O LE TUPUA I TOTONU O SE FALE LA’AU

I se tasi o nu’u, e li’o i le tele o la’au Mago ma Tamaligi ma sa iai se la’au e tasi, na tu ai se fale la’au.  O se fale sa fau i ni nai laupapa, o se tama’i apefa’i ma se tama’i faamalama e tasi.  E ui i le fa’atauva’a o lenei fale la’au, ae sa pele i le alii 12 tausaga o Malala ma lona tausoga o Tala.

Ma o taimi uma lava e tu’ua ai a’oga mo tu’uaga umi, e asiasi atu ai Tala i matua o ona matua, lea e nonofo i autafa o le aiga a Malala.  Ma e taunu’u atu loa Tala, o la sosola loa ma Malala i le la fale la’au ma e alu le aso atoa, o la nofonofo ai iina ma o la talatalanoa, valivali a la ata ma matamata i manu o felelei solo ma tamomo’e solo i luga o la’au.

O le tasi aoauli, ina ua to’a atu le timu, sa maua ai e Malala se tama’i atigi pusa i lalo o se tasi o laupapa o lo’o fola ai le la fale la’au.  Ina ua o la tatalaina ma Tala ia le atigi apa ‘elea, sa o la maua ai ni ata tuai, o se losa ua magumagu ma se tusi sa gaugau faalelei i totonu.

O le tusi na tusia ia Iulai 1982 ma o lo’o faamatalaina ai se faigauo a Mina ma Amio, lea sa fa’aaogaina foi le fale la’au lea ua fa’aaoga e Malala ma Tala.  Ae sa ta’ua i totonu o le tusi ia se fe’ese’esea’iga na tupu i le va o Mina ma Amio na i’u ai lava ina o la le toe fetautalatalaa’i ma malepe ai le la faigauo.

O le laina mulimuli lava o lenei tusi, o lo’o faapea mai ai, “Afai e te maua lenei tusi, faamolemole fai atu ia Amio, faamagalo mai a’u.  Ma ua ou misia a ma talanoaga.”

Ua leai seisi o Malala ma Tala e toe pisa mo sina taimi pu’upu’u, ona faapea atu lea o Malala, “E ta te o e su’e po o ai Amio ma Mina?” Ae tali mai Tala, “Ioe, ta o e su’e.”

O le aso na soso’o ai, sa fa’aali ai e Malala ma Tala i lo la tama matua, ia le tusi.  A’o faitau e le toeaina le tusi, sa va’aia e Malala ma Tala ia le amata ona ‘ata’ata le toeaina.  Ma ia faapea mai, “O Amio e nofo i leisi itu o le tatou nu’u.  Ae o Mina, ua leva ona nofo i le taulaga, ae pei uma lava o lea e ia te a’u lana tuatusi.”

O le vaiaso lea, na asiasi atu ai loa Malala ma Tala ia Amio, lea ua toeaina foi ma ina ua faitauina le tusi, sa tetete ona lima.  Ma sa umi se taimi talu ona mae’a ona ia faitauina le tusi, na ia tilotilo ai i fafo, ua le tautala.

Ae na fa’ate’ia Malala ma Tala ina ua faapea mai le tala tau le leoa a le toeaina o Amio, “Faapea lava ua leva na galo a’u ia Mina.”

Sa faapea foi ona tusi e Malala ma Tala ia se tusi ia Mina ma lafo i le tuatusi mai i lo la tama matua, faatasi ai ma se ata o le la fale la’au, ma le kopi o le tusi na o la maua ai i totonu.

O leisi masina, sa maua mai ai loa le tali o le tusi mai ia Mina, ma sa ia fa’ailoa mai lona misia o si ana uo o Amio.  Ma i le fa’ai’uga o lana tusi, sa faapea mai ai Mina, “Faamolemole e fai atu ia Amio, e faamagalo mai fo’i a’u.”

O se taimi mulimuli ane, na faapea ona asiasi mai ai Mina i le nu’u o lo’o iai Malala ma Tala, ma sa faapea ona o la matamata mai i luga o le la fale la’au, a’o saofafa’i ia Mina ma Amio i lalo ifo o le la’au lava lea e tasi ma talatalanoa filemu.

O le lava lea sa amata ai loa ona fa’amaumauina e Malala ma Tala ia tala’aga o la olaga i totonu o le fale la’au.  Ma ina ua te’a tausaga e tele, ua matutua nei tausoga ma alu lava le tagata e saili lona lumanai, ae na tumau ai pea le fale la’au.

Na mafai ona fai ma fale la’au e ta’a’alo ai nisi tamaiti o le nu’u ma sa o latou mauaina le tusi na amataina e Malala ma Tala, ma o latou faaopoopo ai foi ma a latou fa’amaumauga o a latou foi olaga i totonu o le fale la’au.

[IA MANUIA LE SAVALIGA O LENEI VAIASO FOU]