Pago Pago - AMERIKA SAMOA

O le amataga o lenei vaiaso sa faataunu’uina ai le faapaiaga o le fanua i Tafuna, mo le fausiaina ina ai o se fale fou, fogafaletolu, e ofaga potopoto mai ai vaega eseese a le Matagaluega o Aoga (ASDOE), e pei ona saunoa mai ai le afioga i le kovana Lemanu P.S. Mauga.

O le afioga i le kovana sa avea ma lauga faapitoa o le polokalama i lea aso ma sa ia tomanatunatu i aso sa fa’aaogaina ai le nofoaga lea o le a tu ai le fale fou, mo fale a le malo.  Sa ia fa’aalia lona agaga fiafia, ona o le a aoga ana taumafaiga e tautuaina ai manaoga fa’aleaoaoga a le atunu’u.

Sa saunoa Lemanu, o poloketi faapenei, o le a fa’aauau pea ona avea ma fa’amuamua i le faigamalo.  Ma na ia faaleoina lona agaga fa’afetai mo le avanoa e faatinoina ai nei poloketi, aua o se talimana’o mo tagata o le atunu’u, aemaise le fanau.

Ma sa ia ta’ua, ona o aoaoga o se tasi o poutu i totonu o le atunu’u, o le a avea lenei fale fou ma auala e taliina ai mana’oga fa’aleaoaoga mo tagata o le atunuu.

Na ta’ua foi e Lemanu le avea o lenei fale fou a le ASDOE ma ulua’i fale o lona ituaiga, i totonu o Amerika Samoa.  Ese mai i le EOB, o le a faapea foi ona faapena le maualuga o lenei fale fou.  O le fogafale lona lua, ua patino mo pakaga taavale.

I le susuga i le Faafeagaiga o le Ekalesia Faapotopotoga Kerisiano a Amerika Samoa mai Au’asi, le susuga ia Rev. Sapini Te’o, sa fofogaina talosaga o le sauniga, i lea taeao.  Ma na ia folafola mai i le tusi a Salamo, mataupu e 121, fuaiupu muamua, “E si’i a’e o’u mata i le mauga, o fea e sau mai ai la’u fesoasoani? O la’u fesoasoani e mai le Alii, le na faia le lagi ma le lalolagi.”

Sa saunoa Rev. Te’o, ae e le’i fa’ataunuuina so’o se galuega, e tatau lava ona o tatou tepa i le lagi mo se fesoasoani ma faamanuiaga mai i le Atua.  Aua a tatou saili muamua Lana fesoasoani, o so’o se galuega e tatou te faia, o le a faamanuiaina ma taitaiina e Lona Agaga Paia.  I lana fa’ai’uga o lana tautalaga, sa ia faapea mai ai, Ia o tatou faia mea uma ma viiga i le Alii ma le aoga mo tagata o Amerika Samoa.

Sa fa’aleoina e le Faatonusili a le Matagaluega o Galuega Lautele (DPW) ia Faleosina Voigt, le agaga fa’amalo i le ASDOE ona o le la’asaga muamua mo le fauina o le latou fale fou.  Na ia ta’ua foi, o lenei fale o le a fauina i taiala o tulafono a le ADA (Americans with Disabilities Act). 

O le kamupani a le Paramount Builders ua filifilia mo le faatinoina o lenei galuega tele.