O PATO VAO E 12

I aso a la ua leva, na alu ai se tafaoga a se Masiofo e maimoa i lona malo.  O lenei masiofo e iai sana fanau tama, po o Perenise, e to’a 12.  Ae e leai se Purinisese o le malo.

A’o agaí atu le ți’eti’ega a le Masiofo.i se vaega o le malo, e tumu i le togavao, sa fa’ate’ia o ia, ina ua fa’atu le taavale solofanua na malaga atu ai, e se tamaitai lalelei tele.

Ua oso mai I faro le Masiofo ma si’i atu lenei teineititi mă sogi atu i ona alafau.  Ma faapea lana faamatalaga, “Maimau pe ana iai sa’u teineititi aulelei faapenei.”

E le’i umi ona uma atu le faamatalaga a le Masiofo, ae tu i ona luma se fa’ataulaitu ma faapea atu i le masiofo, “O le a talia lou mana’o, lau afioga i le Masiofo.”  O lenei fa’ataulaitu, o se faataulaitu alofa ma le agalelei.

“O le a maua pepe tamaitai ma o le a aulelei ma agalelei o ia.  Ae e na o le tasi lava le mea e te faia, e maua ai le manaoga o lou loto, o lou tu’uina mai lea ia te a’u, o so’o se tagata po o so’o se manu, po o le a lava, e fa’afetauia oe i luga o le ala laupapa, pe a e toe taliu atu i lou maota.”

Ua toe faatopetope le Masiofo i le fa’ataulaitu ma ia faatopetope atu loa I lona maota, ae o lo’o tu le faataulaitu ma toe valaau atu, “Manatua, o le a lava le mea e fa’afetauia oe i laga o le ala laupapa, e aumai lea mo a’u.”

Sa le’i ano tele le masiofo i le vala’au atu a le Faataulaitu, na o le pau lava le mea o lo’o mana’o ai, o le fia vave taunu’u i le fale, ae se’i faamatala I le Tupu, o lea o le a maua se la Purinisese.

Ua latalata atu nei le taavale solofanua a le masiofo i le auala laupapa lea e tau atu ai i le maota o le tupu.

Na toe manatua vave ai lava e le masiofo ia le faamatalaga a le faataulaitu.  Ua faatu e le masiofo ia lana taavale solofanua i leisi itu o le auala laupapa ma ia pupula to’a atu i le auala laupapa, ua le mautonu lona loto.

Ona ia toe ata lea ma faapea, “Atonu o se taifau po o se tagata faigaluega, o le a sopoia le auala laupapa, i le taimi ou te o’o atu ai.”

Ua fa’atonu ai loa e le masiofo ia ana auauna, ina ia fa’atopetope atu loa I le fale.

E le’i o’o lelei le taavale solofanua a le masiofo i le ogatotonu o le auala laupapa, ae ona fa’alogoina loa ni leo, na toeititi a pe ai lona fatua.

Ua ‘e’e atu le Masiofo i ana auauna ina ia taofi le taavale solofanua.  E le’i tu lelei le taavale solofanua, ae ua oso mai I fafo le masiofo ma ia va’aia le tamomo’e atu o lână fanau tama po o Perenise, e to’a 12 agai i le auala laupapa.

Ua vala’au mai ma le leotele ia le Masiofo i lana fanau, e toe fo’i.  Ua pei e siva le masiofo ma le talotalo o ona lima ma osoooso I luga ma lalo.  Ma valaau mai I ana auauna, e taofi lana fanau e aua ne’i o’o atu i luga o le ala laupapa.

Ae pga lea, ua tuai.  Ua taunu’u ma le fiafia nai Perenise ma o latou feosofi atu, i le opo mai lo latou tina, lea ua tagi lotulotu ona ua ia manatua le tala a le Faataulaitu. 

“O le a lava le mea e fa’afeiloa’ia oe i luga o le auala laupapa, e ave ma a’u.”

Na a’ate’ia tagata uma sa iai i lea taimi, ina ua pa pa faititli ma emo uila ma le a’ai atu, ua liu uma lava ia Perenise e to’a 12, i ni pato vao, e 12.

Ae tu mai ai foi ma le fa’ataulaitu.

Na fiu le masiofo e tagi ma ai’oi atu i le fa’ataulaitu e aua le aveesea si ana fanau, ae paga lea, ua uma ona fai le la feagaiga.

Ua valaau atu le faataulaitu i pato vao, ma faasino i le lagi ma va’aai ai le felelei ese atu o nei pato e 12.

[IA MANUIA FUAFUAGA O TOTOE O LENEI VAIASO]