Pago Pago - AMERIKA SAMOA

O le taeao o le aso 31 o Aukuso, na vala’au atu ai se tina i le Ofisa a Leoleo i Tafuna, e ripotia se alii o lo’o faatupu vevesi i totonu o le nu’u ma na ia (alii) fa’afefeina le alo 13 tausaga a lenei tina, e ala i le ta’iina iai o se fagameme’i i foliga o le tamaititi.

(E le’i aofia suafa o i latou na a’afia po o ua molia, i lenei matupu, i totonu o faamaumauga a le malo, ona o le talavou o fanau sa a’afia.)

Ua molia nei lenei alii e 42 tausaga le matua, i moliaga e aofia ai:

Faitauga 1:  Faatupu Vevesi i nofoaga faitele, o se vaega ‘B’ o solitulafono mama, lea e mafai ona loka ai i le ono masina, po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu, o se vaega ‘A’ o soligatulafono mama, e mafai ona nofosala ai i le falepuipui, e o’o atu i le tausaga, po o se sala tupe e $1,000 po o faasalaga uma e lua.

Faitauga 3:  Faia o se gaioiga e ono a’afia ai fanau iti, o se vaega ‘A’ o soligatulafono mama, e mafai ona nofosala ai i le falepuipui, i le o’o atu i le tausaga, po o se sala tupe e $1,000; po o faasalaga uma lua.

E $1,000 sa faatulagaina e mafai ona tatalaina ai le ua molia, e faatalitali ai lona faamasinoga.

Ina ua agai atu leoleo i le nofoaga na tupu ai le faalavelave, sa muamua ona talatalanoa ma le tina o le tamaititi na a’afia ma e tusa ai ma le faamatalaga a lenei tina, sa ta’a’alo soka lana fanau (5 ma le 13 tausaga) i fafo, ae fa’ate’ia o ia, ina ua fa’alogo atu o palauvale mai se tagata.

Sa faamatala e le tina, na ia savali atu i fafo ma va’aia lana fanau o tamomo’e mai ma valaau mai, o le a faga i la’ua e le ua molia, i se fagameme’i.  Ma na faatopetope ona toso mai e le tina lana fanau, i totonu o le fale ae fa’alogoina e le tina, le pa’o o se mea i luga o apa o le fale.

Ma na ta’ua e le tina e faapea, e le o se taimi muamua lea ua fa’afefe ma palauvale atu le alii lea i lana fanau, ma o sana tagata e fou atu i le latou tuaoi.

Na fa’atalanoaina e leoleo ia le atalii 13 tausaga ma sa ia faamatalaina le faia o se la ta’aloga soka i fafo ae ona fa’alogoina le palauvale atu o le ua molia ma fesili atu po o le a le mafuaaga e la te tilotilo atu ai.

Sa faamatala e le atalii 13 tausaga lona savali ese, ae tago le ua molia i le ta’i atu lana fagamemei i ona foliga.  O iina na ia tago loa i le toso atu lona uso laititi ma tamomo’e loa agai i le fale.  Sa ta’ua foi e le tamaititi le togiina o i la’ua e le ua molia, i se fagu pia.