MUSIKA MO AO O LE LAGI

Na iai se atunu’u sa feagai ma mafatiaga o le oge i vai.  Ua leva tele e le’i toe to ni timuga ma ua amata ona galala le nu’u i le fia ‘a’ai ona ua leai ma ni la’au o toe ola, i le leai o se suavai.

Ae o le taimi lea, o lo’o femalaga’i ai se au fai fa’aili, e tau saili ni a latou tupe e ala i a latou fa’afiafiaga po o koneseti.  Ae ona o le loto mafatia o tagata i le fa’afitauli o lo’o latou feagai, ua tau le fiafia ai tagata e fa’alogologo i musika.

Na faapea mai le au fai musika, e mafai e musika ona fesoasoani i le fo’ia o a latou faafitauli.  Ae peitai, sa leai seisin a fia fa’alogo i le au fai fa’aili.

O le mea lea na taumafai ai loa le au fai fa’ili e saili le mafuaaga ua le toe to ai ni timuga.  Aua a o latou tepa i le lagi, e puaoa mai foliga o le lagi, ae peitai, e leai ma se timu.

Fai mai tagata o le nu’u, ua leva tele ona puaoa mai foliga o le lagi, ae leai ma se mataua e tasi ua pa’u mai.

Ae na lototele lava le au fai fa’ili ma o latou faapea atu i tagata o le nu’u, “Aua tout e popole, o lea o le a matou o e aumai le timu i le tatou nu’u.”  Ma amata loa ona ta ta le latou fa’ili mai i le pito i luga o le mauga pito sili ona maualuga.

Ma na avea le malie o musika a le au fai fa’ili ma mea na agai uma atu ai tagata o le nu’u i luga o le mauga, ona ua fia fa’alogologo i le musika.

A’o ta ta musika a le au fai fa’ili sa faapea ona lagonaina mai e ao o le lagi ma e foliga mai o lo’o ‘ene e musika ia itu uma o ao o le lagi ma e le’i umi lava ae faalogoina e tagata ia le pa pa mai o faititili o ao tetele, e fa’ailoa mai ai le talie o ao i le malie o musika.

Sa fa’aauau pea ona ta ta musika a le ‘au fai fa’ili ma e le’i umi lava ae amata loa ona matala ao o le lagi ma to mai ai loa timuga tetele ma fa’asu su ai le lalolagi atoa.

[IA MANUIA FUAFUAGA UMA O LENEI VAIASO]