Ads by Google Ads by Google

Faamaonia moliaga faia o uiga i se teineitiiti faasaga i se ali’i ave pasi

ausage@samoanews.com

Ua faamaonia nei e le Fa’amasinoga Maualuga moliaga o le faia o uiga mataga faasaga i se teineititi e 15 tausaga le matua, lea sa tu’uaia ai se ali’i ave pasi mai Samoa e 35 tausaga le matua, ina ua talia e le Fa’amasinoga sle maliliega na sainia e le itu a le ua molia ma le malo.

 

O le vaiaso nei na tolaulauina ai i luma o le afioga i le ali’i Fa’amasino Sili lagolago ia Fiti Sunia se maliliega na sainia e le ali’i ua molia ia Lalomilo Raymond Taume ma le malo.

 

Na ulua’i tu’uaia e le malo ia Taume i le moliaga mamafa o lona tagofia lea o itutinosa o se teineititi e talavou i lalo o le tulafono i le tulaga muamua. Sa tu’uaia fo’i o ia i moliaga mama e 2 o le faaoolima i le tulaga tolu, atoa ai ma le faia o amioga e ono lamatia ai le saogalemu o fanau laiti.

 

Ae i lalo o le maliliega na sainia e Taume ma le malo, lea fo’i ua talia e le Fa’amasinoga, ua malie ai le ua molia e tali ioe i le moliaga mamafa o lona tagofia lea o itutinosa o se tama’ita’i e talavou i lalo o le tulafono i le tulaga muamua.

 

I le tali ioe ai o Taume i le moliaga e pei ona ta’usala ai o ia e le Fa’amasinoga Maualuga, na ia ta’utino ai e fa’apea, i se taimi o le aso 27 o Aokuso, 2018 i Amerika Samoa, na ia ulufale faamalosi ai i totonu o le fale o le tama’ita’i na a’afia, ma ia tago atu ai i lona fatafata ao moe o ia i luga o lona moega.

 

O lea gaioiga sa ia faia e pei ona ta’utino Taume i luma o le Fa’amasinoga Maualuga, sa ia faia ina ia faamalie ai lagona tu’inanau sa ia te ia.

 

Na fesili le afioga i le ali’i Fa’amasino ia Sunia pe na faamanino atu e se isi ia te ia tuutuuga uma o le maliliega aufa’atasi ao lei tuu i ai lana saini, na tali le ua molia, na faa Samoa atu e se tama’ita’i pagota ia te ia tuutuuga uma o le maliliega aufaatasi ma le malo, i le aso na la talanoa ai ma lana loia fautua ia Rob McNeill i le toese i Tafuna.

 

Na fesili Sunia i le ali’i loia ia McNeill pe aisea na ia fa’aaogaina ai le auaunaga a le tama’ita’i pagota e faaliliuina tuutuuga o le maliliega ma Taume, ae le faaaogaina se sui o le latou Ofisa, na tali McNeill, o le taimi nei, o lo o feagai pea le latou Ofisa ma le faafitauli o le leai o se tasi e faatinoina le galuega o le faaliliu upu mo tagata molia.

 

O i laua e to’alua sa galulue i le Ofisa o le Loia Fautua, ua faamalolo le tasi ae o loo malaga i fafo le tasi mo ana talavai.

 

Ua talosagaina e le malo le Faamasinoga ina ia faasala Taume i se faasalaga faanofovaavaaia, e aofia ai ma le tuutuuga o lona tuua lea o le atunuu ae toe fo’i atu i Samoa mo le umi o lana nofovaavaaia e 5 tausaga.

 

E pei ona taua e le malo i tuutuuga o le latou maliliega e fa’apea, lenei mataupu na tofu atu i le Ofisa o Leoleo i Tafuna i le taeao o le aso 28 Aokuso, 2018, ina ua talosagaina e se ali’i se 20 tausaga le matua se fesoasoani a Leoleo, fa’asaga i  ni uiga mataga sa taumafai le ua molia e faia i lona tuafafine e 15 tausaga le matua.

 

Na aga’i atu Leoleo i le fale o le aiga ma aumai le ali’i e 20 tausaga le matua ma lona tuafafine na a’afia, ma aga’i atu loa i le Ofisa o Leoleo mo le fa’atalatalanoaina o lenei mataupu. E le i auai matua o le teineititi na a’afia ona sa faigaluega i laua.

 

Na taua e le teineititi na a’afia i Leoleo e fa’apea, na fa’ateia o ia ao taoto i lona moega i se tasi o vaveao ina ua ia faalogoina se tagata ua tago atu i lona fatafata. Sa i ai lona manatu o sana miti o loo fai, peita’i ina ua ia faalogoina le mamafa atu o le lima o le tagata i lona fatafata, na mafua ai loa ona te’i i luga, ae na fa’ateia o ia ina ua pupula atu ona mata, ae tau lana vaai i le ua molia o loo tootuli i luma o lona ulu ma tago atu i lona tafatafa.

 

Na musumusu atu le ua molia i le teineititi na a’afia ma fai atu i ai, e soia le pisa ina ne’i lagona mai laua e le latou aiga, ae sa e e i luga le teineititi i lona Tama, ma fa’afuase’i ai loa ona tu i luga le ua molia ma alu i le atoa i fafo ma le latou fale. Na vaaia e le teineititi na a’afia le aga’i atu o le ua molia ma faaola lana pasi o loo paka mai i le isi itu ma sole ese.

 

Na taua atili e le teineititi na a’afia i Leoleo e fa’apea, e le o se taimi muamua lea ua faia ai e le ua molia uiga mataga ia te ia, e ala i lona tago atu i ona itutinosa.

 

Na ee le teineititi na aafia i le taimi na tago atu ai le ua molia i lona tino, ma ia fai atu ai loa i le ua molia e alu ese ma le fale. E lei tauina e le teineititi na aafia i se tasi le faalavelave muamua sa tula’i mai, ona sa ia manatu, ailoga e toe tula’i mai lenei mataupu i le lumana’i.

 

Na taua e le tuagane o le teineititi na a’afia i Leoleo e fa’apea, i se tasi o po, na ala ai i luga ma alu e fa’aaoga le fale taele (tulou). Ina ua mae’a, sa ia aga’i atu ai loa i totonu o le latou fale, ae na matua fa’ateia o ia ina ua ia vaaia le ua molia o loo tootuli i luma o le moega a lona tuafafine.

 

Na avea le tatala e le tuagane o le teineititi o le faitoto’a o le potu a lona tuafafine ma itu na te’i ai le ua molia, ma fa’ataga tago atu ai loa i le laulau ma fa’afoliga ana gaioiga o loo saili lana CD.

 

Na taua e le ali’i lea i Leoleo e fa’apea, sa oso lava ona manatu leaga i le taimi na ia iloa ai lea vaaiga, e foliga mai sa taumafai le ua molia e fai ni uiga mataga i lona tuafafine, peita’i sa ia toe manatu ane fa’apea, ai loga e sa’o lea manatu.

 

O lo o taofia pea Taume i le toese i Tafuna ina ua le mafai ona ia totogi le tupe e $10,000 na faatulaga e le Fa’amasinoga e tatala ai o ia i tua, talu ona taofia mai o ia i le masina o Aokuso o le tausaga na te’a nei.

 

O le aso 29 o Oketopa o le tausaga nei lea ua fa’atulaga e lau ai le fa’asalaga a le ua molia.