Ads by Google Ads by Google

Fa’asala e le Fa’amasinoga Mosese Lomu i le Toese i Tafuna

ausage@samoanews.com

Ua faasala nei e le Fa’amasinoga Maualuga le ali’i Leoleo lea avea ma Ta’ita’i Uati i le Toese i Tafuna, ina ua ta’usala o ia e se vaega Iloilo iuga i le solitulafono mamafa o lona faia lea o gaioiga fa’a-alatua e le tusa ai ma le tulafono.

 

O le vaiaso nei lea na tula’i ai Mosese Lomu i luma o le afioga i le ali’i Fa’amasino Sili ia Michael Kruse mo le lauina o lana fa’asalaga.

 

O le ali’i Loia Fautua lagolago ia Ryan Anderson na tulai mo Lomu, ae o le ali’i Loia Sii lagolago ia Doug Lowe na tula’i mo le malo.

 

E 2 moliaga mamafa na molia ai e le malo ia Lomu, ae i le mae’a ai o lana faamasinoga autu, na ta’usala ai loa o ia i le moliaga o le faia o gaioiga fa’a-alatua, o le vaega C lea o solitulafono mamafa, lea e faasala ai se tasi i le toese mo le umi e oo atu i le 7 tausaga, poo le salatupe e oo atu i le $5,000, poo le fa’asala fo’i i fa’asalaga uma ia e lua; ae solofua e le vaega iloilo iuga le solitulafono o le faalavelave i le molimau a le malo, o le vaega D lea o solitulafono mamafa.

 

Talu mai le taimi na faila ai e le malo le latou tagi faasaga ia Lomu, sa tatala pea le ua molia i tua i le mae’a ai lea ona ia totogi o le tupe e $10,000 sa faatulaga e tatala ai o ia i tua.

 

Na tau le mafai ona faaleo le faatoesega a Lomu i le maligi o ona loimata, ina ua maua lona avanoa e talanoa ai i le Fa’amasinoga.

 

Sa ia faatoese i le Faamasinoga faapea ai tagatanuu ma le malo o Amerika Samoa, i lona faatamala i le faatinoina o ona tiute faa Leoleo sa faatauto ai o ia. Sa ia ta’utino i le Faamasinoga, ua ia le faamaoni i ona tiute ina ua ia faia se faaiuga sese ma le le amiotonu.

 

Sa ia talosaga i le Fa’amasinoga mo se avanoa e mafai ai ona toe fo’i atu i tua i lona aiga e fautua i lana fanau aemaise ai tupulaga o lona nu’u o Fagatogo, ina ia savavali ma le amiotonu i luma o le Atua i aso uma e ola ai.

 

Sa ia taua e fa’apea, e le mana’o e oo le olaga o lana fanau faapea ai tupulaga o lona nuu i le mea sese sa ia faia.

 

Sa ia ta’utino fo’i e fa’apea, o le filifiliga sese sa ia faia e le gata ua aafia ai lona aiga, nu’u ma le ekalesia, ae ua sili fo’i ona aafia ai lana fanau.

 

Na talosaga Anderson i le Fa’amasinoga ina ia faasala Lomu i se faasalaga nofovaavaaia, ina ia maua ai le avanoa e fo’i atu ai o ia i lona aiga e faatino tulaga uma e pei ona mana’o i ai, atoa ai ma le faia lea o se suiga fou i lona olaga.

 

Na taua e Anderson i le Fa’amasinoga le tele o tausaga sa tautua ai Lomu o se Leoleo mo le malo, a o lea faatoa ta’usala lava lea o ia i se solitulafono.

 

Na lagolagoina e Lowe le talosaga ma ia faailoa ai i le Fa’amasinoga, e agava’a Lomu i se faasalaga nofovaavaaia.

 

Saunoa le Fa’amasino Sili, Michael Kruse e fa’apea, o le mataupu e pei ona ta’usala ai Lomu, na afua mai i le faalavelave lea na sola ai i tua se ali’i pagota e aunoa ma le iloa e Leoleo sa tiute i le sifi po i le Toese, ma aga’i atu i se tasi o nuu ma fa’aaoga se a’upega malosi ma fana ai se isi tagata.

 

E tusa ai ma le Ripoti a le Ofisa Faanofovaavaaia, e tele naua tupe a le malo na fa’aalu e aoaoina ai le ua molia, ina ia faalautele ai lona iloa i le galuega faa Leoleo sa ia filifili e tautua ai mo le malo, peita’i, e foliga mai ua le mafai ona faataunuu nei moemitiga.

 

O le mataupu e pei ona tuuaia ai le ua molia i le taimi o lona faamasinoga autu, fai mai sa taumafai le ua molia e ufiufi se solitulafono, o se tasi lea o mataupu o loo taumafai pea le Faamasinoga e saili poo le a tonu le uiga o le faafinauga a le malo.

 

Saunoa Kruse e faapea, afai e moni sa taumafai le ua molia e ufiufi se solitulafono, o le fesili ua tula’i mai, o le solitualfono a ai lea na taumafai le ua molia e ufiufi, ae, pe sa maua ai fo’i se mea lelei mo ia i lana gaioiga sa faia.

 

“O le ua molia, o se tasi sa avea ma Ta’ita’i Uati i le Toese, sa ia ta’itaia fo’i nisi tagata faigaluega se to’a 4,” o le saunoaga lea a Kruse.

 

“O i latou uma sa i lalo o le vaavaaiga a le ua molia i lana sifi, sa taumafai le ua molia ina ia usita’i uma i lana taumafai e ufiufi le solitulafono a le isi tagata, peita’i, e leai ma se isi o i latou nei na usita’i i le ua molia, ae na latou fesoasoani i le malo e faailoa mea moni sa tutupu.”

 

Saunoa atili Kruse e fa’apea, mai tele o tausaga o tautua ai i le Fa’amasinoga, na te manatua ai le molimau a se tasi sa avea ma Pule o le Toese i tausaga ua mavae, le tagata e suafa ia Manase, lea sa ia molimau i le lauina o se faasalaga o se alii pagota ma fai mai, “o le Falepuipui ma le auala o loo faatautaia ai, o se mea ula lava.”

 

“O lea la ua oo mai i le tausaga lenei 2020, a o lea lava e taumafai le Fa’amasinoga e saili se auala e foia ai le faafitauli lea o loo tula’i mai i le Toese. O lea fo’i ua vaaia pa sima tetele ua siomia ai le lotoa o le Toese, talosia e i ai se aoga mo i latou o loo taofia ai i totonu.”

 

E 7 tausaga na manatu le Fa’amasinoga e faasala ai Lomu i le toese, atoa ai ma le faasalaga e $5,000, peita’i ua faamalumalu le tuliina o lea faasalaga, ae ua nofovaavaaia Lomu mo le 7 tausaga i lalo o tuutuuga e ao ona ia usita’i i ai.

 

O nisi o ia tuutuuga e aofia ai lona tuliina o masina e 28 i le Toese, faapea ai ma le totogi o le salatupe e $5,000.

 

O afioga i alii Faamasino Lagolago ia Faamausili Pomele ma Muasau T. Tofili na lagolago ia Kruse i le iloiloina o se faaiuga mo le ua molia.