Pago Pago - AMERIKA SAMOA

I le fa’aauauina ai o felafolafoaiga manatu a sui tauva mo le tofi Kovana ma le Lutena Kovana, i se fonotele na tu’ufa’atasia e le Asosi a Loia o Amerika Samoa, i le lua vaiaso ua tuanai, sa faapea ona faaleoina ai e paga sui tauva ia o latou manatu ma fuafuaga e tusa ai ma le fa’ama’i ua sasao nei i totonu o Amerika Samoa, i tulaga o fualaau faasaina.

Ae e le’i o’o atu le fa’aaliga manatu a sui tauva i le fesili e uiga i fualaau faasaina, na muai fesiligia i latou e tusa ai ma ni a latou sasi matuia, na faia i le taimi o latou umia ni tofiga faaletaitai, i le tautuaina o le mamalu lautele, o lo’o faamoemoe, e le toe tupu mai i le lumanai.

I le tali mai a le susuga ia Vaitautolu, lea o lo’o tausinio nei mo le tofi Kovana, sa ia ta’ua ai e faapea, o lona tofiga lata mai nei, o le faatonusili o le Ofisa o Litaea ma e le mafai ona saunoa faalauaitele i le fesili, ona e leai sona sasi i totonu o lana galuega.  Ma sa tali tutusa a la tali ma lana paga, lea o lo’o tausinio mo le tofi Lutena Kovana, ia Maefau Dr. Mary Taufetee.  O Taufete’e sa avea ma faatonusili o le Arts Council ma sa ia saunoa, e na o le pau lava le sasi o lo’o ia manatua, ae o se sasi a le faigamalo, o le fa’ate’aina o ia mai ona tiute e aunoa ma le ui i ala o le tulafono.

I le tali mai a le tofa ia La’apui mo le paga a Lemanu ma Laapui, sa ia ta’ua ai e faapea, e le o latou ni agelu po o Iesu Keriso.  Ma e le atoatoa foi la latou auaunaga.  Ae o i latou, o auauna a Amerika Samoa.  

Sa fa’aalia e La’apui le ia te i la’ua o se mitamitaga tele ona o le filifilia o i la’ua e Amerika Samoa e avea ma o latou taitai, i le 4 tausaga talu ai.  Ma o aso uma e la te taumafai ai lava e fa’ailoa atu i tagata o le atunu’u lo la agava’a ma e tonu ma sa’o a la filifiliga sa faia.  Ma e molimau a la galuega.

Na saunoa ai foi La’apui, atonu o le tulaga lea e ‘ese mai ai la la’ua paga, i lo isi paga tauva.  Aua o lo’o talanoa isi sui tauva e galuega e mafai ona o latou faia, ae o lo’o talanoa i la’ua ma Lemanu i galuega ua mae’a ona faia, e pei o auala i Poloa, Fagasa ma Afono.  O fualaau faasaina e 200+ pauna lea sa mafai ona maua, i lalo o le taitaiga a Lemanu.

I le tali mai a le afioga Pula, sa ia fa’asoa mai ai e tusa ai ma lana galuega mulimuli na iai, o le avea ma faatonusili o le Ofisa a le ‘Insular Affairs’ i totonu o le Matagaluega a le initeria, i le laumua i Uasigitone.  Ma sa ia fa’aluaina le saunoaga a Laapui, e faapea, e le o latou o ni agelu po o Iesu Keriso.

Sa toe saunoa Pula, e le o se tulaga lilo pe tau nana, le le fiafia o tagata o Amerika Samoa, ma o le mafua’aga lea ua o la filifili ai ma le afioga Pulu, e avea ma sui tauva i lenei tausaga palota, ona o lo la alolofa i tagata o le atunu’u.

Na ta’ua foi e Pula e faapea, e le o manana’o i ni tupe, ae o lo’o manana’o ia fa’ata’atia se lumanai, ia faia ni faaiuga faigata ma le malo, ina ia mafai ai ona le toe a’afia le faigamalo fou i soligatulafono.

O le fesili numera fa, sa fesiligia ai sui tauva e tusa ai ma le fa’ama’i ua a’afia tele ai nei le atunu’u, o le tulaga lea i fualaau faasaina.  O lo’o fia malamalama le mamalu lautele, po o a ni fuafuaga a sui tauva, pe afai e manumalo i le palota ia Novema 5, 2024, e tineia ai ma fa’asaga tau atu i lenei fa’ama’i.

Sa saunoa le tofa La’apui, i le tausaga e 2022, na faavaeina ai e le faigamalo a i la’ua ma Lemanu, ia se komiti ua ta’ua o le ‘Comprehensive Substance Abuse Council’, lea o lo’o ia mata’ituina, aua se taumafaiga e fofoina lenei fa’afitauli.  O lenei komiti e tulimata’i tulaga o le tulafono, a’oa’oga ma le toe faaleleia.  Na faapea foi ona fa’asoa mai e La’apui nisi o fuainumera e tusa ai ma fuala’au faasaina ua mae’a ona aoina e le malo, ma tagata ua lokaina ai.

Na ta’ua e La’apui, na amata mai ia Novema 2023, se’ia o’o mai nei, ua silia ma le 200 pauna o aisa ua mafai ona taofia pe aveesea e ofisa faamalosi tulafono a Amerika Samoa, lea e aofia ai le ofisa o leoleo, ofisa o tiute ma le vaega a le Homeland Security.

Sa faapea foi ona fa’asoa mai e Laapui nisi o polokalama ua mae’a ona fa’avaeina, e le gata i totonu o ofisa a le malo, ae o pisinisi tua, e fesoasoani ai i tagata o le atunu’u, ua a’afia i lenei faafitauli.

I tulaga tau aoaoga, na fa’asoa mai e La’apui i le iai o le fale a le DYWA, e avea ma nofoaga saogalemu mo fanau ma tagata o le atunu’u.

Sa aloaia e le sui tauva ia Pulaalii Nikolao Pula ia galuega ua faatinoina e matagaluega fa’amalosi tulafono ma polokalama e pei ona sa faaleoina e La’apui, ae peitai, sa faamamafaina mai e Pula ia nofoaga o lo’o mafai ona ulufale mai ai fualaau faasaina i totonu o le teritori, o lo’o manaomia ona puipui malu pe a iai se mana’o e fofoina lelei lenei faafitauli.

Sa saunoa Pula, afai e le faaleleia le puipuiga o malae vaalele ma uafu mai i le ulufale mai o fualaau faasaina, e le mafai ona fofoina lenei faafitauli.  Sa ia ta’ua foi le iai o ni ‘alia’ o lo’o feoa’i i le tu lua o po ma ao, i le kilivaina o fualaau faasaina i nisi o eria.  

Na ta’ua e Pula, o le vaega muamua lava lenei o le a ia faia, o le sailia o se vaegatupe e mafai ona fesoasoani i tagata o le atunu’u, o lo o latou tagofia le ava malosi.  Na fa’asoa mai Pula, i sana asiasiga i le falepuipui ma sa faate’ia o ia i feoaiga a tagata i le ulufale ma le ulufafo mai o tagata.

Na saunoa foi Pula, e le gata i le fausia o ni nofoaga e mafai ona fesoasoani i le tineia o lenei faamai (Rehab Center), ae o le a o la galulue so’otau’au ma Pulu ma afioaga ma ekalesia ina mafai ona tineia lenei faafitauli.

I le fa’asoa mai a le afioga Vaitautolu Talia Faafetai, sa ia ta’ua ai lona le talitonuina o le aoga o nisi o polokalama o iai nei, mo le tineia o lenei faalavelave.

Na saunoa Vaitautolu i lona fia vaai i fa’amaumauga e tusa ai ma le aoga o polokalama ua mae’a ona iai mo le fofoina o lenei faafitauli, ina ia iloa ai po o aoga nei polokalama.