O le ali’i lea e to’atolu i ai i latou na molia ma ta’usala e le Fa’amasinoga Maualuga i le faia o uiga mataga fa’afeusuaiga i ni tama’ita’i talavou se to’alua e ta’i 14 tausaga le matutua i le masina o Oketopa 2018, ua fa’asalaina e le Fa’amasinoga e taofia i le Toese mo le umi e 28 masina, o se tasi lea o tuutuuga o lana nofovaavaaia e 7 tausaga.

O le aso Tofi o le vaiaso na te’a nei na tula’i ai Nick Mataia i luma o le Fa’amasinoga Maualuga mo le lauina o lana fa’asalaga. O le ali’i loia fautua lagolago ia Rob McNeill na tula’i mo ia, ae o le tama’ita’i loia sili lagolago ia Christy Dunn na tula’i mo le malo.

E lua tagi eseese na ulua’i molia ai e le malo ia Mataia.

I le tagi muamua, na tu’uaia ai o ia i moliaga mamafa e tolu e aofia ai le faiaiga faamalosi ma se tama’ita’i e talavou i lalo o le tulafono. I le tagi lona lua, na tu’uaia ai o ia e le malo i le moliaga mamafa e tasi, o lona umia fa’asolitulafono lea o vaega o le pauta fa’asaina o le aisa ma le fa’amoemoe e tufatufa atu i isi tagata.

Ae i lalo o se maliliega na sainia e le ua molia ma le malo, lea fo’i na talia e le Fa’amasinoga, na malie ai Iosia e tali ioe i le moliaga o le faia o uiga mataga fa’afeusuaiga.

Na malie fo’i le ua molia e tali ioe i le moliaga o le umia fa’asolitulafono o vaega o le fualaau fa’asaina o le aisa.

I le tali ioe i moliaga e 2 e pei ona ta’usala ai o ia, na ia ta’utino ai e fa’apea, i se tami o le aso 8 o Oketopa, 2018, sa ia faia ai ni uiga mataga fa’afeusuaiga i se tama’ita’i talavou e 14 tausaga le matua i se nofoaga i Taputimu.

Na ia ta’utino atili e fa’apea, sa la ulaina ma le tama’ita’i na a’afia se vaega o le pauta o le aisa i le taimi ae na te le i faia ai uiga mataga ia te ia.

Ina ua maua le avanoa o Mataia mai le Fa’amasinoga, sa ia faatoese ai loa i le tama’ita’i na a’afia e tusa ai o lana solitulafono, ma ia talosaga ina ia faamagalo sona sese i lo la va. Sa ia faatoese fo’i i matua ma le aiga atoa o le tama’ita’i na a’afia.

Na faatoese fo’i Mataia i le Faamasinoga, i lona aiga, aemaise lava i lona to’alua ma lana fanau, lea ua a’afia uma ona o le solitulafono sa ia faia. Na faailoa e Mataia i le Fa’amasinoga e fa’apea, o masina e tele na taofia ai o ia i le toese, ua ia a’oa’oina mai ai se lesona taua mo lona olaga, ma ua ia iloa ai, e le o se mea lelei le soli o le tulafono.

Na talosaga Mataia i le fa’amasinoga mo se avanoa se tasi mo ia, se’i toe fo’i atu ai i tua i lona aiga e tausi lona to’alua ma lana fanau.

E ui na talosaga Mataia mo se avanoa se tasi mo ia, peita’i i le faaiuga o lana folasaga sa ia faailoa ai i le Fa’amasinoga, soo se fa’aiuga ua sauni le Fa’amasinoga e tuuina atu ia te ia, o le a ia talia ma le loto fiafia.

Na talosaga i le McNeill i le Fa’amasinoga mo se fa’asalaga faanofovaavaaia, e faitau ai ma le umi e 10 ma le afa masina lea ua ma’ea ona tuli e le ua molia i le toese. Na fa’ailoa e McNeill e fa’apea, e ui i le matuia o le gaioiga e pei ona ta’usala ai Iosia, ae ua lagona lona salamo, o le ulua’i taimi fo’i lea ua a’afia ai o ia i se solitulafono mamafa.

Na faailoa fo’i e McNeill i le Fa’amasinoga se tusi sa tuuina atu e le Pule o le Falepuipui, e faailoa ai uiga lelei o Mataia ao taofia ai o ia i le Toese i Tafuna. Na faauilavea le afioga i le ali’i Fa’amasino ia Fiti Sunia ma ia saunoa e fa’apea, e le o le Pule o le Falepuipui lea na aumai ai le tusi, ae na tusia e se Leoleo Sinia a le malo.

Na lagolago e le loia a le malo ia Dunn le finagalo o le afioga i le ali’i Fa’amasino ma ia saunoa ai e faapea, o le tusi e pei ona taua e le itu tete’e, na tusia e se Ta’ita’i Leoleo mai le Ofisa o Leoleo i Tafuna.

Na lagolagoina e le loia a le malo ia Dunn le talosaga a le itu tete’e mo se fa’asalaga faanofovaavaaia,  Na taua atili e Dunn e fa’apea, o tama’ita’i e to’alua na a’afia i lenei mataupu, ua malaga atu nei le isi to’atasi i atunu’u i fafo e aumau ai ma saili ai sona lumana’i, ae o le isi tama’ita’i o lo o i ai pea o ia i le atunu’u.

E talitonu Dunn, e talafeagai se fa’asalaga fa’a falepuipui mo Mataia, ona o le matuia o le gaioiga sa ia faia.

Na faailoa e Sunia ia Mataia e fa’apea, e leai ma se vaega o le latou maliliega ma le malo e ono suia ai le tuuina atu o se faasalaga mamafa a le Fa’amasinoga mo ia, e oo lava fo’i i le tusi lea na tusia e se Ta’ita’i Leoleo, e le mafai ai fo’i ona maua se faamama avega mo ia, ae na o le atili ai ona faaletonu le finagalo o le Fa’amasinoga.

Na pau le itu ua mafua ai ona maua se faasalaga faanofovaavaaia o ia, o le tulaga e pei ona manatu i ai le Fa’amasinoga, i le faatamala lea o le malo i le fa’atinoina o ona tiute tauave, le ua mafua ai ona tutupu nei mau faafitauli.

Mo le solitulafono o le faia o uiga mataga faafeusuaiga e pei ona ta’usala ai Mataia, ua faanofovaavaaia nei o ia mo le umi e 7 tausaga i lalo o tuutuuga e ao ona ia usita’i i ai. O ia tuutuuga e aofia ai lona tuliina o masina e 28 i le toese i Tafuna, totogi le salatupe e $1,000, lesitala o ia i le lisi o i latou ua tausala i le faia o uiga mataga i tama’ita’i talavou, ma ia faia se suega i lona tino mo le siama o le HIV.

Mo le moliaga o le umia faasolitulafono o vaega o le fualaau fa’asaina o le aisa, ua poloaina o ia e tuli masina e 20 i le toese i Tafuna, o se tasi lea o tuutuuga o lana nofovaavaaia e 5 tusaga, atoa ai ma le totogi o le salatupe e $1,000.

O faasalaga nei e lua o le a tuli fa’atasi, lona uiga, e na o le 28 masina lea ua faasala ai Mataia i le toese i Tafuna.

Ua faasa fo’i ona ia toe tagofia le ‘ava malosi poo fualaau fa’asaina, e mafai fo’i ona suesueina lona tino i soo se taimi ina ia faamaonia ai, o lo o ai usitaia tuutuuga o lana nofovaavaaia.