Pago Pago - AMERIKA SAMOA

O lo’o ua fa’aauau pea su’esu’ega a le Ofisa o Leoleo i se Vaega, ua fai ma latou le masani, o le osofa’ia o fale o aiga, ofisa pisinisi ma ofisa a le malo i Nu’uuli, Tafuna ma Iliili.  Ma e to’alima i latou ua tulimata’i e leoleo i a latou su’esu’ega, ae e le o mautinoa mai i le taimi nei pe ua lokaina seisi o i latou ia e to’alima.

O pisinisi sa fa’apea ona osofaia e lenei Vaega o faomea, ua aofia ai le lala i Tafuna a le Faletupe o le TBAS, o le Ofisa o Tupe a le Vaega o Tiute e mataituina taifau faapitoa (K9 Kennel Office), o le fale teu oloa a le Ofisa o Tupe a le Vaega o Tiute, o le faleoloa a le Pacific Mini Part Retail faapea ma le fale teuoloa, o le PPTC (Pago Pago Trading Company), ma le ofisa a le ‘Sports Complex-Golf Course’ a le malo.

O le tele o oloa sa gaoia, e o’o mai i le taimi nei, e le i toe mauaina, e tusa ai ma fa’amaumauga a le malo i le aso 14 o Ianuari, 2025.

O moliaga ua faasaga i le to’atolu mai i le to’alima ua masalomia i lenei solituafono, e aofia ai moliaga o le faomea, gaoi, solivale o fanua, taupulepule e gaoi, taumafai e gaoi, taupulepule e susunu se fale, taumafai e susunu se fale ma le fa’aleagaina o meatotino.

Ma o lo’o ta’ua i totonu o faamaumauga a le malo le fa’aauau pea ona tau sailia ma fa’atalanoaina leisi to’alua, e atoa iai le to’alima o latou o lo’o masalomia i nei solitulafono.

O i latou nei e to’alima, e aofia ai Fa’avae Logoai, Fa’asi’i Aupaau po o ‘John’, Lorenzo Sualoa, Hymie Sefo po o ‘Small’ ma Vani Vaega.  O Aupaau ma Vaega lea o lo’o fa’aauau pea ona tau saili, e tusa ai ma fa’amaumauga a le malo ia Ianuari 14, 2025.

O Logoai e ana se kamupani teu fanua, lea o lo’o galulue ai Sualoa ma Aupaau, ma na iai foi i totonu o le taavale na taofia e leoleo i a latou su’esu’ega.

O tupe sa faatulagaina e mafai ona tatalaina ai i latou nei e to’atolu, e amata mai i le $70,000 se’ia o’o i le $100,000 – o lo’o iai se talitonuga, na talosagaina e loia a e ua molia ia le toe fa’aitiitia o nei vaegatupe, ae e le o mafai ona fa’amaonia.

O lo’o aofia i fa’amaumauga a le malo ia su’esu’ega o ni osofaiga e ono, i le va o Novema 20, 2024 ma Tesema 9, 2024.

TBAS- LALA I TAFUNA

O lenei fa’alavelave sa tula’i mai ia Novema 20, 2024, ina ua ripotia se afi o mu i tua o le faletupe.  Ae ina ua taunu’u leoleo, e pei ona ta’ua i totonu o faamaumauga a le malo, sa fa’amaonia ai o se afi o lo’o susunu ai ni pepa a le faletupe.  Ma na va’aia foi le taumafai o se tagata e tatala faamalosi (vane) ia le faamalama pito i tua.

Ma e ui ina o lo’o ta’ua i totonu o ripoti a leoleo le leai o ni oloa po o meatotino a le faletup na gaoi, ae peitai, sa ta’ua i le ripoti le fa’aleagaina o ni meatotino i totonu o le faletupe.  Ma i le ata vitio sa pu’eina i le po na osofa’ia ai le faletupe, na va’aia ai ni tagata se to’alua, o lo’o ofuina ni mitiafu e iai ni pulou sa punitia ai foliga.

OFISA TUPE A LE OFISA TIUTE – OFISA TA’IFAU FAAPITOA (K9 KENNEL)

O lenei faalavelave na tupu ia Novema 30, 2024 ma sa ripotia ai le osofaia e se alii o le ofisa, e ala i lona tipiina o le pa uaea lea e i le va o le Ofisa o Faatoaga ma le Ofisa a le ‘Customs Kennel’.

I ulua’i faamaumauga o oloa, sa ta’ua ai le gaoia o ni pusa ‘vapes’, pusa sikaleti mai atunu’u i fafo, ma ni fana (12-gauge shotguns) se fa.  Na fa’amaonia e le pule o lea ofisa i se taimi mulimuli ane, o isi meatotino na misi mai i lea osofaiga, ae e le’i ripotia, na aofia ai ni fana ‘Paint Ball’ se fa ma ni fana a u e 2.

Sa pu’eina foi e se vitio ia se alii na osofaia lea ofisa, ma sa ia fa’aaogaina se ofu e ufiufi ai ona foliga.  Ma sa atoa lelei le itula o fealualua’i i totonu o le ofisa.

FALE TEU OLOA A LE OFISA TUPE A LE VAEGA O TIUTE

O le vaveao o Tesema 5, 2024 na osofaia ai lenei fale teuoloa ma sa ripotia mai le mauaina o ata vitio, o ni alii se to’alua, ma o la foliga na ufiufi i a la mitiafu, sa faapea ona ulufale atu i totonu o le fale teuoloa.  Sa molimauina se pe’a i lima e lua o se tasi o nei alii, faapea ma seisi pe’a  lona vae taumatai.

O oloa sa gaoia mai i le fale teuoloa, na aofia ai se uila vili vae, o se mea faigaluega e oti ai uaea, o se ‘drill’ ma pulufana.

FALEOLOA MA FALE TEU OLOA A LE PACIFIC MINI MART (PMM) – TAFUNA

O le vaveao o Tesema 6, 2024, sa ulufale atu ai le au faomea i totonu o le fale teu oloa, e ala atu i faitoto’a pito i luma, e le i lokaina mai totonu.

Ma e tusa ai ma faamatalaga i faamaumauga a le malo, sa muamua lava ona tapeina e le au gaoi ia le paoa i totonu o le faleoloa.

O le tau aofa’i o oloa sa gaoia, e pe a ma le $6,680.00.  Sa faamaonia e le pule o le faleoloa, le leai o se latou masini pu’e ata, i totonu ma fafo o le fale teu oloa.  Ae o se ata sa pu’eina mai e le masini pu’e ata a le Tool Shop, sa iloa ai se pikiapu na tu i luma o le fale teu oloa, mo le 6 minute, i le po na gaoia ai lea fale.

FALE TEU OLOA MA LE OFISA A LE PPTC

O le aso 9 o Tesema, 2024 sa ripotia ai e se tasi o le aufaigaluega a le PPTC, i leoleo, lona tatalaina o le fale teu oloa i lena taeao, ma iloa ai le pe o le paoa ma i se la su’esu’ega ma seisi o le latou aufaigaluega, na faamaonia ai le gaoia o le fale teu oloa.

E le gata i lea, sa faapea ona gaoia se sefe na i luga o le fogafale lona lua a le fale teu oloa.

Ma na ta’ua i faamaumauga a le malo, i ulua’i su’esu’ega a leoleo, o lo’o ta’ua ai le ave’esea e le au gaoi o le sefe mumu, sa iai se vaegatupe pe a ma le $114,042.37, o fuifui ki, o fa’amaumauga mo taavale a le kamupani faapea ma ni isi fa’amaumauga.

Sa mauaina e leoleo i le fale teu oloa ia ni meafaigaluega e pei o se mele’i u’amea, o se samala, o se ‘sledgehammer’, o se ‘pipe wrench’ ma se ato lanu uliuli.

I se taumatega a leoleo, o le tau aofai o tulaga na fa’aleagaina ma gaoia, e pe a ma le $117,600.

OFISA ‘SPORTS COMPLEX’ MALAE TA POLO

O lenei fa’alavelave sa ripotia mai i le aso 12 o Tesema, 2024 ma e tupu lenei faalavelave, ae o lo’o feagai pea leoleo ma le su’esu’ega o isi osofaiga, o lo’o a’afia ai ni alii e to’alua mai i le to’alima o lo’o a’afia i isi osofaiga, ma ua iai le to’alua lea i a’ao o leoleo.

O le osofaiga i le ofisa malae ta polo, sa ripotia mai e se tasi e faigaluega i le malae ta polo, i le ofisa a leoleo i Fagatogo le taumafai o se tagata e gaoi se latou taavale moa vao.

Ina ua taunu’u leoleo i le nofoaga na tupu ai le faalavelave, sa faamatalaina iai e le tagata faigaluega a le ofisa malae ta polo ia foliga o le tagata na gaoia le taavale moa vao, faapea ma masini uela, ma isi masini.

E tusa ai ma fa’amaumauga a le malo, na osofaia e le au faomea e to’alua lea ia le ofisa, ina ua o le aufaigaluega e fa’atau, ae maua mai ai le au faomea, ina ua toe fo’i mai.  Sa mafai ona sosola ese ia le au faomea ma isi meafaigaluega, ae tu’u le taavale moa vao.

Sa pu’eina e masini pu’eata ia le taavale lea na fa’aaogaina e le au faomea e la’u ai meafaigaluega.

AVE FAAPAGOTAINA 

Ona o le tele o osofaiga i le vaega o Tafuna o lo’o iai ofisa ma pisinisi, sa faapea ona galulue faatasi ai le vaega a le CID ma le vaega a le ‘Vice and Narcotics’, i se fuafuaga e mafai ona pu’eina ai i latou o faia lea amioga.

Ma o le vaveao o Tesema 12, 2024 na faatino ai lea fuafuaga, a’o nofo faatalitali ia sui o vaega eseese a le ofisa leoleo, sa va’aia se taavale o agai atu i le ‘Fa stree’, i tafatafa o fale a le malo i le Paka Liona, lea e fa’afesaga’i ma le falepuipui mo fanau talavou.

Sa molimauina le feosofi mai o ni alii se to’alua, mai i le taavale ma ni a la la’ei uliuli ae o lo’o tofu ma ni moli uila.  Ma na va’aia lo la agai atu i le ofisa a le ‘Bio Diversity’.  Ae ua toe alu ese atu le taavale.

Ae na iloa e alii ia e to’alua, e foliga mai o lo’o mata’i atu i la’ua, o lea na toe savali ese ai ma sosola ese atu, a’o taumafai leoleo e tuliloa i la’ua.

Ae o le taimi lea, e pei ona ta’ua i faamaumauga a leoleo, sa lagona ai e ni alii leoleo se to’alua sa iai i le paka liona, ia se pa’o leotele, e sau mai i le Fa Street, ona soso’o mai ai lea ma le pa’o o le faitoto’a o se taavale.  Sa faapea loa ona agai atu iai leoleo e su’esu’e lea pa’o.

Ma na taofia e leoleo ia se pikiapu lanu efuefu i le ‘Fa Street’.  Ina ua faamaonia e leoleo, o le taavale lea na o atu ai le to’alua lea ua tuliloa e leoleo ma o le alii aveta’avale, o Lorenzo Sualoa, lea na fai mai i leoleo, na o atu e lafo la latou lapisi i lapisi a le malo.

Na su’esu’eina e leoleo ia le lapisi sa i luga o le taavale ma maua ai le ‘bolt cutter’ lanu moana, lea sa ta’ua i totonu o fa’amaumauga a le malo, o le ‘bolt cutter’ a le Pacific Mini Mart, lea na gaoia ia Tesema 6, 2024.

Sa taofia loa e leoleo ia le taavale ma aveina atu Sualoa ma lana pasese, i le ofisa a leoleo i Tafuna mo le fa’aauauina o a latou suesuega.

I lea suesuega, sa faamatalaina ai e Suaola, i leoleo, o se alii e suafa ia Fa’avae Logoai, e ana le taavale ma o ia o le avetaavale a Logoai, ma e na’o la’ua lava e faafoeina le taavale.  Ma sa ia ta’ua foi le faatonuina o la’ua, e Logoai, e fa’aaoga le taavale e toso ai se uta (lapisi) e tia’i.

Na fa’ailoa atu e leoleo ia Sualoa le masalomia o le pikiapu i ni faalavelave na tutupu mai i nofoaga sa maua atu ai i la’ua ma lana pasese, i lea vaveao.  Ma na fa’aali atu foi ia Sualoa ia le ata vitio mai ia Tesema 6, 2024, lea na osofaia ai le fale teuoloa a le Pacific Mini Mart, lea na maua ai le ata o le taavale ma le ave taavale.

O iina na fa’amaonia ai loa e Sualoa lona a’afia i le osofaiga o le faleoloa a le PMM ma sa ia tauina ai igoa o isi na auai i lea osofaiga, o Vani Vaega, John Aupa’au ma Hymie Sefo.  Sa ia fa’amaonia foi lona fa’aaogaina o le taavale a Logoai i lea osofaiga.  Ma sa ia faamatalaina oloa na o latou gaoia, e pei o pusa pisupo, Clorox ma apa inu.  Lea na o latou la’uina i se latou fale teu oloa.

Sa su’esu’eina foi le ua molia e tusa ai ma le osofaiga o le TBAS, PPTC ma le ofisa ma le fale teuoloa a le vaega o Tiute, a le malo.

Na faamatalaina e Sualoa, o Aupa’au ma Sefo sa osofaia ia le TBAS, ae o ia sa avetaavale ma sa ta’ua foi e Sualoa le iai o se fuafuaga a le to’alua lea ina ia susunuina le faletupe.

I le osofaiga o le PPTC, na ta’ua e Sualoa ia lona le auai i ia osofaiga ae o ata o meafaigaluega sa fa’aali atu ia te ia, o meafaigaluega a Logoai, lea foin a fa’aaoga e Aupa’au ma Sefo i le osofaiga o le TBAS.

O le osofaiga i le ofisa o Tiute, sa ta’ua foi e Sualoa le le’i auai ai, ae ina ua fa’aali atu iai ata mai i ia osofaiga, sa fa’amaonia e Sualoa ia Aupa’au i luga o ata vitio sa fa’aali atu ia te ia.

(O le pasese lea na ave faatasi ma Sualoa, e leoleo, sa musu e faia se faamatalaga pe fesoasoani i suesuega a leoleo.  Ae na maua ia i la’ua uma ma Sualoa ia vaega o fuala’au faasaina lea na fa’ao’oina atu i le vaega o le Ofisa a Leoleo, o lo’o mataituina vaega o fualaau faasaina.)

Sa faafeso’otaia loa e leoleo ia Logoai, le pule o le taavale, ma fa’ailoa atu iai le a’afia o lana taavale i se su’esu’ega e faatatau i osofaiga i se ofisa a leoleo.  Ma sa fa’ailoa atu foi ia Logoai le iai i a’ao o leoleo ia le avetaavale ma se pasese, na maua ai ia se vaega o fualaau faasaina, po o le Aisa.

O le aso 12 o Tesema, na o’o atu ai Logoai i le Ofisa a Leoleo i Tafuna ma talosagaina le tatalaina mai o le ‘trailer’ lea e pipi’i i lana pikiapu, ona o lo’o mana’omia i ana galuega.  Sa malaga faatasi atu ia Logoai ma Aupa’au ma sa faapea ona tu’uina iai e leoleo ia le ‘trailer’ ma la toe malaga ese mai ai.

Ae o le aso lava lea na taunu’u mai ai le ripoti e tusa ai ma le taumafaiga e gaoi le taavale moa vao i le malae ta polo, i le ofisa a leoleo.  Ma na fa’amaonia ai le a’afia o Logoai ma Aupa’au i lea faalavelave.

Ma e pei ona ta’ua i fa’amaumauga a le malo, sa mauaina i ni ata vitio ia le tu’ua e Logoai ma Aupa’au, o le ofisa a leoleo i lea lava taeao, ma agai sa’o atu i le malae ta polo, ma o la o’otiina le loka o le pa, ona fa’asolomuli atu ai lea o le la taavale ma taumafai e si’i i luga le taavale moa vao, ae sa na o meafaigaluega mama sa mafai ona tu’uina i totonu o le taavale.

O le aso 13 o Tesema, 2024, i lalo o se faatonuga sainia mai i le Faamasinoga, sa faapea loa ona agai atu vaega a le C.I.D ma le Ofisa e mataituina fualaau faasaina, i le fale o Fa’avae Logoai i Nu’uuli.  Ma e fa itula o su’esu’eina le fale, a’o iai Logoai ma le faletua.

Na mafai ona su’esu’eina ia le fale a le tuafafine a Logoai lea o lo’o fa’aaoga e Logoai e teu ai ana meafaigaluega mol ana galuega ma sa maua ai le tele o oloa gaoia mai i faalavelave o lo’o faia iai suesuega a leoleo.

Sa fautuaina loa ia Logoai ina ia o’o atu i le ofisa a le CID mo se faatalanoaga, ma sa faapea ona faimalaga atu Logoai ma lona faletua ma le la loia.  Na ia fa’ailoa atu i leoleo lona le mana’o e su’esu’eina o ia e tusa ai ma faalavelave ua tutupu.  O se taimi mulimuli ane, na faapea ona toe tatalaina ai o ia i tua.

O lo’o fa’aauau pea su’esu’ega a leoleo ma e o’o mai i le taimi nei, ma ua a’afia ai ma ni siaki a le PPTC lea na i totonu o le sefe sa gaoia, ma fa’aaogaina e Logoai e tala mai ai se tupe.