Pago Pago - AMERIKA SAMOA

I fa’amaumauga a le malo, o lo’o ua ta’ua ai le o’o atu o se ripoti i le Ofisa a Leoleo i Tafuna, i le po o le aso 26 o Aukuso, 2024, mai i se leoleo po o le faleoloa a le Tropik Traders i Nu’uuli, ona o le alu atu o le susuga ia Sinoti Teofilo, i le fa’amata’u o ia ma lu’i le leoleo po, e la te fufusu.

Ina ua taunu’u leoleo i le nofoaga na tupu ai le faalavelave, sa o latou feiloai ma le leoleo po lea na ia fa’amatalaina lona o’o atu i le faleoloa mo le amataina o lana galuega i lea afiafi, ae o lo’o inu pia ai i luma o le faleoloa ia Teofilo.

Sa ta’ua e Teofilo lona faailoa atu i le ua molimau, le faasa ona ia taumafaina se ava malosi i luma o le faleoloa, ae tu a’e i luga le ua molia ma taumafai e fusu ma le leoleo po.

Na faasino ifo e le leoleo po, i leoleo, le itu na alu agai iai Teofilo, i le isi itu o le alatele.  Ina ua maua atu le ua molia e leoleo, na lagonaina e leoleo ia le manogi pia o lenei alii.

Sa aveina loa Teofilo i le Ofisa a Leoleo mo le fa’aauauina o su’esuega a leoleo.  Ma na molia ai o ia i le moliaga o le Faao’olima i lona tulaga e tolu, lea e mafai ona nofosala ai i le falepuipui, i le o’o atu i aso e sefululima, po o se sala tupe e $300; po o faasalaga uma e lua.

E $300 le vaegatupe sa faatulagaina, e mafai ona tatalaina ai i tua, le ua molia, e faatalitali ai i lona faamasinoga.

Na faamatalaina e Teofilo i leoleo e faapea, a’o inu sana apa pia i luma o le Tropik Traders, na savali atu le alii leoleo po ma tulieseina o ia.  A’o ia tau tu ifo i luga, sa ta’ua e le leoleo po, le kolaina o lona ofu, e le alii leoleo po ma tuli’eseina o ia.