O LANU O LE LAGI

I aso a la ua leva, i le tau amataga o mea uma, e o’o lava i paneta ma fetu o tau tuputupu a’e, o lo’o a’o’oga pea i latou, na iai se vasega faapitoa lava, sa fiafia ai le to’atele.  

O lenei vasega e tumu i lanu ‘ese’ese, mai lava i le lanu uliuli ma le lanu pa’epa’e, se’ia o’o mai i le lanu mumu, lanumoana, lanu samasama ma isi lava mau lanu ‘ese’ese.  Ma na iai uma lava ni o latou faamoemoega ina ia matutua ifo, ma avea ma nil anu tulaga ese ma o le mafua’aga lea o a latou aoaoga.

Ma e le gata i le faimeamalie o nei lanu, ae sa iai foi nisi o lanu e fai lava sina taofiofi gata, e pei o le lanu uliuli ma le lanu pa’epa’e, e matua’i fiafia lava e faatupu faalavelave, ma e tuai mai lava i la’ua i le vasega i aso uma.

O se tasi taeao, na tupu ai se vevesi i luga o le lagi.  Ona o ao, o lo’o feagai ma toleniga, ua fai sina umi o timu, ua amata ai ona fefefe le lalolagi ona ua pogisa faasoloatoa le lalolagi, ua leai se malamalama ona ua le mafai ona susulu mai se la.

Ma ua toe pau lava le tulaga ua mafaufauina e fai, o le talosagaina lea o lanu mo se fesoasoani, e ui lava o lo’o laiti i latou ma e le’i lava so latou a’oa’oga mo le fofoina o faafitauli faapenei.

Ae peitai, sa agai atu taitai o le aoga, i se tasi o taeao segisegi, e le’i o’o uma atu lanu i le potu aoga, e o’o lava ia lanu uliuli ma lanu pa’epa’e.  Ae ona ua le toe iai se taimi, ae tupu se tulaga pagatia i le lalolagi, ua le mafai ona faatalitali ai lanu i le lanu uliuli ma le lanu pa’epa’e.

 O le mea lea na o latou faatopetope atu ai ma felelei faatasi uma loa agai i le lagi ma sa va’aia e le lalolagi ia se tulaga matagofie i le felelei faatasi atu o lanu agai i le lagi, i le susulu matagofie o lanu uma, a’o latou felelei faatasi atu.  Ma na avea le matagofie o lea va’aiga ma tulaga na fiafia uma ai e lalolagi atoa ma na fa’alogoina le patipati o tagata uma ma alalaga fiafia.

Na lagona e lanu uma ia lo latou fiafia ma le mitamita ina ua fa’aigoaina i latou, o fesoasoani i le la.  Ma sa talosagaina i latou e le lalolagi ina ia nofo sauniuni uma lanu, i so’o se taimi e manaomia ai lo latou fesoasoani.  Ma sa faia ai se maliliega, o so’o se taimi lava e tetele ai timuga, o le a vave ona toe agai atu lanu uma i le lagi, e faia ai se nuanua.

O se taimi mulimuli ane, na fa’ato’a taunu’u atu ai lanu uliuli ma lanu pa’epa’e, ae ua leai ni lanu i totonu o le potu aoga.

[IA MANUIA FUAFUAGA O LENEI VAIASO FOU]