Ads by Google Ads by Google

Fa’amaonia suiga malaga Hawaiian Airlines - Oketopa e oo ia Tesema


[ata: foa'i]

Pago Pago, AMERIKA SAMOA

 

I se pepa o fa’amatalaga mai le Ofisa o le Kovana i le aso Lulu, ua fa’amonia ai e le afioga i le Kovana Sili, Lemanu Peleti Palepoi Sialega Mauga, suiga i faiga malaga a le Hawaiian Airlines i le va o Pago Pago ma Honolulu mo le masina o Oketopa e oo atu ia Tesema. 

 

O le masina ua te’a sa muamua fa’alauiloa ai e le Komiti o le Koviti-19 a le malo, e fa’apea e ta’ilua malaga a le Hawaiian Airlines i masina ta’itasi mai le Setema e o’o atu ia Tesema. 

 

Ae i se pepa o fa’amatalaga mai le Ofisa o le Kovana, ua fa’amonia ai le suiga mo malaga, e pei ona talosagaina e Lemanu, i sana tusi ia Setema 21 i le pulesili o le Hawaiian Airlines ia Peter Ingram.

 

O le talosaga mo suiga o malaga, ina ia mafai ai ona nofo va’avaia mo le 14-aso i latou uma e taunu’u mai i Amerika Samoa. 

 

O aso fou ua fa’atulaga mo malaga i le va o Pago Pago ma Honolulu - e pei ona fa’ailoa e le Ofisa o le Kovana: Oketopa 14, Novema 1, Novema 18 ma Tesema 6. 

 

Mo le malaga ia Setema 27, o lo’o fa’aauau pea e pei ona i ai i le taimi nei.

 

Saunoa le afioga i le kovana sili, o suiga fou i malaga a le Hawaiian Airlines sa faia ina ua ma’ea talanoaga ma le Komiti o le Koviti-19. Ma ua ia fa’amalulu fo’i i le atunu’u ona o nei suiga, ae o le sini autu o le fa’amoemoe ina ia puipui malu Amerika Samoa ma ona tagata nu’u mai le Koviti-19.

 

O le afioga i le kovana sili, o se tasi o le au malaga sa taunu’u mai i le atunu’u i le malaga a le Hawaiian Airlines ia Setema 13. Ma e toatasi le tagata malaga ua fa’amonia, ina ua ma’ea suega, ua maua i le Koviti-19. Ma o lea tagata malaga o lo’o nofo va’avaia i se tasi o nofoaga a le malo i Tafuna. 

 

Mo isi o le au malaga, e aofia Lemanu, o lo’o nofo va’avaia i le Tradewinds Hotel ma le Sadies by the Sea hotel. O le aso Sa nei, e ma’ea a la latou nofo va’avaia. 

 

Ua ma’ea fa’atulaga e le Matagaluega o le Soifua Maloloina aiaiga e tatau ona mulimuli i ai i latou nei pe a ma’ea le nofo va’avaia. O se tasi o nei aiaiga, e fitu aso e nofo va’avaia ai i o latou aiga, e le mafai ona auai fa’atasi ma o latou aiga, ma e le mafai foi ona alu i fafo o le fale. 

 

E fa’amalosia foi i latou uma nei ina ia lesitala i luga o le TalofaPass faia ai a latou siaki ma fa’ailoa i le Matagaluega o le Soifua Maloloina. 

 

Afai e le faia lea tulaga, e mafai e le Matagaluega ona asia lea aiga ma fa’amalosia isi tulafono o le nofo va’avaia.