E 30 aso lea ua faasala ai i le Toese i Tafuna le ali’i faigaluega a le malo lea ua ta’usala e le Fa’amasinoga i lona tuuina atu o laisene ave ta’avale pepelo i ni ali’i ave pasi se to’alua i le 2 tausaga talu ai.

E ui e 20 masina na manatu le Faamasinoga e faasala ai le susuga a Matthew Tafua i le Toese, o se tasi lea o tuutuuga o lana nofovaavaaia e 5 tausaga, peita’i ua manatu le Faamasinoga e tuli e le ua molia o nao aso e 30, lea e aofia ai ma aso e 10 lea na taofia ai o ia i le ulua’i taimi na faatoa faila ai e le malo le latou tagi, ae faamalumalu uma e le Faamasinoga masina e 19.

O le vaiaso nei na tula’i ai Tafua i luma o le Fa’amasinoga Maualuga mo le lauina o lana fa’asalaga. O le alii loia fautua lagolago mo tagata lautele ia Rob McNeill na tula’i o Tafua ae o le ali’i loia sili lagolago ia Doug Lowe na tula’i mo le itu a le malo i lenei mataupu.

Na ulua’i tu’uaia e le malo ia Tafua i moliaga mamafa e 2 o le faiga lea o faamaumauga tau faasese; faapea ai ma moliaga e 2 o le faia o gaioiga le amiotonu a o avea ai ma tagata faigaluega a le malo.

Ae i lalo o se maliliega na sainia e Tafua ma le malo i le masina o Tesema na te’a nei, lea fo’i na talia e le Fa’amasinoga, na malie ai o ia e tali ioe i le moliaga e tasi o le faia lea o gaioiga le amiotonu fa’aalatua a o avea ai ma tagata faigaluega a le malo.

I le tali ioe ai o Tafua i le moliaga mamafa e pei ona ta’usala ai o ia e le Fa’amasinoga, na ia ta’utino ai e fa’apea, i le aso 18 o Iulai 2018, sa ia tuuina atu ai se laisene ave taavale pepelo ia Gasoo Gasolo e aunoa ma ni faamaoniga mai le Ofisa o Taavale Afi a le malo i Tafuna, mo le faamoemoe na te maua ai se taui, o se tinoitupe lea mai ia Gasolo.

E pei ona taua i tuutuuga o le maliliega a Tafua ma le malo e faapea, o lenei mataupu na alia’e ina ua taofia e Leoleo se pasi la’u pasese i le aso 15 o Setema 2018 ina ua molimauina le mae’a o le aoga o le pepa lesitala o le pasi la’u pasese. O le susuga a Gasolo, o ia lea sa faafoeina le pasi i le taimi na taofia ai e Leoleo.

Ina ua fesiligia e Leoleo le laisene ave taavale a Gasolo, na vaaia ai luga o le laisene, o lo o i ai ni tusilima (handwriting). Na faailoa e Gasolo i Leoleo, o lona laisene ave taavale o se laisene na faia i se auala faaalatua i le Ofisa o Taavale Afi a le malo, e aunoa ma le uia o ala o le tulafono, e le o i ai fo’i se saini a le Pulesili o le Ofisa o Taavale Afi e faamaonia ai, sa tuu aloaia mai lona laisene ave ta’avale.

Na faailoa atili e Gasolo i Leoleo e fa’apea, o se tagata faigaluega a le Ofisa o Taavale Afi, o ia lea na fesoasoani i le tuuina mai o le laisene ave taavale pepelo ia te ia.

Na faamatala e Gasolo i Leoleo e faapea, na alu i le aso 17 o Iulai 2017 e siaki togi o lana suega, ae na faailoa ane e le Leoleo o loo gafa ma le faia o suega mo ave ta’avale, e le i pasi lana suega sa faia, a o lea ua toe tuuina atu lona igoa i le lisi o ave taavale ia ua faamoemoe e su’e i le isi suega e sosoo ai.

Na aga’i mai i fafo Gasolo ma le Ofisa ma la fetaui ai ma le susuga a Tafua, ma ia faamatala loa ia Tafua le faaletonu ua tula’i mai ia te ia, ma filifili ai loa Tafua e ofo atu lana fesoasoani mo ia, ae na te totogiina le tupe e $60 mo lea fesoasoani.

O le aso na sosoo ai, Iulai 18, na toe aga’i atu ai Gasolo i le Ofisa o Taavale Afi ma tuu ia Tafua le $60, ae tau aao atu e Tafua le pemita ave taavale lanu samasama e faamaonia ai le mafai lea ona ia faafoeina se taavale la’u pasese i luga o le alatele a le malo.

Ina ua maua le avanoa o Tafua mai le Fa’amasinoga, sa ia faatoese ai loa e tusa ai o lana solitulafono sa faia, ma ia talosagaina ai se isi avanoa mo ia. Sa ia faatoese i le malo faapea ai le Ofisa o Taavale Afi, i lona solia o le tulafono. Sa ia faatoese fo’i i lona aiga, nu’u a le Ekalesia ona o le ta’uvalea o i latou uma i lana gaioiga sa faia.

Na taua e le ua molia o ia o se alii talavou e faatuatuaina e lana Ekalesia i Nuuuli, na te ta’ita’ia fo’i se tasi o vaega o sauniga a le Ekalesia i Aso Sa ta’itasi.

Na molimau lana faifeau i luma o le Fa’amasinoga e faatatau i uiga lelei o Tafua. Na taua e le afioga a Patele Vaiula Iulio e faapea, o Tafua, o se tasi lea o talavou na te faatuatuaina i taimi o sauniga a le Ekalesia. E ola finau, maualuga le tapulaa faaleagaga, o ia fo’i o se talavou e mataalia i soo se taimi.

O le taimi nei, ua 6 masina talu ona faigaluega o ia i le Falema’i o le LBJ, talu ona faate’a mai i lana galuega sa galue ai i le Ofisa o Taavale Afi.

Na tutu faatasi loia a itu e lua e finau i le faamasinoga mo se faasalaga faanofovaavaaia mo Tafua. Na taua e McNeill e faapea, e ui i le matuia o le gaioiga sa faia e le ua molia, peita’i o lona lava lea talitonuga, e fiafia e fesoasoani i isi tagata. Na finau McNeill ina ia aua nei i ai se taimi faa falepuipui e tuli e Tafuna i le Toese.

Na lagolago e le loia a le malo le talosaga a le loia mo le itu tete’e, e ui sa ia taua le matuia o le gaioiga sa faia e Tafua. Na taua Lowe e faapea, ia avea le mea sese ua faia e lenei alii talavou o se aoaoga mo lona olaga tuputupu a’e.

Saunoa le afioga i le ali’i Faamasino Sii lagolago ia Fiti Sunia e fa’apea, ua faigata i le Faamasinoga ona faatusatusa molimau ua latou faafofoga i ai. E ui o lea ua nofosala Tafua i se solitulafono mamafa toe matuia, peita’i o molimau e faatatau i lona olaga ua atagia mai ai, o ia o se talavou e amio lelei, faatuatuaina toe faamuamua le Atua i lona olaga.

Saunoa Sunia e faapea, e tau leai ni tagata solitulafono e maua i lenei ituaiga amio, peita’i, e tatau fo’i ona iloa e Tafua, o lana gaioiga sa faia e matuia tele.

O afioga i Faamasino Lagolago ia Mamea Sala Jr ma Tunupopo Alalafaga na lagolago i le afioga a Sunia i le tuuina mai o le faaiuga o lenei mataupu.