E 15 tausaga lea ua faasala ai e le Fa’amasinoga Maualuga le susuga a Elliott Siaumau Jr e taofia ai i le Toese i Tafuna, ina ua fa’amaonia e le Fa’amasinoga moliaga sa tu’uaia ai o ia e le malo.

O le vaiaso na te’a nei na tula’i ai Siaumau Jr i luma o le afioga i le ali’i Fa’amasino Sili ia Michael Kruse mo le tuuina atu o lea fa’asalaga. O le ali’i Loia Fautua lagolago ia Rob McNeill na tula’i mo Siaumau Jr, ae o le ali’i Loia Sili lagolago ia Doug Lowe na fai ma sui o le malo i lenei mataupu.

E 4 tagi eseese na tu’uaia ai e le malo le susuga a Siaumau Jr. I le tagi muamua, na tu’uaia ai Siaumau Jr i le moliaga mamafa e tasi o le tete’e atu i Leoleo ao taumafai e pu’e faapagota o ia.

I le tagi lona lua, na tu’uaia ai Siaumau Jr i le moliaga mamafa o le faomea i le tulaga muamua; o le moliaga mamafa o le gaoi; ma le moliaga mama e tasi o le faaoolima i le tulaga tolu.

I le tagi lona tolu, na tu’uaia ai i moliaga e 2 o le faaleaga o meatotino a se tasi tagata i le tulaga muamua. Ma le tagi lona fa, na tu’uaia ai i le moliaga e tasi o le umia faasolitulafono o vaega o le pauta fa’asaina o le aisa; faapea ai ma le moliaga e tasi o le umia faasoltulafono o le pauta o le aisa ma le fa’amoemoe e tulei ma fa’atau atu i isi tagata.

Ae i lalo o se maliliega na sainia e le malo ma le ua molia, lea fo’i na talia e le Fa’amasinoga Maualuga, na malie ai Siaumau Jr e tali ioe i moliaga e 3, le moliaga o le tete’e atu i Leoleo ao taumafai e pu’e faapagota o ia, faapea ai ma moliaga e 2 o le faaleaga meatotino i le tulaga muamua.

I le tali ioe ai o Siaumau Jr i moliaga e pei ona ta’usala ai o ia, sa ia ta’utino ai e fa’apea, i se taimi o le aso 21 o Aperila 2017, sa ia tete’e atu ai i Leoleo ao taumafai e pu’e faapagota o ia, e ala i le faaauau pea ona sola ese i lana ta’avale ao taumafai Leoleo e tuli lana ta’avale ma taumafai e taofi.

Na ta’utino le ua molia e fa’apea, i le aso e pei ona taua, sa alu ai i le Ofisa o Leoleo i Leone ma aveese mai lona atalii sa taofia ai e Leoleo, faatasi ai ma nisi tamaiti aoga, ona o se misa na tula’i mai i le va o tamaiti aoga.

Na ia alu atu ma aveese faamalosi mai lona atali’i, ma la toe aga’i atu loa i le la ta’avale ma le fa’amoemoe e aga’i sa’o atu i lo latou aiga i Vaitogi, ae o le taimi lea o lo o tuliloa atu ai lana taavale e ta’avale a Leoleo.

Na ta’utino fo’i le ua molia e fa’apea, i le masina o Aperila 2019, na ia faaleagaina ai se meatotino a se tasi tagata, o se ta’avale, e ala i lona faaleagaina o tioata o le ta’avale, e mafua mai i se feeseeseaiga i le va o ia ma lea tagata.

O le tau e toe faaleleia ai vaega o le ta’avale sa faaleagaina e silia i le $100. O lana gaioiga fo’i sa faia i lea aso, ua ia faatinoina ai le solitulafono o le faaleaga meatotino i le tulaga muamua.

Na ta’utino atili Siaumau Jr e faapea, o le aso lava lea, na ia faaleagaina ai fo’i le ta’avale a se isi tagata e ala i lona tata’e o le tiata. O le tau e toe faaleleia ai vaega o le ta’avale na ia faaleagaina e ova atu ma le $100.

O lana gaioiga sa faia i lea aso, ua ia faatinoina ai le solitulafono o le faaleaga meatotino i le tulaga muamua.

O se tasi o atugaluga o le Fa’amasinoga e fa’atatau i le maliliega a le malo ma Siaumau Jr, o le mafua’aga ua ala ai ona talosaga le malo ina ia solofua uma isi moliaga o loo totoe ai i le tagi faasaga ia Siaumau Jr, lea e aofia ai moliaga e pito sili atu ona mamafa e pei o le faomea i le tulaga muamua, atoa ai ma le umia faasolitulafono o vaega o fualaau fa’asaina ma le faamoemoe e tulei ma faatau atu i isi tagata.

Ae talitonu le Samoa News, o se tasi o mafua’aga autu ua ala ai ona faia e le malo lea faaiuga, ona o le ali’i Leoleo Suesue lea sa gafa ma le suesueina uma o mataupu fa’asaga ia Siaumau Jr, e le o toe galue o ia o se Leoleo Suesue mo le malo o Amerika Samoa.

Ina ua maua lona avanoa mai le Fa’amasinoga, na faatoese ai loa Siaumau Jr e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i tua i lona aiga e tausi lana fanau, atoa ai ma lona fesoasoani i lona Tina i le taumafaiga o le pisinisi a le latou aiga.

Sa ia faatoese fo’i ia i latou uma na aafia i lana gaioiga sa faia, ina ia alolofa ma faamagalo o ia.

E ui i le matuia o tu’uaiga fa’asaga i le ali’i ua molia, ae na talosaga lava lana loia fautua i le Fa’amasinoga o se isi avanoa mo ia, atoa ai ma le manatu ina ia tuli faatasi uma ana faasalaga i le taimi e tasi.

Na talosaga fo’i McNeill i le Fa’amasinoga mo se avanoa e faataga ai Siaumau Jr i tua e faigaluega i le pisinisi a le latou aiga o se ave Loli, ao tuli ai lona fa’asalaga.

O lea talosaga na matua tete’e i ai le Loia a le malo. Na taua e Lowe e fa’apea, e le tatau lava ona toe i ai se avanoa e tuu atu ia Siaumau Jr e alu ai i tua e faigaluega, poo se avanoa e tuli faatasi ai ana faasalaga.

Na faatusa e Lowe is Siaumau Jr o se tagata e matua mata’utia lana amio, e ono lamatia ai le saogalemu o tagata lautele. O ana gaioiga fo’i sa faatino, ua atagia mai ai lona le manatu mamafa o ola o tagata. Na talosaga Lowe ina ia faasala Siaumau Jr i faasalaga pito maualuga o lo o faatulaga mai e le tulafono.

Na talia e le afioga i le Faamasino Sili le talosaga a le malo ma faasala ai loa Siaumau Jr i le faasalaga lenei, o le moliaga o le tete’e atu i Leoleo, e 5 tausaga i le Falepuipui; o le moliaga o le faaleaga meatotino i le tulaga muamua, e 5 tausaga i le Falepuipui; o le moliaga o le faaleaga meatotino i le tulaga muamua, e 5 tausaga i le Falepuipui.

O nei faasalaga uma e tuli eseese, lona uiga, e 15 tausaga e nofosala ai Siaumau Jr i le Toese i Tafuna.