Ads by Google Ads by Google

Faafesuia’i mea aoga na gaoi ma fualaau faasaina mai Logotala


[ata: SN]
ausage@samoanews.com

Pago Pago, AMERIKA SAMOA — Na taua e le ali’i lea ua tu’uaia i lona osofa’i o se fale i Ottoville ae ave faagoai ni mea aoga e aofia ai tupe ma se ta’avale, o nisi o mea aoga na ia gaoiga, na faafesuia’i ma fualaau faasaina mai le nofoaga o Logotala.

 

O le masina na te’a nei na pue faapagota ai e Leoleo le susuga a Corey Taga ona o tu’uaiga faasaga ia te ia, ma tula’i ai loa i luma o le Fa’amasinoga Faaitumalo.

 

E 7 moliaga mamafa ua faila e le malo faasaga ia Taga. O ia moliaga e aofia ai moliaga e 2 o le talepe fale i le tulaga muamua, o se solitulafono mamafa o le vaega B, lea e faasala ai se tasi i le Toese mai le 5 e oo atu i le 15 tausaga, pe faasala foi i le salatupe e oo atui le $20.000; 3 moliaga o le gaoi, 1 le moliaga o le talepe fale i le tulaga 2, faapea ai ma le moliaga e tasi o le tete’e atu i Leoleo ao taumafai e pu’e faapagota o ia, o  le vaega C o solitulafono mamafa, lea e mafai ona faasala ai se tasi i le Toese mo le umi e oo atui le 7 tausaga, pe faasala foi i le salatupe e le silia i le $5,000.

 

E $35,000 le vaega tupe lea ua fa’atulaga e tatala ai i tua Taga. Afai ae tatala o ia i tua, ua poloaina o ia e le Fa’amasinoga ina ia auai i soo se taimi e valaau ai lana mataupu, fesootai vava lalata ma lana loia, e le mafai foi ona toe taumafai e ulufale faamalosi i le fale o le aiga na aafia i lana gaioiga.

 

TAGI A LE MALO

 

E pei ona taua e le malo i le latou tagi e faapea, o le aoauli o le aso 31 o Me na te’a nei, na aga’i atu ai se ali’i mai Ottoville i le Ofisa o Leoleo i Tafuna ma faila sana ripoti faasaga i lona fale na osofa’i e tagata ma ave faagaoi le tele o ana mea aoga e aofia ai ma lana ta’avale, le ituaiga o le Loli lanu pe’ape’e (F-150).

 

Na taua atili e le na aafia i Leoleo e faapea, o lona fale na osofa’i e se tagata i le po o le aso 30 o Me, faapea ai ma le po na sosoo a’i, le aso 31 o Me. O mea aoga na ave faagaoi i le osofaiga e aofia ai le ato tupe sa i ai le $40 i totonu, o se laptop, telefoni (smartphone), o remotes o le TV, faapea ai pea seevae ma lavalava. Na ave faagaoi fo’i ma le ta’avale faapea ai ma ki o le Loli.

 

A o i ai le na aafia i le Ofisa o Leoleo mo le faailoaina o lana tagi, na faafesoota’i atu o ia e se tasi o tagata faigaluega ma faailoa atu i ai le vaaia o lana Loli pa’epa’e o lo o fealua’i i luga o le alatele i Vaitogi, o lo o faafoe atu e se ali’i talavou se toatasi. Na taua atili e le tagata faigaluega i le ali’i na aafia lona vaaia o lana Loli o pasi atu i luma o lona Fale i Vaitogi ma o lo o aga’i atu i le nofoaga o lo o i ai le Laumei ma le Malie, le auala e aga’i atu i Fogama’a i le isi itu o Vaitogi.

 

E lua ta’avale Leoleo faatasi ai ma ni Leoleo i totonu na taamilo i Vaitogi e tau saili pe vaaia ai le Loli pa’epa’e o loo tau saili. A o aga’i atu Leoleo i le nofoaga o le Malie ma le Laumei, na vaaia ai le Loli paepae o loo tau saili o loo paka i se vaega o le auala. Na ona iloa mai lava e le ave ta’avale o le ta’avale Leoleo o loo aga’i i le itu o lo o paka ai le Loli, faa solomuli loa e le ave ta’avale le Loli ma sola ese loa e aga’i atu i le auala i Fogama’a.

 

Na tuliloa e Leoleo le Loli paepae i lo latou fia iloa o le tagata o loo faafoeina le ta’avale. Na maua atu e Leoleo le Loli paepae o loo paka mai i le itu o le auala i Fogama’a ae ua leai se ave ta’avale. Na masalomia e Leoleo le sola o le ave ta’avale i luga o le mauga.

 

I le tuana’i ai o le vaiaso e tasi talu ona amata suesuega a Leoleo e uiga i lenei mataupu, na tau aao atu ai loa e le Leoleo sa faauluulu i ai le suesuega lana ripoti mae’ae’a i le Vaega o Leoleo Su’esu’e latou te faaauauina le su’esu’ega. I totonu o le ulua’i ripoti na tapena e le Leoleo na amataina le suesuega, o lo o taua ai igoa o ni tagata o lo o masalomia le aafia i lenei gaiogia e aofia ai ma le suafa o Corey Taga, le alii o lo o molia i lenei mataupu.

 

O le vaiaso na sosoo ai ina ua tauaao e Leoleo Suesue le ripoti, na amata ai loa ona fesiligia ma faatalatalanoa i latou uma o lo o taua o latou igoa i le ulua’i ripoti. O le toatele o i latou na fesiligia e Leoleo, sa latou taua le igoa o Taga, o ia lea o lo o masalomia na aafia i le faatinoina o le gaioiga e pei ona osofaia ai le fale i Ottoville. 

 

Na maua le avanoa e talanoa ai Leoleo Suesue ia Taga e uiga i lenei mataupu, ma malie ai loa le ua molia e alu atu i le Ofisa o Leoleo. O le aso 28 o Iuni na malie ai Taga e alu i le Ofisa o Leoleo mo le faatalatalanoaina o le mataupu. Na muamua faitau aia tatau o le ua molia ma ia faaalia ai loa i Leoleo Suesue lona malamalama i ona aia tatau, faatasi ai ma lana faaiuga, o le a fai lana faamatalaga e tusa ai o le mea sa tula’i mai, atoa ai ma le tuuina atu o sana faamatalaga tusitusia i Leoleo.

 

I lana faamatalaga tusitusia na taua ai e Taga e faapea, o le po o le aso 30 o Me, 2021 na latou tafafao ai ma nisi o ana uo i se nofoaga e latalata i le fale o le ali’i na aafia i Ottoville. A o faia le latou tafaoga, sa ia maitauina le tumu tumu mai o tagata i le fale o le ali’i na aafia, lea e le mamao mai le nofoaga o lo o latou tafafao ai.

 

Sa ia mata’ituina ma le toto’a gaioiga a tagata uma o loo faia i le fale o le ali’i na aafia, ma ia iloa ai, e foliga mai o tagata eseese o loo tafafao i le nofoaga lea.  

 

Pe tusa o le itula e 8 i le afiafi lava lea, na vaaia ai loa e Taga le ua molia ma ana uo sa tafafao i fafo, ua aga’i uma i totonu o le fale. O le taimi lea na faalatalata atu ai loa Taga i autafa o le fale i lona fia mautinoa lelei o gaioiga a le na aafia ma ana uo o lo o faia i totonu o le fale. 

 

O le taimi fo’i lea na ia mata’ituina ai vaega uma o le fale i mea aoga e ono mafai ona ave faagaoi e pei o telefoni, laptop, e oo lava fo’i i se nofoaga e ono teu ai tupe i totonu o le fale. Na vaaia fo’i e Taga le Loli paepae o lo o paka i fafo o le fale taavale, ma aga’i atu loa e siaki poo i ai le ki i totonu. Na tatala e le ua molia le faitoto’a o le ave ta’avale ma iloa ai, e le o i ai i totonu o le ki o le ta’avale. 

 

A o i ai pea le na aafia ma ana uo i totonu o le fale, na maua le avanoa o Taga e ulufale atu ai i lef aitoto’a pito i tua ma amata loa lana gaioiga o le ave faagaoi o nisi o meatotino na mafai ona tau atu i ai e aunoa ma le iloa mai o ia e se tasi. Na ia gaoia seevale, o lavalava, o se laptop, faapea ai ma remote o le TV.

 

Na taua e Taga i Leoleo Suesue, e faalua ona ia osofaia le fale na aafia. O le taimi o le po pe tusa o le itula e 10:00 faapea ai ma se taimi o le vavevao pe tusa o le itula e 3:00.

 

O lana osofaiga lona lua na ia maua ai loa le ki o le ta’avale i totonu o le fale, faatasi aima isi fo’i meaaoga e pei o le telefoni (smartphone), o le ato tupe o loo i ai le $40, atoa ai ma isi meaaoga e pei o seevae ma lavalava.

 

Na gaoi e le ua molia le Loli ma faasasa’o loa i Logotala i Vaitogi, le nofoaga ua lauiloa i le taatau a o fualaau faasaina ma faatau mai ai ana fualaau faasaina, e fa’aaoga ai le $40 na maua i totonu o le ato tupe atoa ai ma le telefoni (smartphone) lea ua faafesuia’i ma fualaau fa’asaina.

 

E to’alua molimau na fesiligia e Leoleo e faatatau i lenei mataupu. O se alii ma se tamaitai. 

 

Na faamaonia e le molimau alii i Leoleo le alu atu o Taga i le Loli paepae i Logotala e faatau ma ni ana fualaau faasaina. Sa ia fesili i ai poo ai e ana le ta’avale ae na tali lTaga, o le Loli a lana uo. 

 

O le isi molimau na fesiligia e Leoleo Suesue o se tamaitai, lea na ia faamaonia lona vaaia ao Taga o alu atu i se Loli paepae i Logotala. Na taua e le molimau le alu atu o Taga ma piki o ia i le Loli ma la tietie ai i le faleoloa e fai mai lana faatau, ma toe momoli ai e Taga o ia i Logotala, ma fo’i atu loa Taga i Vaitogi, ae sosoo ai loa ma le taimi na maua ai o ia e Leoleo ma fai ai loa a latou tuliga.

 

Ua mae’a ona toe faafo’i atu le Loli na ave faagaoi i Leoleo, se’i vagana ai nisi o meatotino e le o mafai ona maua i le taimi nei.