Pago Pago - AMERIKA SAMOA

Ia Mati 19, 2025, na sainia ai e le Lutena Kovana, le afioga Pulumataala Ae Ae Jr., ia se poloaiga fa’alauaitele, e fa’alauiloa mai ai le avea o Mati 2025 ma “Masina o le Gagana Samoa”.  Ma ua fautuaina ai ele afioga Pulu ia tagata o le atunu’u, ina ia “fa’ailogaina i le Masina o le Gagana Samoa, lo tatou faasinomaga, la tatou gagana, ma la tatou aganu’u ina ia toto i tatou talavou le taua o le fa’asao ma puipui a tatou fa’atinoga o tu ma aga masani, o la tatou agaifanua.”

O lo’o ua fa’alauiloa mai ai foi i lenei poloaiga fa’alauaitele ni mafua’aga se lima, ua taua ai le faia o lenei masina e fa’ataua ai le gagana Samoa.

Muamua, ona  ‘o le olaola ma le fa’aaoga pea o le gagana Samoa, e u’una’ia ai lona tumau ma le atiina’e o le soifuaga fa’aSamoa.”

Lona lua, e pei ona ta’ua i  le poloaiga faalauaitele a le malo, ona o le gagana muamua e tautala ai le 90%+ o tagata Amerika Samoa o le gagana Samoa.  Ae peitai, i se su’esu’ega na faia i le tausaga e 2001, ua fa’amautuina mai ai, e na’o le 67% o i latou sa fesiligia, e tautala i le gagana Samoa i o latou aiga, ma ua tula’i mai ai se popolega.  

O le lona tolu, o le mo’omia o le mataala ma ni fuafuaga e puipui ai mai i le mamulu ese atu o gagana ua afaina ai o tatou tua’oi i le Pasefika.

Lona fa, ua poloa’iina e tulafono a le teritori, o le gagana Samoa, o se tasi o gagana aloa’ia lona tulaga, e tutusa ma le gagana Peretania, i a’oa’oga, le malo, le tamaoaiga ma feialoa’iga a tagata Amerika Samoa.

Ae le gata i lea, o le lona lima o mafua’aga o le taua o lenei masina, o le silafia ma le fa’aaogaina o le gagana Samoa e le mafai ona tu’ueseina ma le auai ma fealoa’i lelei ma tagata i lona ti’omaga ato ma le soifua fa’a-Samoa.

I le fa’amamaluina o lenei masina taua, sa feagai ai le vaega a le Arts Council ma se polokalama o lo’o fa’asalalauina i luga o upega tafa’ilagai, lea na amataina mai ia Mati 1, 2025.

O lea polokalama o lo’o faapea ona aofia ai nisi o le atunu’u e ala i lo latou fa’asoa mai o se upu Samoa o le aso, o le uiga o le upu ma le fa’aaogaina.  E le gata i lea, ua faapea foi ona o latou fa’asoa mai ia o latou manatu, i le taua o le aoaoina o le gagana Samoa faapea ni a latou timaiga ma ni fa’alototele, mo i latou o lo’o a’oa’oina le gagana Samoa.