Ads by Google Ads by Google

Faamaonia Fa’amasinoga le soli Kelemete tuutuuga na tatala ai o ia i tua

ausage@samoanews.com

Ua faamaonia e le Fa’amasinoga Maualuga i se iloiloga sa faagasolo i le vaiaso na te’a nei, le le usitaia lea e le susuga a Sonny “Mu” Kelemete o tuutuuga sa tuuina atu e le Fa’amasinoga e usita’i i ai, a o tatala ai o ia i tua e fa’atalitali ai taualumaga o lana faamasinoga.

 

E ui o le masina na te’a nei na lau ai le fa’asalaga a Kelemete, lea e pei ona ia tuliina ai masina e 40 i le Toese i Tafuna, ina ua ta’usala o ia i moliaga mamafa e 2 o lona umia faasolitulafono o vaega o le pauta fa’asaina o le aisa, atoa ai ma lona umia fa’asolitulafono o vaega o le pauta o le aisa ma le fa’amoemoe e fa’atau atu i isi tagata, o le vaiaso na te’a nei lea na fa’atoa faia ai le iloiloga autu e uiga i lenei mataupu.

 

O le ali’i loia fautua ia Michael White na tula’i mo Kelemete, ae o le tama’ita’i loia sili lagolago ia Christy Dunn na tula’i mo le itu a le malo.

 

O le autu o lenei iloiloga e pei ona saunoa le afioga i le Faamasino Sili ia Michael Kruse e fa’apea, o le itu a le malo ua latou faauluina le talosaga e faaleaoga ai le tupe lea na tatala ai Kelemete i tua a o faatalitali ai se faaiuga o lana mataupu, ona o tuuaiga i lona le usitaia lea o tuutuuga sa tatala ai o ia i tua.

 

O le iloiloga lenei sa tatau ona fa’ataunuuina ao le’i lauina le fa’asalaga a Kelemete i le masina na te’a nei, ae talu ai sa i ai nisi o mataupu sa fia faamanino muamua e le Fa’amasinoga, o le mafua’aga lea na manatu ai Kruse, e taoto lenei iloiloga se’i faatoa faataunuuina i le masina lenei.

 

Sa i ai fo’i i totonu o le Potu Faamasino ma ni Tina se to’alua, o i laua ia sa tuuina atu a laua ta’avale e fesoasoani ai i le tatalaina mai i tua o Kelemete. O i laua ia e aofia ai Mary Letuligasenoa ma Toreka Brown, o le tuafafine lea o Kelemete.

 

Ina ua valaau le mataupu a Kelemete, sa fautuaina ai loa e Kruse loia a itu e lua, ina ia talanoa lava nao le mataupu e fa’atatau i le le usitaia e le ua molia o le poloaiga na tatala ai o ia i tua, ae ta’atia le isi mataupu e fa’atatau i le Alii Suesue o le Ofisa o le Loia Fautua, lea o lo o masalomia lona pelogia o le Fa’amasinoga i lana molimau sa tuuina atu e fa’atatau i le mafua’aga na le oo atu ai Kelemete i se tasi o ana iloiloga i le masina o Setema o le tausaga nei.

 

Na faamanino e Dunn i luma o le Fa’amasinoga e fa’apea, o Kelemete na pu’e fa’apagota e Leoleo i le aso 7 o Iulai 2017 ma molia i lona umia faasolitulafono o fualaau fa’asaina, e mafua mai i le fa’alavelave lea na maua ai e Leoleo fualaau fa’asaina o le aisa i totonu o le ta’avale.

 

Na fa’atulaga e le Fa’amasinoga Faaitumalo le tupe e $5,000 e tatala ai o ia i tua, i lalo o tuutuuga faapitoa e ao ona ia usita’i i ai.

 

O nisi o ia tuutuuga e aofia ai le aua lea ne’i ona toe solia se tulafono a le malo, ma ia auai i taimi uma e valaau ai lana mataupu.

 

E 2 masina talu ona tatala Kelemete i tua, ae toe molia fo’i o ia e le malo i le mataupu lona lua, e mafua mai i le fa’alavelave lea na maua ai e Leoleo se vaega tele o fualaau fa’asaina i totonu o lana ta’avale i le aso 5 o Setema 2017.

 

Ina ua tula’i Kelemete i luma o le Fa’amasinoga Faaitumalo mo le tagi lona lua fa’asaga ia te ia, sa faaopoopo ai loa e le Fa’amasinoga le tupe e tatala ai o ia i tua i le aofa’i e $30,000.

 

Sa toe poloaina fo’i e le Fa’amasinoga ia Kelemete ina ia aua ne’i ona toe solia se tulafono, ma ia auai i soo se taimi e valaau ai lana mataupu.

 

I le masina o Aokuso 2018, na le usitaia ai e Kelemete le poloaiga e auai i soo se taimi e valaau ai lana mataupu, ina ua le mafai ona auai atu i luma o le Fa’amasinoga.

 

Na taua e le Alii Suesue o le Ofisa o le Loia Fautua mo Tagata Lautele ia Eddie Fruean i lana molimau tauto i luma o le Fa’amasinoga, na mafua ona le oo atu Kelemete i le fa’amasinoga i le aso lea, ona sa alu e vaai lana foma’i mo lana ‘appointment’, ona o se gasegase tuga sa aafia ai o ia.

 

Na faatonu e Kruse le Masela a le Fa’amasinoga ia Michael Nix e alu e saili le foma’i a Kelemete se’i vaai pe faamaonia le molimau a le susuga a Fruean. O le ripoti na fo’i mai ma le alii Masela, e le faamaonia le molimau a le susuga a Fruean.

 

Na taua e Dunn i lana folasaga e fa’apea, talu ai ua faalua ona le usitaia e Kelemete poloaiga a le Fa’amasinoga, o le mafua’aga lea ua talosaga ai le malo ina ia faaleaoga loa le avanoa sa tatala ai o ia i tua.

 

Na tuu e Kruse le avanoa ia Letuligasenoa ma Brown e faia ai ni a laua fa’amatalaga e tusa ai o lenei mataupu, aemaise ai o a laua ta’avale ia ua talosaga le malo ina ia taofia i lalo o le vaavaaiga a le malo.

 

Na taua e Letuligasenoa e fa’apea, na mafua ona ia tuuina atu lana ta’avale e tatala ai i tua ia Kelemete, o lona manatu e fesoasoani ia te ia. Sa ia talosaga i le Faamasinoga ina ia toe faamatu’u atu lana ta’avale.

 

O le talosaga fo’i lea a Brown, sa ia taua le mafua’aga na tuu atu ai lana ta’avale e fesoasoani e tatala ai i tua Kelemete, ona o lona fia fesoasoani ia te ia atoa ai ma lona alofa. Sa ia taua atili fo’i lona manatu sa i ai, e usitaia e Kelemete tuutuuga a le Fa’amasinoga.

 

Na taua e Brown e fa’apea, e matua mana’omia lava e lona aiga le ta’avale, e le gata e momoli ai lana fanau i le aoga, ae aoga fo’i e momoli ai tamaiti i le falema’i pe a mama’i, e aofia ai fo’i ma ia le Tina.

 

Na faailoa e Kruse ia Letuligasenoa ma Brown e fa’apea, afai o le tulaga lea o loo laua manatu i ai, ina ia tuu atu e le Fa’amasinoga se isi avanoa mo i laua, lona uiga ua le aoga le auala o loo faagaioi ai e le Tulafono galuega a le Fa’amasinoga.

 

Saunoa Krusee fa’apea, soo se taimi lava e saini ai e se tagata se pepa o se maliliega mo le tatalaina o se tagata ua solitulafono, ua faailoa atu e lea tagata i lana saini, lona malie atoatoa i soo se faaiuga e faia e le Fa’amasinoga i lana meatotino ua fa’amatu’u atu.

 

“E leai se malosi o i le Fa’amasinoga e tu’u atu ai se avanoa ia te oulua. E le mafai e le loto alofa ona faaaoga e faaleaoga ai le Tulafono o loo taitaiina ai galuega a le Fa’amasinoga,” o le saunoaga lea a Kruse.

 

I le faaiuga o le iloiloga, na talia ai loa e le Fa’amasinoga le talosaga a le malo, ma faaleaoga ai loa le poloaiga sa tatala ai Kelemete i tua. Lona uiga i se isi faaupuga, o lea ua maua e le malo le tupe ma ta’avale sa tatala ai i tua ia Kelemete.

 

O afioga i ali’i Fa’amasino Lagolago ia Faamausili Pomele ma Muasau T. Tofili na lagolago i le Fa’amasino Sii i le iloiloina o lenei mataupu.