O LE TEINE PAIE

Sa iai se teine paie e igoa ia Maria.  O lenei teine, e le fiafia e fesoasoani i se tasi.  E o’o lava i totonu o le latou aiga, e matua’i le alu lava Maria e fesoasoani i feau a le latou aiga, ona o le ova o le paie.

O so’o se taimi lava e fa’atonu ai o ia e ona matua i se feau, e iai lava le mafua’aga a Maria, e le mafai ai ona alu e faataunu’u lana feau.

O se tasi aso, na fa’atonu ai e le tina o Maria ia le teine o Maria, e alu i le maketi e fai mai se faatau e fai ai le latou mea’ai.

Sa le’i fia alu le teine o Maria, ae peitai, sa ia iloa lelei lava, a le alu e fai mai le faatau, e leai se meaai a le latou aiga i lea afiafi.

E ui i lona paie tele, ae na fa’amalosi lava Maria e alu i le maketi, ona e na te iloa lelei lava, e aunoa ma lenei faatauga, e le ‘ai i lea afiafi.

Ua alu loa Maria i le maketi.  Ae ina ua latalata atu i le maketi sa ia va’aia ni tamaiti o ta’a’alo mai.  Na matua’i galo ia Maria ia le fa’atauga, ae ua alu atu e fai a latou ta’aloga ma tamaiti.

E toe manatua ifo e Maria ia le feau na alu atu ai, ua tuai le taimi, ua tapuni le maketi.

Sa toe fo’i le teine o Maria e leai ma se faatau.  Na matua’i le fiafia le tina o Maria ina ua toe alu atu Maria e aunoa ma se fa’atauga e fai ai le latou mea’ai o le afiafi.

Ua amata ona otegia e le tina a Maria ia le teine o Maria, ona o lona paie.  Sa matua’i o’otia le loto o Maria i upu o le ote a lona tina ma ia alu ai i lona potu ma tagi ai.

O le aso na soso’o ai na ala mai le teine o Maria ma faatu sana sini, o le a ia taumafai malosi e tu’u lona paie.

Sa amata ona ia fesoasoani i feau i totonu o le latou aiga.   Ma ua le toe fai ni ana togafiti e ‘alo ‘ese mai ai i ana galuega.

Na va’aia e le tina a Maria ia le suiga i si ona alo ma ia faapea atu ai ia Maria, o ia o se teine lelei ma ua ia mitamita lava i le suiga lelei ua ia va’aia ia Maria.

O iina, na talitonu ai Maria, a galue ma le malosi, e le gata i lona maua o le fiafia, ae faapea foi le fiafia o lona aiga.

[IA MANUIA FUAFUAGA O TOTOE I LE FAAIUGA O LENEI VAIASO]