  Ma na ia faamanino mai e faapea, o lenei faaopoopoga o le ‘veto override’, o lona autu ina ia faamaonia le iai o le faamaoni ma le paleni i le va o le fono faitulafono ma le faigamalo.

I le taimi nei, e ‘veto’ e le kovana ia se pili, e le o iai i le Fono le malosiaga e suia ai lea faaiuga.  Ae afai ae pasia le pili lenei o le ‘veto override’, o le a mafai e le Fono ona sopoia le faaiuga a le kovana e ‘veto’ pe fa’aleaogaina ai so’o se pili.

Na saunoa Malaepule, o le uiga moni lea o le faatemokarasi, aua o le a le toe manaomia ona o’o atu le pili lea ua mae’a ona ‘veto’, i le Failautusi o le Initeria, mo le pasiaina mai.

Na faamanino mai foi e Malaepule, o lenei fa’aopoopoga/pili, e le o se taumafaiga ina ia toe faaopoopo se malosiaga i le Fono, ae ia faamautuina le tutusa o malosiaga i lala uma e tolu a le malo.  Na saunoa Malaepule, na fa’ata’atia e tua’a ua mavae atu, ia le faavae mo le malo, ina ia mafai ona faia ai e fanau o le lumanai, e o gatasi ma o latou vaitaimi.

Na fa’aopoopo mai le afioga Tuaolo e faapea, o so’o se suiga lava i le faavae, e tatau ona o’o atu i le Failautusi o le Initeria fa’apea ma le Konekeresi.  Ae peitai, ua mae’a ona fa’aulufaleina e le afioga i le sui Faipule ia Uifaatali Amata, ia se i’ugafono, e ave’esea ai le Koneresi mai i lea faasologa.

I se manatu fa’aalia a Su’a Alexander Jennings, sa ia saunoa ai e faapea, sa tatau lava ona faia lenei suiga mai lava i le aso na filifilia ai e Amerika Samoa lona ulua’i kovana.  O le ‘veto override’ o se tulaga e tatau ona taoto i le fono faitulafono.

Na saunoa Su’a, o suiga ia o lo’o faia e le Konekeresi i le Faavae o Amerika Samoa, ua mafai ai ona siaki ma paleni ia tali uma a le Matagaluega o le Initeria mo Amerika Samoa ma i le 46 tausaga ua tuanai atu, o lo’o maua lava e Amerika Samoa mea uma o mana’o ai mai i le Initeria (DOI) aua o lo’o iai le Konekeresi.

I finagalo fa’aalia a Kenneth ma Luisa Kuaea, sa o la fa’aalia foi lo la auai e fa’alogologo ma maua se malamalama’aga e tusa ai ma lenei mataupu.

Sa saunoa Luisa e faapea, i le palota o le 2022, e 61% na tete’e i le ‘veto override’, ma atonu o le mafuaaga o lea tulaga, ona e le i tele se malamalama’aga a tagata, e uiga i lenei pili, ma sa iai foi se elemene o le le fa’atuatua, pe afai ae ave’esea le Failautusi o le Initeria mai i le pasiaina o pili, e ‘veto’ e le kovana.

Na fa’aleoina e Tuaolo se fa’ata’ita’iga o lenei mataupu, pe a ‘veto’ e le kovana ia se pili ua pasia e le Fono, e fa’ataga ai ona fa’apa’u pepe (se’i tulou).  Ae peitai, e le auai ai le kovana i lea manatu, o lea ua ia fa’aleaogaina (veto) lenei pili, ae o lo’o finau atu pea le Fono, e iai i le tina po o tamaitai, le aia tatau e filifili ai.

Sa saunoa Tuaolo, o le mafua’aga tonu lenei o lenei fa’aopoopoga i le Faavae.

Na fa’asoa mai le afioga i le Senatoa ia Poumele Pete Poumele e faapea, sa fautuaina o ia e lona tua’a ina ia aua nei manatu mama i le tofiga taitai, ma ia tausinio i taimi uma, e saili auala e fa’aleleia pe si’itia ai tulaga o soifuaga mo tagata.  Na ta’ua e Poumele e faapea, i sona talitonuga, e aoga lenei faaopoopoga/pili, aua e fa’amautuina ai ‘check and balance’ i le faatemokarasi, e fa’ailoa mai ai, o lo’o o gatasi le malo o Amerika Samoa ma suiga o taimi.

Sa toe faaopoopo mai Malaepule ma ia toe faapea mai, e le o taumafai le Fono e saili se faaopoopoga i lona paoa, ae o le a ‘override’ e le Fono i’ugafono (ua ‘veto’ mai e le kovana) o lo’o iai so latou talitonuga, e aoga mo le atunu’u. Na saunoa foi Malaepule, ua silia ma le 100 tausaga, talu ona faavaeina le malo o Amerika Samoa ma sa lu’itauina e o tatou tua’a ia fanau o le lumanai, ina ia faia suiga e o gatasi ma le soifuaga.

Na faamamafaina mai foi e Malaepule le le mafai ona agai i luma le malo i le senituri 21, i faaiuga sa faia i le 100 tausaga ua tuanai.

O se tasi o molimau na saunoa i le aso Gafua, o le susuga lea ia James McGuire ma sa ia faaleoina foi lona lagolagoina o lenei mataupu.  O McGuire, o lo’o avea ma lagolago faapitoa i le Peresetene o le Senate.

Ma sa ia fa’aalia mai lona palota i le tausaga e 1976, ina ia mafai ona palota lava e Amerika Samoa lona lava kovana ma sa ia fa’aalia lona agaga fa’afetai i kovana ma faigamalo ua mae’a atu.  E le gata i lea, sa ia fa’aalia foi lona agaga fiafia ma le faafetai, ona o le fa’asalalauina o iloiloga a le maota fono, ma ia faamamafaina le taua o le aoaoina o tagata o le atunu’u, e tusa ai ma lenei mataupu.

Sa ta’ua e McGuire le taua tele o le malamalama o fanau talavou e tusa ai ma lenei mataupu, ina ia mafai ona o latou palota ma le manino.

Na saunoa foi McGuire, e tusa ai ma sona lava lagona, sa tatau foi ona auai le sui Faipule o Amerika Samoa i Uasigitone i lenei fono tele, ina ia mafai ona faaleoina sona manatu e tusa ai ma lenei mataupu.  Faapea foi le Faatonusili malolo o le ofisa o le Initeria.

Sa na’o le pau le fa’asea a McGuire na faaleoina i lea aso, ona o le toatele o fanau talavou, e latou te le malamalama i le Faavae ma i sona talitonuga faaleo, e tatau ona aoaoina lea tulaga i a’oga tulaga muamua ma a’oga maualuluga.  

Na saunoa McGuire e faapea, o le toatele o fanau e fa’au’u mai i aoga maualuluga ma tauto i totonu o vaega’au, ina ia puipuia le Iunaite Setete, ae to’alaiti e malamalama i le Faavae o le Iunaite Setete po o le Faavae Teuteuina a Amerika Samoa.

Sa fa’aleoina e Malaepule, lona lagolagoina o le molimau a McGuire ma ia faamatalaina ai nisi o fanau aoga sa asiasi atu i le Maota Fono.  Lea na ia fesiligia ai nisi o fanau aoga, po o ai e na te iloa le ituaiga malo o iai Amerika Samoa.  Ae tali se tasi o fanau, o le malo a le kovana.  Na saunoa Malaepule e faapea, e leai ma seisi o nei fanau aoga, sa iloa le tali sa’o, ina ua fesiligia i latou e tusa ai.

O se isi mataupu na faaleoina e McGuire i lea aso, o le mataupu lea i le paketi a le Ofisa o le sui Faipule i Uasigitone ma sa saunoa McGuire, o lo’o iai i tagata totogi lafoga a Amerika Samoa, le aia tatau e iloa ai po o fea, ae po o faapefea foi, ona fa’aaogaina a latou tupe.

O le molimau na soso’o ai, o le susuga ia Kiso Skelton, 25 tausaga o lona soifuaga, ma o lo’o ia tausinio nei mo se tasi o nofoa i totonu o le Maota o Faipule.  

Sa ia fa’aleoina e faapea, o se tasi o ona atugaluga na mafua ai ona ia palota leai i lenei mataupu o le ‘veto override’, o se atugaluga foi lea o lo’o fa’asoa atu e nisi o ana uo, ona e ui lava ina e foliga mai o lo’o tutusa le fono faitulafono a Amerika Samoa i le fono faitulafono a le Iunaite Setete, ae peitai, i Amerika Samoa, e na o Faipule o lo’o palotaina, ae o Senatoa, o lo’o filifilia.

Na saunoa Skelton, o lo’o iai se talitonuga i tagata palota, e mafai ona u’unaia Faipule i le faataunu’uina o a latou tiute e ala i le palota, ae e le mafai ona faia lea tulaga i le Senate.

Sa faamanino mai e Malaepule e faapea, ina ua fa’avaeina le Fono, sa tasi lava lona maota, o le Maota o Alii.

Ae i se taimi mulimuli ane, na a’e ai se manatu i taitai ma matai o Tutuila ma Manu’a, faatasi ai ma le faatagana mai i le malo a Amerika, e tatau ona iai seisi maota e palotaina ona sui, lea ua iai nei le Maota o Sui, po o le Maota o Faipule.  Ae o le Senate, e filifilia mai ona sui e itumalo taitasi.

Sa saunoa Malaepule e faapea, e le tatau ona manatu faapea ia le malosi o le atunu’u, e na o le Maota o Sui o lo’o palotaina.  Ae o leo o tagata i le filifiliga o Senatoa, e auala mai i taitai fa’alenu’u, i totonu o itumalo.

I le saunoaga a le afioga i le Senatoa ia Magalei Logovi’i, sa ia ta’ua ai e faapea, ina ua ia toe fo’i mai ina ua mae’a ana a’oa’oga i le 1974 ma galue i le Ofisa o Paketi, sa masani ona ia auai i iloiloga o paketi, a le Senate, i tausaga uma.  Ma o le taimi foi lea, na 25 ai ona tausaga e pei o Skelton.  Ma sa ia te ia foi lea manatu e tasi, e uiga i le maota o le Senate.  O se maota o lo’o tofafa ai Senatoa, e leai se latou galuega o faia, ae o lo’o totogi.

Ae peitai, na saunoa Magalei, ua ia malamalama nei i le loloto o le tofa ma le fa’autaga o afioga Senatoa o lo’o iloiloina mataupu ma faia ni faaiuga aua se lelei o le atunu’u.

I le molimau a le alii loia ia Nathaniel Sotoa Savali, sa ia ta’ua ai e faapea, e ui ina o lo’o malamalama tagata i le mataupu o le ‘veto override’, ae e o le toatele, e le o manino i lona tala’aga.

Sa ia ta’ua e faapea, i sana su’esu’ega i le mafuaaga na le fa’aopoopoina ai lenei mataupu ‘veto override’ i totonu o le Faavae, na ia maua ai le le’i nofo leleia i le DOI o lea tulaga ma e le i iai so latou manatu, ua gafatia e Amerika Samoa ona faia ana lava faaiuga, ma e le’i finagalo le DOI ina ia fesiligia se faaiuga faia a le kovana.